Kʼaru naxye li Santil Hu chirix li xjalajik li kutan ut li kutan chalk re?
«Xbʼaan naq yook chi jalaak li qakutan xiwajel chik ru. Chi seebʼ inkʼaʼ chik naru twanq li yuʼam saʼ li Ruuchichʼochʼ» (The Guardian).
Ebʼ li kristiʼaan wankebʼ re naq naqakʼul li chʼaʼajkilal aʼin. Naabʼal li wankebʼ xnawom nekeʼxye naq li nekeʼxbʼaanu li kristiʼaan naxbʼaanu naq ttiqwoʼq ru li chʼochʼ. Xbʼaan aʼin tiqʼ chik ru li kutan ut naxkʼam chaq naabʼal li chʼaʼajkilal. Qilaq junjunq rehebʼ:
Rajlal yook chi tiqwoʼk ru li kutan, inkʼaʼ naxkʼe li habʼ, naabʼal li kaqsut-iqʼ ut jalan chik li naʼlebʼ li naxbʼaanu naq tbʼutunq li nimaʼ ut nakʼatk ebʼ li kʼicheʼ.
Li ratzʼamke re Ártico yook chi haʼark.
Yook chi chamoʼk li palaw.
Li chʼaʼajkilal chirix li qasutam yook xchʼaʼajkinkil chixjunil li Ruuchichʼochʼ. Li hu The New York Times kixye li chʼaʼajkilal li yookebʼ xnumsinkil 193 li tenamit ut kixye: «Li ruuchichʼochʼ yook xtzʼaamankil xtenqʼ». Aʼin ak kixkamsi ut kixkʼe saʼ rahilal naabʼalebʼ li kristiʼaan, joʼkan naq li Nimla Molam chirix li Kawilal kixye naq «aʼin li qʼaxal naxkʼe saʼ xiwxiwal li xjunxaqalilebʼ li kristiʼaan».
Usta naqakʼul aʼin, wanq qoybʼenihom. Li Santil Hu kixye resil li yook chi kʼulmank anaqwan. Naxye ajwiʼ naq naru tqakʼojobʼ qachʼool rikʼin li Yos xbʼaan naq aʼan tooril.
Ma yook chi tzʼaqlok junaq li propesiiy chirix xjalajik li kutan?
Joʼkan. Li xtiqwal ru li chʼochʼ yook xbʼaanunkil naq tjalaaq li kutan li naxchap ribʼ rikʼin li naxye li Santil Hu li tkʼulmanq saʼebʼ li qakutan.
Li propesiiy: Li Yos tixsach «li yookebʼ xjukʼbʼal li ruuchichʼochʼ» (Apocalipsis 11:18).
Li Santil Hu naxye naq twulaq xqʼehil naq ebʼ li kristiʼaan chanchan tawiʼ naq teʼxsach li Ruuchichʼochʼ. Joʼkan naq saʼ xkʼabʼaʼ li xtiqwal ru li chʼochʼ, yook chi yibʼok ru li Ruuchichʼochʼ.
Li propesiiy naxkʼe jun xyaalalil kʼaʼut inkʼaʼ naru tqakʼojobʼ qachʼool naq ebʼ li kristiʼaan teʼxkol li Ruuchichʼochʼ. Kʼe reetal naq li Santil Hu naxye naq li Yos t-okenq naq ebʼ li kristiʼaan yooqebʼ xsachbʼal li Ruuchichʼochʼ. Naabʼalebʼ li kristiʼaan yookebʼ xyalbʼal xqʼe re xrambʼal naq tjalaaq li kutan. Abʼan usta teʼxyal xqʼe, inkʼaʼ teʼruuq xbʼaanunkil naq ebʼ li kristiʼaan teʼxkanabʼ xjukʼbʼal li Ruuchichʼochʼ.
Li propesiiy: «Xuwajel tzʼaqal li teʼril ebʼ li qas qiitzʼin» (Lucas 21:11).
Li Santil Hu naxye naq xiwajel ru li tqil saʼebʼ li qakutan. Li xjalajik li kutan kixkʼam chaq naabʼal li chʼaʼajkilal saʼ chixjunil li ruuchichʼochʼ. Aʼin yook xbʼaanunkil naq qʼaxal yookebʼ xxiw ebʼ li kristiʼaan xbʼaan li yook chi kʼulmank, xbʼaan naq maare tyibʼoq ru li qawanjik.
