1 Corintios 10:1-33
-
Li xeʼxkʼul chaq ebʼ laj Israel nokooxtenqʼa re naq inkʼaʼ tqakʼam qe rikʼinebʼ (1-13)
-
Kixye rehebʼ naq weent teʼxbʼaanu rikʼinebʼ li pechʼbʼil yos (14-22)
-
Li xmeex li Jehobʼa ut li xmeex ebʼ li maaʼus aj musiqʼej (21)
-
-
Li junjunq naru naxbʼaanu li naraj abʼan tixsikʼ li us choʼq rehebʼ li junchʼol (23-33)
-
«Bʼaanumaq chixjunil re xkʼebʼal xloqʼal li Yos» (31)
-
10 Joʼkan bʼiʼ, ex wechpaabʼanel, nawaj naq teenaw naq chixjunilebʼ li qaxeʼtoon xeʼbʼeek rubʼel choql ut chixjunilebʼ xeʼxtoq ru li palaw,
2 chixjunilebʼ xeʼkubʼsiik xhaʼ joʼebʼ li nekeʼtaqenk re laj Moisés saʼ xkʼabʼaʼ li choql ut li palaw,
3 chixjunilebʼ xeʼxwaʼ li tzekemq li kixkʼe li Yos
4 ut chixjunilebʼ xeʼrukʼ li haʼ li kixkʼe li Yos. Ebʼ aʼan rajlal nekeʼrukʼ chaq li haʼ li naʼelk saʼ li pek li kixkʼe chaq li Yos. Li pek aʼin chanchan tawiʼ yook xtaqenkilebʼ. Ut li pek aʼin reetalil li Kriist.
5 Abʼanan, li xkʼihalil ebʼ li qas qiitzʼin inkʼaʼ xeʼxsahobʼresi xchʼool li Yos. Joʼkan naq xeʼkamk saʼ li chaqichʼochʼ.
6 Joʼkan bʼiʼ, chixjunil aʼin nakʼanjelak chiqu re naq inkʼaʼ tqarahi ru li inkʼaʼ us joʼ xeʼxbʼaanu aʼanebʼ.
7 Chi moko tqaloqʼoni ebʼ li pechʼbʼil yos joʼ xeʼxbʼaanu wiibʼ oxibʼ rehebʼ aʼan, joʼ chanru tzʼiibʼanbʼil: «Li tenamit kichunlaak chi waʼak ut chi ukʼaʼk ut chirix chik aʼan xeʼwakliik chi xsahobʼresinkilebʼ xchʼool».
8 Chi moko tqayuʼami li muxuk ibʼ* joʼ xeʼxbʼaanu wiibʼ oxibʼ rehebʼ aʼan naq xeʼxmux ribʼ,* joʼkan naq chiru jun kutan 23,000 xeʼkamk.
9 Chi moko tqayal rix li Jehobʼa* joʼ xeʼxbʼaanu wiibʼ oxibʼ rehebʼ aʼan naq xeʼxyal rix ut chirix chik aʼan xeʼkamk xbʼaan ebʼ li kʼantiʼ.
10 Chi moko toowechʼoq joʼ xeʼxbʼaanu wiibʼ oxibʼ rehebʼ aʼan naq xeʼwechʼok, ut chirix chik aʼan xeʼkamk xbʼaan li ánjel li nasachok.
11 Chixjunil li xeʼxkʼul chaq nakʼanjelak joʼ eetalil ut kitzʼiibʼamank choʼq qe li wanko saʼ xraqik li ruuchichʼochʼ* re naq inkʼaʼ tqakʼam qe rikʼinebʼ.
12 Joʼkan bʼiʼ, li naxkʼoxla naq xaqxo chiʼus, weent tixbʼaanu, mitʼaneʼk.
13 Chixjunil li aaleek li nekeekʼul laaʼex, ak xkʼulumebʼ chixjunilebʼ li qas qiitzʼin. Abʼan li Yos naxbʼaanu li naxye ut inkʼaʼ tixkanabʼ naq texʼaaleeq wi inkʼaʼ texruuq xkuybʼal. Ut naq texʼaaleeq, li Yos tixsikʼ xyaalal re naq texruuq xkuybʼal.
14 Joʼkan bʼiʼ, ex wechpaabʼanel li raarokex inbʼaan, meeloqʼoni ebʼ li pechʼbʼil yos.
15 Ninʼaatinak eerikʼin joʼebʼ li qas qiitzʼin li wankebʼ xnaʼlebʼ. Laaʼex teeye ma us malaj inkʼaʼ us li ninye.
16 Ma inkʼaʼ nokootzʼaqonk chirix li xkikʼel li Kriist rikʼin li ukʼlebʼ sekʼ re osobʼtesink li nokooʼosobʼtesink wiʼ? Ma inkʼaʼ nokootzʼaqonk chirix li xtibʼel li Kriist rikʼin li kaxlanwa li naqajachi?
