Naq kiwank saʼ Ruuchichʼochʼ, li Jesus kixjultika li taql: «Chawoxloqʼi laanaʼ laayuwaʼ» (Ex 20:12; Mt 15:4). Moko kixkʼoxla ta chi xyeebʼal xbʼaan naq aʼan junelik kiʼabʼink chiru li xnaʼ xyuwaʼ naq saaj chaq (Lu 2:51). Naq ak xtzʼaqlok xchihabʼ, li Jesus kixkʼe xchʼool re naq maakʼaʼ tpaltoʼq re li xnaʼ naq aʼan tkamq (Jn 19:26, 27).

Saʼebʼ li qakutan, ebʼ laj paabʼanel li toj saajebʼ tento ajwiʼ teʼxkʼutbʼesi naq oxloqʼ li xnaʼ xyuwaʼ chiruhebʼ naq teʼabʼinq ut teʼaatinaq rikʼinebʼ saʼ tuulanil. Relik chi yaal, li taql chirix roxloqʼinkil li qanaʼ qayuwaʼ moko naraqeʼk ta. Usta ak xeʼtiix, tento tqoxloqʼihebʼ rikʼin rabʼinkil li chaabʼil naʼlebʼ li nekeʼxkʼe qe (Pr 23:22). Jun chik li naʼlebʼ re roxloqʼinkil li qanaʼ qayuwaʼ naq ak xeʼtiix aʼan xraabʼalebʼ ut xtenqʼankilebʼ rikʼin tumin naq t-ajmanq (1Ti 5:8). Maakʼaʼ naxye ma saajo malaj nimo, jun rehebʼ li chaabʼil naʼlebʼ re roxloqʼinkil qanaʼ qayuwaʼ aʼan raatinankilebʼ chi rajlal.

NAQ AK XʼILMANK LI JUCHʼBʼIL EETALIL CHANRU TAT-AATINAQ RIKʼIN LAANAʼ LAAYUWAʼ?, TAASUME EBʼ LI PATZʼOM:

• Kʼaʼut wank sut nachʼaʼajkoʼk chaawu aatinak rikʼin laanaʼ laayuwaʼ?

• Chanru taawoxloqʼi laanaʼ laayuwaʼ naq tat-aatinaq rikʼinebʼ?

• Kʼaʼut wank xwankil naq taakʼe aaqʼe re aatinak rikʼin laanaʼ laayuwaʼ? (Pr 15:22).