Li propesiiy: «Saʼ xraqik ebʼ li kutan kawaq li wank ut qʼaxal chʼaʼajkaq xnumsinkil. Xbʼaan naq ebʼ li qas qiitzʼin kaʼajwiʼ aʼanebʼ teʼxra ribʼ; teʼxrahi ru li tumin, [...] teʼxtzʼeqtaana li ras riitzʼin, [...] inkʼaʼ chik teʼxkʼe ribʼ saʼ aatin, [...] teʼxbʼaanu li maaʼusilal rehebʼ li ramiiw ut kawaqebʼ xjolom» (2 Timoteo 3:1-4).
Li Santil Hu naxye chanruhaq xnaʼlebʼebʼ li kristiʼaan, li naxbʼaanu naq tyibʼoq ru li kutan. Ebʼ li awabʼej ut ebʼ laj yakonel nekeʼxkʼe xchʼool chirix li tumin ut inkʼaʼ chirixebʼ li kristiʼaan ut maakʼaʼ nekeʼraj re chanruhaq li xwanjikebʼ saʼ li kutan chalkebʼ re. Usta nekeʼraj kʼanjelak saʼ komonil, inkʼaʼ nekeʼxkʼe ribʼ saʼ aatin re xtuqubʼankil ru li chʼaʼajkilal chirix li xtiqwal ru li chʼochʼ.
Xbʼaan li naxye li propesiiy, inkʼaʼ tqoybʼeni naq ebʼ li kristiʼaan teʼxjal xnaʼlebʼebʼ ut xchaabʼilobʼresinkil li ruuchichʼochʼ. Li Santil Hu naxye bʼan naq ebʼ li kristiʼaan li kaʼajwiʼ nekeʼxsikʼ li us choʼq rehebʼ «qʼaxal tnumtaaq wiʼ chik li xmaaʼusilalebʼ» (2 Timoteo 3:13).
Chʼolchʼooq chiqu naq li Yos t-okenq saʼ li chʼaʼajkilal aʼin
Li Santil Hu naxye naq li Jehobʼa a, laj Yobʼtesinel, naxkʼe xchʼool chirix li ruuchichʼochʼ ut chiqix ajwiʼ. Qilaq oxibʼ li raqal li Santil Hu li naxkʼut naq li Jehobʼa t-okenq chirix li chʼaʼajkilal aʼin:
1. Li Yos «moko kixyiibʼ ta [li Ruuchichʼochʼ] chi maakʼaʼ xyaalal, re bʼan naq taatenamitoʼq» (Isaías 45:18, Li Santil Hu, Sociedad Bíblica de Guatemala, SBG).
Li Yos tixbʼaanu li rajom arin saʼ Ruuchichʼochʼ (Isaías 55:11). Inkʼaʼ tixkanabʼ naq ebʼ li kristiʼaan teʼxsach ru.
2. «Aʼut ebʼ li nebʼaʼ teʼreechani li chaabʼil naʼajej [“li Ruuchichʼochʼ”, TNM]. Kʼajoʼ xnimal li tuqtuukil usilal teʼxyal chi junelik! […] Abʼan li tiikebʼ xchʼool teʼreechani li chaabʼil naʼajej [“li Ruuchichʼochʼ”, TNM], ut aran teʼwanq junqʼe junqʼe kutan» (Salmo 37:11, 29, SBG).
Li Yos naxyeechiʼi naq ebʼ li kristiʼaan teʼwanq chi junelik arin saʼ Ruuchichʼochʼ saʼ tuqtuukilal.
3. «Ebʼ li inkʼaʼ usebʼ xnaʼlebʼ isinbʼilaqebʼ saʼ li naʼajej aʼin» (Proverbios 2:22, SBG).
Li Yos naxye naq tixsachebʼ ru li maaʼusebʼ xnaʼlebʼ ut li yookebʼ xjukʼbʼal li ruuchichʼochʼ.
Li tixbʼaanu li Yos choʼq qe saʼebʼ li kutan li chalkebʼ re
Chanru ttzʼaqloq ru li kixyeechiʼi li Yos choʼq re li Ruuchichʼochʼ? Rikʼin li Xʼawabʼejilal li Yos (Mateo 6:10). Li Awabʼejilal aʼan twanq saʼ choxa. Moko aajel ta ru naq tixkʼe ribʼ saʼ aatin rikʼinebʼ li awabʼej re naq tixchaabʼilobʼresi li ruuchichʼochʼ. Li Xʼawabʼejilal li Yos tkanaaq bʼan choʼq reqaj li xʼawabʼejilal li winq (Daniel 2:44).