17 Jun ajwiʼ li kaxlanwa, usta naabʼalo, juno chi tibʼelej xbʼaan naq chiqajunilo yooko xwaʼbʼal li kaxlanwa aʼin.
18 Kʼehomaq reetal li naxbʼaanu li tenamit Israel. Naq nekeʼxtzeka li mayejanbʼil xul, ma inkʼaʼ tabʼiʼ nekeʼxwotz li nayeechiʼimank saʼ xnaʼaj li mayej?*
19 Joʼkan naq, kʼaru nawaj xyeebʼal chirix aʼin? Ma wank xwankil li mayejanbʼil xul li nakʼemank chiru li pechʼbʼil yos? Malaj wank xwankil li pechʼbʼil yos?
20 Inkʼaʼ. Li nawaj xyeebʼal aʼan naq li mayejanbʼil xul li nekeʼxmayeja ebʼ li tenamit nekeʼxmayeja chiruhebʼ li maaʼus aj musiqʼej ut maawaʼ chiru li Yos. Ut laaʼin inkʼaʼ nawaj naq textzʼaqonq chirixebʼ li maaʼus aj musiqʼej.
21 Moko naru ta naq yooqex chi ukʼak saʼ xʼukʼlebʼ sekʼ li Jehobʼa* ut yooqex ajwiʼ chi ukʼak saʼ xʼukʼlebʼ sekʼ ebʼ li maaʼus aj musiqʼej. Chi moko naru naq yooqex chi tzʼaqonk saʼ «xmeex li Jehobʼa»* ut yooqex ajwiʼ chi tzʼaqonq saʼ xmeex ebʼ li maaʼus aj musiqʼej.
22 Malaj “yooko xchiqʼbʼal xjosqʼil li Jehobʼa”?* Peʼyaal naq laaʼo moko qʼaxal kawo ta re xkuybʼal li xjosqʼil?
23 Chixjunil naruhank xbʼaanunkil abʼan moko chixjunil ta chaabʼil. Chixjunil naruhank xbʼaanunkil abʼan moko chixjunil ta nawaklesink chʼool.
24 Maaʼani chixsikʼ li us kaʼajwiʼ choʼq re xjunes, chixsikʼaq bʼan li us choʼq rehebʼ li junchʼol.
25 Waʼomaq chixjunil li wank saʼ li kʼayibʼaal tibʼ, wi xeekʼubʼ saʼ eechʼool naq teewaʼ li tibʼ, leechʼool* inkʼaʼ raj texchʼiʼchʼiʼi,
26 xbʼaan naq «re li Jehobʼa* li ruuchichʼochʼ ut chixjunil li wank chisaʼ».
27 Wi junaq li qas qiitzʼin li maawaʼ aj paabʼanel nekexbʼoq chi waʼak ut laaʼex nekeeraj xik, waʼomaq chixjunil li tkʼemanq eere, ut wi ak xeekʼubʼ saʼ leechʼool naq teewaʼ, leechʼool* inkʼaʼ raj texchʼiʼchʼiʼi.
28 Abʼan wi junaq li qas qiitzʼin naxye eere «Li tibʼ aʼin kiyeechiʼimank joʼ mayejanbʼil xul chiru jun li pechʼbʼil yos», meewaʼ re naq inkʼaʼ teekʼe chi tichkʼok li xyeehok eere ut chi joʼkan maaʼani tchʼiʼchʼiʼiiq xbʼaan li xchʼool.*
29 Moko yookin ta chi aatinak chirix laachʼool,* yookin bʼan chi aatinak chirix li xchʼool* li jun chik qas qiitzʼin. Joʼkan ajwiʼ, usta laaʼin yaal we li tinbʼaanu, inkʼaʼ nawaj xbʼaanunkil aʼin re naq li xchʼool* junaq li qas qiitzʼin inkʼaʼ tinxqʼabʼa.
30 Joʼkan bʼiʼ, wi ninbʼanyoxi re li Yos li tzekemq ut wank inkʼulubʼ chi xwaʼbʼal, kʼaʼut tento tinwaʼ wi aʼin tixbʼaanu naq ebʼ li junchʼol teʼxwechʼ wix?
31 Joʼkan naq, maakʼaʼ naxye ma yookex chi waʼak, chi ukʼak malaj xbʼaanunkil junaq chik li naʼlebʼ, bʼaanumaq chixjunil re xkʼebʼal xloqʼal li Yos.
32 Meekʼehebʼ chi tichkʼok ebʼ laj judiiy, ebʼ laj griego ut li wankebʼ saʼ xchʼuut li Yos,
33 joʼ chanru ninyal xsahobʼresinkil xchʼool chixjunilebʼ saʼ chixjunil li ninbʼaanu naq inkʼaʼ ninsikʼ li us kaʼajwiʼ choʼq we injunes, ninsikʼ bʼan li us choʼq re naabʼalebʼ li qas qiitzʼin re naq teʼruuq chi koleʼk.
Xtzʼaqobʼ ebʼ li naʼlebʼ
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, ruuchichʼochʼ.
^ Malaj «li altar». Taawil xchʼolobʼankil li aatin, xnaʼaj li mayej.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, chʼool.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, chʼool.
^ Taawil xchʼolobʼankil li aatin, chʼool.
^ Taawil xchʼolobʼankil li aatin, chʼool.
^ Taawil xchʼolobʼankil li aatin, chʼool.
^ Taawil xchʼolobʼankil li aatin, chʼool.
