1 Corintios 14:1-40
14 Meekanabʼ xkʼutbʼesinkil li rahok ut meekanabʼ ajwiʼ xkʼebʼal eeqʼe chi xkʼulbʼal li maatan li naxkʼe li Yos, abʼan li tento teekʼe xwankil aʼan li aatinak joʼ propeet.
2 Xbʼaan naq li naʼaatinak saʼ jalan chik aatinobʼaal moko yook ta raatinankilebʼ li winq, yook bʼan raatinankil li Yos xbʼaan naq maaʼani naxtaw ru li naxye, usta saʼ xkʼabʼaʼ li santil musiqʼej naxye li muqmukil naʼlebʼ li nachalk rikʼin li Yos.
3 Abʼanan, li naʼaatinak joʼ propeet nawaklesink chʼool, naxkawresi ut naxkʼojobʼebʼ xchʼool li winq rikʼin li raatin.
4 Li naʼaatinak saʼ jalan chik aatinobʼaal, xjunes naxwaklesi xchʼool, abʼan li naʼaatinak joʼ propeet, naxwaklesi xchʼool li chʼuut.
5 Twulaq raj chiwu naq cheejunilex texʼaatinaq saʼ jalan jalanq chi aatinobʼaal, abʼan li qʼaxal nawaj aʼan naq texʼaatinaq joʼ propeet. Xbʼaan naq li naʼaatinak joʼ propeet nim chiru li naʼaatinak saʼ jalan jalanq chi aatinobʼaal, abʼan li winq aʼin nimaq wi naxjal ru li raatin re xwaklesinkil xchʼool li chʼuut.
6 Ex wechpaabʼanel, ma texintenqʼa wi tinʼoq chi aatinak eerikʼin saʼ jun li aatinobʼaal li inkʼaʼ nekeetaw ru? Tinruuq eetenqʼankil wi tinʼaatinaq chirix li aatin li ninkʼul rikʼin li Yos, li nawom, li propesiiy malaj li kʼutum.
7 Joʼkan ajwiʼ nakʼulmank rikʼin li kʼaʼaq re ru li maakʼaʼ xyuʼam abʼan wank xyaabʼ joʼ li xolbʼ ut li aarp. Chanru nanawmank ma yook chi chʼeʼmank li xolbʼ malaj li aarp wi maakʼaʼ xjalanil li xyaabʼ li junjunq?
8 Abʼan, wi moko saqenk ta naʼabʼimank li xyaabʼ li trompeet, ani tixkawresi ribʼ re xik chi yalok?
9 Joʼkan ajwiʼ, chanru tixtaw ru junaq li qas qiitzʼin li yookex xyeebʼal wi nekeeroksi ebʼ li aatin li chʼaʼaj xtawbʼal ru? Wi joʼkan nekeebʼaanu chanchan tawiʼ yookex chi aatinak saʼ iqʼ.
10 Saʼ chixjunil li ruuchichʼochʼ ebʼ li qas qiitzʼin nekeʼaatinak saʼ naabʼal chi aatinobʼaal, ut chixjunil ebʼ li aatinobʼaal aʼin wank xyaalal.
11 Abʼan wi inkʼaʼ nintaw ru xyaalal li yook chi yeemank, chanchanaqin li jalan xtenamit chiru li qas qiitzʼin li yook chi aatinak ut li qas qiitzʼin li yook chi aatinak chanchanaq li jalan xtenamit choʼq we.
12 Joʼkan ajwiʼ nakʼulmank eerikʼin. Saʼ xkʼabʼaʼ naq qʼaxal nekeeraj xtawbʼal li maatan li nachalk saʼ xkʼabʼaʼ li santil musiqʼej, kʼehomaq eeqʼe chi xtawbʼal naabʼal li maatan li naxwaklesi xchʼool li chʼuut.
13 Joʼkan bʼiʼ, li naʼaatinak saʼ jalan chik aatinobʼaal tento ttijoq re naq truuq xjalbʼal ru li yook xyeebʼal.
14 Xbʼaan naq, wi nintijok saʼ jalan chik aatinobʼaal moko laaʼin ta yookin chi tijok aʼan bʼan li maatan li nachalk saʼ xkʼabʼaʼ li santil musiqʼej abʼan linkʼaʼuxl moko yook ta chi kʼanjelak.
15 Kʼaru tento xbʼaanunkil chi joʼkanan? Tintijoq rikʼin li maatan li nachalk saʼ xkʼabʼaʼ li santil musiqʼej, abʼan tintijoq ajwiʼ saʼ li aatinobʼaal li nintaw ru. Tinbʼichanq rikʼin li maatan li nachalk rikʼin li santil musiqʼej, tinbʼichanq ajwiʼ saʼ li aatinobʼaal li nintaw ru.
16 Xbʼaan naq, wi nakaanima ru li Yos rikʼin li maatan li nachalk saʼ xkʼabʼaʼ li santil musiqʼej, chanru tixye «Joʼkan taxaq» li qas qiitzʼin li wank aawikʼin naq yooqat chi tijok re bʼanyoxink wi inkʼaʼ naxnaw li yookat xyeebʼal?
17 Yaal naq joʼ chanru yookat chi bʼanyoxink qʼaxal chaabʼil, abʼan li qas qiitzʼin aʼin moko yook ta chi waklesiik xchʼool.
