Laj Jeremias kitaqlaak chi xyeebʼal rehebʼ laj Judiiy naq teʼsacheʼq xbʼaan naq xeʼxkanabʼ chirix xchʼool li Jehobʼa, li xyosebʼ (Jer 13:25). Chanru kixtaw li tenamit li chʼaʼajkilal aʼin saʼ li xpaabʼal? Ebʼ li junkabʼal re li tenamit Israel inkʼaʼ chik keʼxkʼe xchʼool chi wank choʼq ramiiw li Jehobʼa. Joʼ naʼilmank, li xjolomil ebʼ li junkabʼal moko yookebʼ ta xpaabʼankil li xchaqʼrabʼ li Yos li wank saʼ Deuteronomio 6:5-7.

Saʼebʼ li qakutan, naq ebʼ li junkabʼal kawebʼ xpaabʼal nekeʼtenqʼank re naq us wanq li xchʼuut li Yos. Li xjolomil ebʼ li junkabʼal naru nekeʼxtenqʼa li xjunkabʼal re naq teʼxjultika li Jehobʼa wi rajlal xamaan nekeʼxchʼutubʼ ribʼ chi xloqʼoninkil li Yos (Sl 22:27). Naq ak xʼilmank li bʼideo Estas palabras tienen que estar en tu corazón: Entrevistas a familias, teesume ebʼ li patzʼom aʼin:

• Chanru keʼelk chi ubʼej ebʼ li junkabʼal naq kichʼaʼajkoʼk chiruhebʼ xchʼutubʼankil ribʼebʼ chi xloqʼoninkil li Yos?

• Kʼaru li osobʼtesink nekeʼxkʼul saʼ xkʼabʼaʼ naq rajlal xamaan nekeʼxchʼutubʼ ribʼ joʼ junkabʼal chi xloqʼoninkil li Yos?

• Naq nokoochʼutlaak joʼ junkabʼal chi xloqʼoninkil li Yos, kʼaru li chʼaʼajkilal nintaw, ut kʼaru ninkʼoxla xbʼaanunkil re naq tooruuq chi elk chiʼus?