Chiruhebʼ li 30 chihabʼ li ak xeʼnumeʼk naabʼalebʼ li kristiʼaan nekeʼxkʼoxla naq maakʼaʼ nachʼaʼajkink re li wanjik saʼ li ruuchichʼochʼ ut naq yook chi chaabʼiloʼk. Abʼan aʼin yook chi jalaak, joʼ naʼilmank saʼebʼ li esil:

•   «Yook qakʼaʼuxl chi xkʼoxlankil naq li yalok u li wank Gaza tnimanq xbʼaan li yalok u li wank saʼ xyanq Israel ut Hizbulá li wank saʼ xnubʼajlil li tenamit Líbano» (Reuters, 6 re enero 2024).

•   «Li tenamit Irán naxsikʼ pleetik rikʼin li tenamit li wankebʼ bʼarwiʼ naʼok li saqʼe, ut li tenamit Rusia ut China yookebʼ xtenqʼankil. Ebʼ li winq li nekeʼpleetik rubʼel xwankil Irán yookebʼ chi yalok saʼ jalan jalanq chi teep ut saʼ junpaat li tenamit aʼin kiʼok wiʼ chik xkawresinkil ribʼ rikʼin li xninqal ru xnaqʼ puubʼ» (The New York Times, 7 re enero 2024).

•   «Ebʼ laj puubʼ re Rusia yookebʼ xsachbʼal li tenamit Ucrania» (UN News, 11 re enero 2024).

•   «Li tenamit China yook chi bʼihomok ut naabʼal laj puubʼ yook xkawresinkil, ebʼ laj Taiwán inkʼaʼ nekeʼraj naq jalan chik ttaqlanq saʼ xbʼeenebʼ, wank li chʼaʼajkilal saʼ xyanq Pekín ut Washington, aʼin naru naxbʼaanu naq saʼ junpaat ttiklaaq jun li yalok u» (The Japan Times, 9 re enero 2024).

 Kʼaru naxye li Santil Hu chirix ebʼ li chʼaʼajkilal li wank saʼebʼ li tenamit anaqwan? Ma tooxkʼam aʼin saʼ jun li nimla yalok u? 

 Li Santil Hu moko kiʼaatinak chirixebʼ li yalok u li yooko chi rilbʼal anaqwan. Abʼanan kixye naq naabʼal ebʼ li yalok u yooqebʼ «risinkil li tuqtuukilal saʼ xbʼeen li ruuchichʼochʼ» (Apocalipsis 6:4).

 Saʼ li Santil Hu, laj Daniel kixtzʼiibʼa naq «saʼ rosoʼjikebʼ li kutan» li xninqal ru tenamit li xikʼ nekeʼril ribʼebʼ teʼyaloq re xtawbʼal li xwankilal. Saʼ li yalok aʼin teʼxkʼutbʼesi li xmetzʼew ut li xwankil ut teʼxsach naabʼal «li oor», malaj li tumin (Daniel 11:40, 42, 43, Li Santil Hu, Sociedad Bíblica de Guatemala).

 Li Santil Hu naxye naq tnumtaaq li chʼaʼajkilal sa’ ruuchichʼochʼ, ut moko yook ta chi usaak. Li Jesukriist kixye: «Twanq jun li nimla rahilal. Chalen chaq saʼ xtiklajik li ruuchichʼochʼ toj saʼebʼ li kutan aʼin, maajunwa kiwank chaq jun nimla rahilal joʼ aʼin» (Mateo 24:21). «Li nimla rahilal» aʼin traqeʼq rikʼin li Armagedón, li Santil Hu naxye naq aʼan «li yalok li twanq saʼ xnimal xkutankil li Nimajwal Yos» (Apocalipsis 16:14, 16).

 Li Armagedón moko tixsach ta ebʼ li kristiʼaan, tixkolebʼ bʼan. Rikʼin li yalok aʼin, li Yos inkʼaʼ chik tixkanabʼ naq ebʼ li winq teʼawabʼejinq xbʼaan naq xeʼxkʼam chaq naabʼal li yalok u. Wi taawaj xnawbʼal chanru li Armagedón tixkʼam chaq li tuqtuukilal chi junelik, chaawil ebʼ li tzolom:

•   Kʼaru li Armagedón?

•   Li xkʼulunik li Armagedón aʼan jun chaabʼil esil