Saʼ li 19 re mayo 2022 li chʼuut li naxsikʼ li tuqtuukilal saʼ xyanqebʼ li tenamit li wank saʼ li molam Naciones Unidas kirabʼi naq numenaq 75 li kristiʼaan li wankebʼ xwankil keʼxye naq «li xmaakʼaʼil li tzekemq kichalk xbʼaan li COVID-19 ut naq yook chi jalaak li qasutam, joʼkan ajwiʼ li yalok u li wank Ucrania kixkʼam chaq naabʼal li chʼaʼajkilal saʼ ruuchichʼochʼ ut aʼin yook xbʼaanunkil naq saʼ wiibʼ oxibʼ li tenamit twanq weʼej». Li hu The Economist kixye naq xbʼaan «li yalok u li ruuchichʼochʼ wank saʼ chʼaʼajkilal ut naabʼalebʼ li qas qiitzʼin yookebʼ xnumsinkil weʼej». Li Santil Hu ak kixye naq tmaakʼaʼoq li tzekemq saʼebʼ li qakutan abʼanan naxkʼe ajwiʼ li tenqʼ re naq tooruuq xqʼaxbʼal ru ebʼ li chʼaʼajkilal aʼin.

•    Li Jesús kixye: «Teʼwaklijeʼq chi xkamsinkil ribʼebʼ tenamit rikʼin jalan chik tenamit, li awabʼej rikʼin jalan chik awabʼej, ut taawanjeʼq weʼej» (Mateo 24:7, Li Santil Hu, Sociedad Bíblica de Guatemala, SBG).

•    Li hu Apocalipsis naʼaatinak chirix li kaahibʼ li wankebʼ saʼ xbʼeen li kawaay. Li xkabʼ kawaay reetalil li yalok u. Li rox kawaay reetalil li weʼej, saʼ li qʼehil aʼin tchʼaʼajkoʼq xtawbʼal li tzekemq ut ebʼ li kristiʼaan qʼaxal terto teʼkʼayinq. «Kiwil, ut aran wank jun li qʼeqi kawaay, ut li kʼojkʼo chi xbʼeen wan chaq jun li bʼislebʼ saʼ ruqʼ. Ut kiwabʼi joʼ jun xyaabʼ kuxej [...], yo chi xyeebʼal: “Jun bʼiis chi triiw chiru lajeebʼ xkaʼkʼaal chi tumin, oxibʼ bʼiis chi sebada chiru lajeebʼ xkaʼkʼaal chi tumin[”]» (Apocalipsis 6:5, 6, SBG).

 Li propesiiy li wank saʼ li Santil Hu li naʼaatinak chirix li weʼej yook chi tzʼaqlok ru anaqwan saʼ li qʼehil li naxkʼabʼaʼi li Santil Hu li «rosoʼjikebʼ li kutan» (2 Timoteo 3:1, SBG). Re xnawbʼal xkomon chirix li «rosoʼjikebʼ li kutan» ut li kaahibʼ li wankebʼ saʼ xbʼeen li kawaay re li hu Apocalipsis, chaawil li bʼideo Chalen li chihabʼ 1914 kijalaak xwanjik li Ruuchichʼochʼ ut li naʼlebʼ «Kʼaru xyaalal li kaahibʼ li wankebʼ saʼ xbʼeen li kawaay li naʼaatinak wiʼ li hu Apocalipsis?».

•    Saʼ li Santil Hu natawmank li chaabʼil naʼlebʼ chirix chanru tooruuq xqʼaxbʼal ru ebʼ li chʼaʼajkilal joʼ naq naterqʼuuk xtzʼaq li tzekemq malaj naq namaakʼaʼoʼk li tzekemq. Re rilbʼal wiibʼ oxibʼ li naʼlebʼ chirix aʼin, chaawil li naʼlebʼ «Kʼaru taabʼaanu re xkubʼsinkil laasachomq».

•    Li Santil Hu naxye naq ttuqlaaq ru chixjunil li chʼaʼajkilal. Naxye naq twulaq li qʼehil naq «numtajenaqaq li awimq saʼ ruuchichʼochʼ» ut naq chixjunilebʼ li qas qiitzʼin teʼwanq xtzekemq (Salmo 72:16, SBG). Re xnawbʼal li naxyeechiʼi li Santil Hu chirix li kutan chalk re ut chanru tqakʼojobʼ qachʼool chirix, chaawil li naʼlebʼ «Li chaqʼal ru yeechiʼom choʼq re li kutan chalk re».