Aʼan jun chaabʼil esil choʼq qe ut choʼq re li Ruuchichʼochʼ! (Salmo 96:10-13). Kʼe reetal li tixbʼaanu li Jehobʼa rikʼin li Xʼawabʼejilal:
Xchaabʼilobʼresinkil wiʼ chik li ruuchichʼochʼ
Li naxye li Santil Hu: «Sahoqebʼ li chaqichʼochʼ ut li joxkʼ naʼajej! Chisahoʼq li junesal naʼajej ut chinujaq chi uutzʼuʼuj» (Isaías 35:1, SBG).
Li naraj xyeebʼal choʼq rehebʼ li kutan li chalkebʼ re: Chi seebʼ li Jehobʼa tixchaabʼilobʼresi wiʼ chik li ruuchichʼochʼ ut ebʼ li naʼaj li jukʼbʼil xbʼaanebʼ li kristiʼaan.
Inkʼaʼ chik tjalaaq li kutan
Li naxye li Santil Hu: Li Jehobʼa «chʼanchʼo kixkanabʼ li kaqsut-iqʼ, chʼanaamil ajwiʼ li xkaw oq li palaw» (Salmo 107:29, SBG).
Li naraj xyeebʼal choʼq rehebʼ li kutan li chalkebʼ re: Li Jehobʼa wank xwankil saʼ xbʼeen li ruuchichʼochʼ. Ebʼ li kristiʼaan inkʼaʼ chik teʼxkʼul li chʼaʼajkilal saʼ xkʼabʼaʼ li xjalajik li kutan.
Tqatzol rilbʼal chiʼus li Ruuchichʼochʼ
Li naxye li Santil Hu: «Tatintzol, tinkʼut chawu li bʼe tento taakʼam» (Salmo 32:8, SBG).
Li naraj xyeebʼal choʼq rehebʼ li kutan li chalkebʼ re: Li Jehobʼa kixkʼe xkʼanjelebʼ li kristiʼaan naq teʼril li Ruuchichʼochʼ (Génesis 1:28; 2:15). Aʼan tixkʼut chiqu chanru xbʼaanunkil chi chaabʼil li kʼanjel aʼin. Tqatzol xkʼaakʼalenkil chiʼus li xyobʼtesihom ut wanq saʼ tuqtuukilal.
a Li xkʼabʼaʼ li Yos aʼan Jehobʼa (Salmo 83:18, La Biblia. Traducción del Nuevo Mundo, 2019 saʼ español). Chaawil li naʼlebʼ «Ani tzʼaqal li Jehobʼa?».
Maare twulaq ajwiʼ chaawu
JUNELIK AJʼAJAQ QU!
Qʼaxal xnumtaak li chaqiʼel | Kʼaru naxye li Santil Hu?
Ma truuq xtuqubʼankil ru li chʼaʼajkilal aʼin? Ma t-usaq saʼ junaq kutan?
JUNCHʼOL CHIK EBʼ LI NAʼLEBʼ
Q’axal yook chi jalaak li qasutam: Ma truuq li Santil Hu xtenq’ankileb’ li neke’xk’ul li rahilal?
Li na’leb’ li wank sa’ li Santil Hu naru nakatxtenq’a rub’ejal, naq yook chi k’ulmank ut naq ak xnume’k li nimla rahilal.
QʼAXAL LOQʼ LI NAXKʼUT LI SANTIL HU
Kʼaru tzʼaqal Xnimajwal Awabʼejilal li Yos?
Li Jesus kixkʼe xchʼool chi aatinak chirix li Xʼawabʼejilal li Yos chiru jalan chik li naʼlebʼ. Ebʼ li xtzolom nekeʼxtzʼaama naq tchalq li Xʼawabʼejilal li Yos.
LAJ KʼAAKʼALEHOM
Kʼaru tixbʼaanu li Xʼawabʼejilal li Yos?
Li Jesús naxnaw naq kaʼajwiʼ li Xʼawabʼejilal li Yos trisi li chʼaʼajkilal. Kʼaru ak kixbʼaanu li Xʼawabʼejilal li Yos re naq tqakʼojobʼ qachʼool rikʼin?
