Chiru li po julio 2022 xuwajel rilbʼal chanru xeʼkamsiik chi puubʼ ebʼ li kristiʼaan saʼ chixjunil li Ruuchichʼochʼ:

•   «Saʼ li tenamit Japón kʼajoʼ naq xeʼxuwak ebʼ li kristiʼaan naq xeʼxkamsi laj Shinzo Abe li kiwank joʼ xbʼeen aj tenqʼanel re li awabʼej. Xeʼsach xchʼool xbʼaan naq saʼ li tenamit aʼan moko junelik ta nawank li kamsink ut moko yalaq ani ta nawank li xpuubʼ» (10 re julio 2022, The Japan Times).

•   «Aran Dinamarca ebʼ li qas qiitzʼin kʼajoʼ naq keʼxuwak naq keʼril naq jun li winq kixkamsi oxibʼ li kristiʼaan saʼ jun li kʼayibʼaal aran Copenhague» (4 re julio 2022, Reuters).

•   «Saʼ Sudáfrica jun chʼuut chi winq keʼxkamsi 15 li kristiʼaan li wankebʼ saʼ jun li naʼaj re ukʼak aran Soweto» (10 re julio 2022, The Guardian).

•   «Numenaq 220 li kristiʼaan keʼkamsiik aran Estados Unidos naq yookebʼ chi ninqʼehik saʼ li 4 re julio» (5 re julio 2022, CBS News).

 Ma twulaq li kutan naq maakʼaʼaq chik li kamsink? Kʼaru naxye li Santil Hu?

 Li Santil Hu naxye naq wanko «saʼ rosoʼjikebʼ li kutan» saʼ li qʼehil aʼin li kristiʼaan qʼaxal josqʼaqebʼ, xuwajelaqebʼ ru ut teʼnaʼlebʼaq joʼebʼ li josqʼ aj xul (2 Timoteo 3:1, 3, Li Santil Hu, Sociedad Bíblica de Guatemala, SBG). Chixjunil aʼin naxbʼaanu naq ebʼ li kristiʼaan teʼxuwaq (Lucas 21:11). Abʼan li Santil Hu naxye naq chi seebʼ traqeʼq chixjunil li maaʼusilal ut ebʼ li kristiʼaan teʼhilanq «saʼ tuqtuukilal ut maakʼaʼ taachʼiʼchʼiʼinq rehebʼ saʼebʼ li ochoch wanqebʼ wiʼ» (Isaías 32:18, SBG). Chanru traqeʼq li raaxiikʼ?

 Li Yos tixsachebʼ li maaʼusebʼ xnaʼlebʼ ut ebʼ li puubʼ.

•   «Aʼut ebʼ li inkʼaʼ usebʼ xnaʼlebʼ isinbʼilaqebʼ saʼ li naʼajej [“li Ruuchichʼochʼ”, TNM] aʼin» (Proverbios 2:22, SBG).

•   «[Li Yos] xchʼanabʼank re li yalok toj saʼ xmaril li ruuchichʼochʼ, xtoqi li xnaʼ simaj ut xjach li jutzʼ cheʼ; aʼan xkʼehok xxamlel li ramlebʼ chʼiichʼ» (Salmo 46:10, SBG).

 Li Yos tixkʼut chiruhebʼ li kristiʼaan wanq saʼ tuqtuukilal ut chi joʼkan trisi li raaxiikʼ.

•   «Saʼ chixjunil linsantil tzuul maajun taabʼaanunq maaʼusilal malaj taarahobʼtesinq ras riitzʼin, xbʼaan naq chixjunilebʼ teʼxnaw chik ru li Qaawaʼ. Joʼ naq li haʼ naxtamresi li palaw, joʼkan ajwiʼ li xraabʼal li Qaawaʼ tixnujobʼresi chixjunil li ruuchichʼochʼ» (Isaías 11:9, SBG).

•   Saʼebʼ li qakutan li Yos yook xkʼutbʼal chiruhebʼ li qas qiitzʼin xkanabʼankil li raaxiikʼ ut chixjunil li naʼoksimank re kamsink, naxye: «Teʼxsutqʼisi ebʼ li qʼesnal chʼiichʼ choʼq piklebʼ chʼochʼ, ut li xjutzʼ chʼiichʼebʼ teʼkanaaq choʼq setlebʼ kʼim» (Miqueas 4:3, SBG).

 Re xtawbʼal xkomon li naʼlebʼ chirix jun li ruuchichʼochʼ bʼarwiʼ maakʼaʼaq chik li xiw joʼ naxye li Santil Hu, chaawil li naʼlebʼ «Ma twulaq li kutan naq maakʼaʼaq chik qaxiw?».

 Re xtawbʼal xkomon li naʼlebʼ chirix chanru li Yos tixraq chi junajwa li raaxiikʼ, chaawil li naʼlebʼ «Twulaq li kutan naq twanq li tuqtuukilal saʼ Ruuchichʼochʼ».