Xyeebʼal naabʼal li aatin. Maakʼoxla naq laaʼat taachʼolobʼ chixjunil. Li Jesus kixbʼaanu ebʼ li patzʼom re xtenqʼankilebʼ li poyanam chi xtawbʼal ru li yookebʼ rabʼinkil (Mt 17:24-27). Ebʼ li patzʼom natenqʼank re naq sahaq xtzolbʼal li Santil Hu ut nakʼanjelak ajwiʼ chi xnawbʼal kʼaru naxpaabʼ laatzolom ut ma naxtaw ru li yook xtzolbʼal (be-S perel 253, raqal 3, 4). Naq taabʼaanu jun li patzʼom, oybʼeni naq laatzolom tsumenq. Wi inkʼaʼ naxnaw xsumenkil, maaye re; taabʼaanu bʼan jalan chik ebʼ li patzʼom re xtenqʼankil chi xtawbʼal li xsumenkil (be-S perel 238, raqal 1, 2). Maachʼolobʼ saʼ junpaat re naq laatzolom tixtaw ru li akʼ naʼlebʼ (be-S perel 230, raqal 4).

Inkʼaʼ chʼaʼajkaq xchʼolobʼankil. Maaye chixjunil li nakaanaw chirix li naʼlebʼ (Jn 16:12). Kaʼajwiʼ taachʼolobʼ rusilal li raqal (be-S perel 226, raqal 4–perel 227, raqal 1). Wi naabʼal xtzʼaqobʼ li naʼlebʼ taakʼe, usta jwal chaabʼil, inkʼaʼ tnawmanq bʼar wank rusilal (be-S perel 235, raqal 3). Wi ak xtaw ru, numen saʼ li jun chik raqal.

Inkʼaʼ kaʼajwiʼ taakʼut li naʼlebʼ. Naqaj wulak saʼ xchʼoolebʼ ut inkʼaʼ kaʼajwiʼ xyaabʼasinkil ebʼ li raqal (Lu 24:32). Oksi chiʼus li Raatin li Yos rikʼin xkʼutbʼal ebʼ li raqal li Santil Hu li naxchap ribʼ rikʼin li tzolom (2Co 10:4; Heb 4:12; be-S perel 144, raqal 1-3). Taawoksi li eetalil li inkʼaʼ chʼaʼaj xtawbʼal ru (be-S perel 245, raqal 2-4). Wanq saʼ laachʼool li kʼaru nachʼaʼajkoʼk chiru laatzolom ut li kʼaru naxpaabʼ, ut aʼan taawoksi re xtenqʼankil naq yooqat xtzolbʼal. Taabʼaanu ebʼ li patzʼom joʼ aʼin: «Kʼaru nakaakʼoxla chirix li xaatzol anaqwan? Kʼaru naxkʼut aʼin chirix li Jehobʼa? Chanru nakaakʼoxla naq tatxtenqʼa xyuʼaminkil li naʼlebʼ aʼin?» (be-S perel 238, raqal 3-5; perel 259, raqal 1).