Saʼ li 24 re enero 2023, li wankebʼ xnawom xeʼxseebʼa xbʼeenik li xRelojil li Raqbʼa Aatin a jaye’q tuqtu qʼoqyink, naraj naxye naq nachʼ chik wank li xraqeʼjik li ruuchichʼochʼ.

•   Li molam Servicio internacional de noticias de la agencia AFP kixye naq «saʼ xkʼabʼaʼ li yalok u aran Ucrania, li xninqal ru xnaqʼ puubʼ li qʼaxal xuwajel ru ut naq yook chi poʼek li qasutam, li xRelojil li Raqbʼa Aatin, reetalil ebʼ li xninqal ru chʼaʼajkilal li yookebʼ xnumsinkil ebʼ li qas qiitzʼin, qʼaxal xnachʼok chik saʼ xraqeʼjik li ruuchichʼochʼ sa’ li martes a’in».

•   «Li wankebʼ xnawom keʼxye saʼ li martes aʼin naq xeʼxseebʼa xbʼeenik li xRelojil li Raqbʼa Aatin 90 kʼajkʼasal, joʼ maajunwa xeʼwank chaq ebʼ li kristiʼaan chiru li apocalipsis [rosoʼjik]» (ABC News).

•   «Jun chʼuut li wankebʼ xnawom li jalan jalanqebʼ xtenamit xeʼxye naq maajunwa kiwank saʼ xiwxiwal li xyuʼam li kristiʼaan joʼ anaqwan» (The Guardian).

 Ma nachʼ chik wank li xraqik ebʼ li kristiʼaan ut li Ruuchichʼochʼ? Ma tqaxuwa ru li tkʼulmanq? Kʼaru naxye li Santil Hu?

 Li Santil Hu naxye naq «li ruuchichʼochʼ wank chi junelik» ut naq wanqebʼ kristiʼaan li «teʼwanq junqʼe junqʼe kutan» (Eclesiastes 1:4, SBG; Salmo 37:29, SBG). Joʼkan naq ebʼ li kristiʼaan inkʼaʼ teʼxsach li Ruuchichʼochʼ chi moko teʼxbʼaanu naq maaʼani chik twanq chisaʼ.

 Abʼan, li Santil Hu naʼaatinak chirix jun li rosoʼjik. Joʼ eetalil, naxye naq «li ruuchichʼochʼ t-osoʼq» (1 Juan 2:17, Li Santil Hu, Wycliffe Bible Translators. Akʼ tzʼiibʼ).

•   Wi taawaj xnawbʼal kʼaru naraj xyeebʼal li Santil Hu naq naʼaatinak chirix li rosoʼjik li ruuchichʼochʼ, chaawil li naʼlebʼ «Ma chi seebʼ t-osoʼq li ruuchichʼochʼ? Kʼaru li apocalipsis?».

•   Re xnawbʼal kʼaru naxye li Santil Hu chirix joqʼe tkʼulmanq ebʼ li xninqal ru naʼlebʼ saʼ ruuchichʼochʼ, chaawil li naʼlebʼ «Joqʼe tchalq li rosoʼjik?».

 Li Santil Hu nokooxtenqʼa re naq inkʼaʼ tchʼinaaq qachʼool usta wank li raaxiikʼ saʼ li ruuchichʼochʼ. Chanru?

•   Li Santil Hu naxkʼe li naʼlebʼ li nokooxtenqʼa saʼ li qayuʼam (2 Timoteo 3:16, 17). Joʼ eetalil, wi nakaawaj xnawbʼal kʼaru naxye li Santil Hu chirix chanru naʼlebʼak chiʼus usta wank li chʼaʼajkilal, chaawil li naʼlebʼ «Kʼaru naru tinbʼaanu re naq inkʼaʼ t-oq inkʼaʼuxl».

•   Li Santil Hu naxkawubʼresi qachʼool choʼq re li kutan chalkebʼ re (Romanos 15:4). Naxye qe chi tzʼaqal re ru li naqoybʼeni anaqwan ut saʼ li kutan chalkebʼ re, ut aʼin nokooxtenqʼa re xnumsinkil ebʼ li chʼaʼajkilal li yook chi kʼulmank saʼ li ruuchichʼochʼ.

 Re xtawbʼal rusilal li naxkʼe li Santil Hu, nakaatqabʼoq anaqwan re naq taakʼubʼ laatzolbʼal chirix li Santil Hu.