Li nimla yalok u li wank Ucrania ut naq yook chi numtaak li kawil saq’e, li hab’ ut li ke, naxb’aanu naq tmaak’aʼoq li tzekemq sa’ chixjunil li Ruuchich’och’. A’in nak’ulmank sa’eb’ li tenamit b’arwi’ wank li neb’a’il ut nach’a’ajko’k chiruheb’ xtawb’al li xtzekemqeb’.

•   «Xb’aan eb’ li nimla yalok u ut naq yook chi jalaak li qasutam, li xtertookil li lus ut jalan chik li ch’a’ajkilal, li ch’och’ ink’a’ chik na’uuchink ut ink’a’ chik natawmank li tzekemq» (António Guterres, secretario general de las Naciones Unidas, 17 re julio 2023).

•   «Saʼ xkʼabʼaʼ naq li tenamit Rusia inkʼaʼ chik naʼokenk saʼ li yakok li nekeʼxbʼaanu chirix li tzekemq, ebʼ li nekeʼxtz’il rix aʼin nekeʼxye naq tterqʼuuq xtzʼaq li tzekemq saʼebʼ li tenamit bʼarwiʼ wank li nebʼaʼil, joʼ saʼ li norte re África ut Oriente Medio» (Atalayar.com, 23 re julio 2023).

 Chaawil li naxye li Santil Hu chirix li xmaakʼaʼil li tzekemq ut chirix li tkʼulmanq saʼeb li kutan chalkebʼ re.

•   Li Jesús ak kixye chaq: «Te’waklije’q chi xkamsinkil rib’eb’ tenamit rik’in jalan chik tenamit, li awab’ej rik’in jalan chik awab’ej, ut taawanje’q we’ej» (Mateo 24:7, Li Santil Hu, Sociedad Bíblica de Guatemala, SBG).

•   Saʼ li hu Apocalipsis, naʼaatinak chirix reetalil li kaahibʼ li yookebʼ chi xik saʼ xbʼeenebʼ li kawaay. Jun rehebʼ aʼan reetalil ebʼ li yalok u ut li nataaqenk re aʼan reetalil li weʼej. Li propesiiy naxye naq twulaq li kutan naq chi bʼisbʼil twanq li tzekemq ut kʼajoʼaq xtertookil. «Ut kiwil jun li kawaay q’eq rix. Ut li jun li wank chirix wank jun li b’isleb’ sa’ ruq’. Ut kiwab’i jun xyaab’ xkux. . . Ut kixye: —Naru xloq’b’al wiib’ liibr li triiw chiru li tojleb’ li re jun kutan ut naru xloq’b’al waqib’ liibr li seb’aad chiru li tojleb’ li re jun kutan» (Apocalipsis 6:5, 6, Li Santil Hu, Wycliffe Bible Translators. Ak’ tz’iib’).

 Ebʼ li propesiiy chirix li weʼej yookebʼ chi tzʼaqlok ru saʼebʼ li qakutan, li Santil Hu naxkʼab’aʼi li qʼehil aʼin «roso’jikeb’ li kutan» (2 Timoteo 3:1, SBG). Wi taawaj xnawbʼal xkomon chirix li roso’jikebʼ li kutan ut li yookebʼ chi xik saʼ xbʼeen li kawaay, chaawil li bʼideo Chalen li chihabʼ 1914 kijalaak xwanjik li Ruuchichʼochʼ ut li tzolom «Kʼaru xyaalal li kaahibʼ li wankebʼ saʼ xbʼeen li kawaay li naʼaatinak wiʼ li hu Apocalipsis?».

•   Li Santil Hu naxye qe kʼaru tooruuq xbʼaanunkil re xnumsinkil li chʼaʼajkilal joʼ li weʼej ut naq naterqʼuuk chixjunil. Naru taawil jun junq li naʼlebʼ saʼ li tzolom «Kʼaru taabʼaanu re xkubʼsinkil laasachomq».

•   Li Santil Hu naxkʼe qoybʼenihom naq naxye naq tchaabʼiloʼq chixjunil. Naxye naq twulaq li kutan naq «numtajenaqaq li awimq sa’ ruuchich’och’» ut maakʼaʼaq chik li weʼej (Salmo 72:16, SBG). Re xnawbʼal xkomon chirix li chaabʼil oybʼenihom aʼin ut kʼaʼut chʼolchʼooq chaawu naq tkʼulman, chaawil li tzolom «Li chaqʼal ru yeechiʼom choʼq re li kutan chalk re».