1 Corintios 13:1-13
-
Qʼaxal us wiʼ chik xraabʼalebʼ li junchʼol (1-13)
13 Usta ninʼaatinak saʼ raatinobʼaalebʼ li qas qiitzʼin ut saʼ raatinobʼaalebʼ li ánjel abʼan inkʼaʼ ninrahok, chanchanin li kampaan li kaw xyaabʼ malaj li chʼiichʼ li kaw naʼekʼank.
2 Wi wank wikʼin li maatan re aatinak joʼ propeet ut xtawbʼal ru li muqmukil naʼlebʼ li nachalk rikʼin li Yos abʼan inkʼaʼ ninrahok, maakʼaʼ ninʼok wiʼ. Ut wi ninnaw chixjunil li tento xnawbʼal ut wank wikʼin li paabʼal re rekʼasinkil ebʼ li tzuul abʼan inkʼaʼ ninrahok, maakʼaʼ ninʼok wiʼ.
3 Usta ninkʼe chixjunil li wank we re xchʼolaninkilebʼ li junchʼol malaj ninqʼaxtesi lintibʼel re xnimankil wibʼ, abʼan inkʼaʼ ninrahok, maakʼaʼ naʼok wiʼ chixjunil aʼin.
4 Li qas qiitzʼin li narahok wank xkuyum ut tuulan. Inkʼaʼ nakaqalink, inkʼaʼ naxkʼe xwankil, inkʼaʼ naxqʼetqʼeti ribʼ,
5 inkʼaʼ naxbʼaanu li inkʼaʼ us, inkʼaʼ naxsikʼ li us kaʼajwiʼ choʼq re xjunes. Inkʼaʼ napoʼk saʼ junpaat. Inkʼaʼ naxxok saʼ xchʼool li nabʼaanuuk re.
6 Inkʼaʼ nasahoʼk saʼ xchʼool xbʼaan li inkʼaʼ us, nasahoʼk bʼan saʼ xchʼool rikʼin li yaal.
7 Junelik wank aran maakʼaʼ naxye kʼaru tkʼulmanq, chixjunil naxpaabʼ, chixjunil naroybʼeni, chixjunil naxkuy.
8 Li rahok maajunwa naʼosoʼk. Abʼan, ebʼ li maatan re aatinak joʼ propeet, tsachmanq. Ebʼ li maatan re aatinak saʼ jalan jalanq chi aatinobʼaal, traqeʼq. Ebʼ li maatan chirix li nawom, tsachmanq.
9 Usta wank qanawom inkʼaʼ naqanaw chixjunil. Usta nokooʼaatinak joʼ propeet, inkʼaʼ naqabʼaanu chi tzʼaqal re ru.
10 Abʼan, naq tzʼaqalaq re ru li qanawom ut tooʼaatinaq joʼ propeet chi tzʼaqal re ru, tsachmanq li moko tzʼaqal ta re ru.
11 Naq kachʼinin chaq ninʼaatinak joʼebʼ li kokʼal, ninkʼoxlak joʼebʼ li kokʼal ut ninnaʼlebʼak joʼebʼ li kokʼal. Abʼan, anaqwan naq nimin chik, moko ninnaʼlebʼak ta chik joʼebʼ li kokʼal.
12 Xbʼaan naq anaqwan moko saqenk ta nokooʼilok chanchan tawiʼ yooko rilbʼal qibʼ saʼ jun li lem re chʼiichʼ. Abʼan moqon saqenk chik tooʼiloq, chanchan tawiʼ tqil qibʼ chi kutankil. Saʼebʼ li kutan aʼin, moko ninnaw ta chixjunil chirix li Yos, abʼan moqon chik tinnaw chirix chi tzʼaqal re ru, joʼ chanru naq aʼan naxnaw wu chi tzʼaqal re ru.
13 Abʼanan, teʼkanaaq li oxibʼ chi naʼlebʼ aʼin: li paabʼal, li oybʼenihom ut li rahok. Abʼan li qʼaxal nim chiruhebʼ aʼin aʼan li rahok.