18 Ninbʼanyoxi re li Yos xbʼaan naq ninʼaatinak saʼ naabʼal chik li aatinobʼaal cheeru laaʼex.
19 Abʼan qʼaxal twulaq raj chiwu roksinkil saʼ li chʼuut oobʼ li aatin li nintaw ru re xtzolbʼalebʼ li junchʼol chiru naq twoksi lajeebʼ mil chi aatin saʼ jalan chik aatinobʼaal.
20 Ex wechpaabʼanel, mexkʼoxlak joʼebʼ li kokʼal. Kʼuulaʼalaqex bʼan chiru li maaʼusilal ut kʼoxlanqex joʼebʼ li ak nimebʼ chik.
21 Saʼ li Chaqʼrabʼ tzʼiibʼanbʼil: «“Twaatina li tenamit aʼin saʼ raatinobʼaalebʼ li jalanebʼ xtenamit ut chi xtzʼuumal rehebʼ li inkʼaʼ nekeʼxnaw ru, usta joʼkan inkʼaʼ teʼabʼinq chiwu”, chan li Jehobʼa».*
22 Joʼkan naq ebʼ li aatinobʼaal maawaʼ jun li eetalil choʼq rehebʼ li nekeʼpaabʼank, rehebʼ bʼan li inkʼaʼ nekeʼpaabʼank, abʼanan ebʼ li propesiiy moko rehebʼ ta li inkʼaʼ nekeʼpaabʼank rehebʼ bʼan li nekeʼpaabʼank.
23 Joʼkan naq wi chixjunil li chʼuut nekeʼxchʼutubʼ ribʼ saʼ jun chi naʼaj ut chixjunilebʼ nekeʼaatinak saʼ jalan jalanq chi aatinobʼaal, ut naq teʼoq chaq ebʼ li qas qiitzʼin li moko tzolbʼilebʼ ta malaj ebʼ li maawaʼebʼ aj paabʼanel, ma inkʼaʼ tabʼiʼ teʼxye naq kaan eeru?
24 Abʼan, wi cheejunilex yookex chi aatinak joʼ propeet ut naʼok chaq jun li maawaʼ aj paabʼanel malaj junaq chik li qas qiitzʼin li moko tzolbʼil ta, aʼan trekʼa naq yook chi qʼuseʼk ut chi tzʼileʼk rix xbʼaan chixjunilebʼ.
25 Saʼ xkʼabʼaʼ naq t-elq chi kutankil li wank saʼ xchʼool, tixkʼutzubʼ ribʼ chiru chʼochʼ, tixkʼe xloqʼal li Yos ut tixye: «Relik chi yaal naq li Yos wank saʼ eeyanq».
26 Joʼkan bʼiʼ ex wechpaabʼanel, naq nekeechʼutubʼ eeribʼ aʼin nakʼulmank: jun eere nabʼichank re xnimankil ru li Yos, li jun chik nakʼutuk, li jun chik naxye ebʼ li aatin li naxkʼul rikʼin li Yos, li jun chik naʼaatinak saʼ jalan jalanq chi aatinobʼaal, ut li jun chik najalok ru aatinobʼaal. Bʼaanumaq chixjunil re xwaklesinkil eechʼool cheeribʼil eeribʼ.
27 Ut wi wankebʼ nekeʼaatinak saʼ jalan chik aatinobʼaal, tento naq wiibʼ malaj oxibʼ ajwiʼ teʼaatinaq. Abʼan, xbʼeenwa t-aatinaq jun, chirix chik aʼan, t-aatinaq li jun chik. Ut jun li qas qiitzʼin tixjal ru li yook chi yeemank.
28 Abʼan, wi maakʼaʼ junaq li qas qiitzʼin li tixjal ru li yookebʼ xyeebʼal, ebʼ li qas qiitzʼin aʼin inkʼaʼ teʼaatinaq saʼ li chʼuut, teʼaatinaq bʼan saʼebʼ li xchʼool ut rikʼin li Yos.
29 Teʼaatinaq wiibʼ malaj oxibʼ li propeet ut ebʼ li junchʼol teʼxkʼe xchʼool chi xtawbʼal ru li xyaalal.
30 Abʼan wi junaq chik li qas qiitzʼin li chunchu aran naxkʼul li aatin li naxkʼe li Yos, chixkanabʼaq aatinak li yook chi aatinak saʼ li hoonal aʼan re naq li jun chik t-oq chi aatinak.
31 Cheejunilex naru nekexʼaatinak joʼ propeet, abʼan xbʼeenwa t-aatinaq jun, chirix chik aʼan t-aatinaq li jun chik. Ut chi joʼkan, chixjunilebʼ teʼxtaw xnaʼlebʼ ut teʼwaklesiiq xchʼool.
32 Ut ebʼ li propeet tento teʼril chiʼus chanru yookebʼ roksinkil li maatan li nachalk saʼ xkʼabʼaʼ li santil musiqʼej.
33 Li Yos aʼan Xyosil li tuqtuukilal, ut chixjunil naxbʼaanu chi tustu ru.
Joʼkan ajwiʼ nakʼulmank saʼ chixjunil li chʼuut bʼarwiʼ wankebʼ li santil paabʼanel,
34 ebʼ li ixq meʼaatinak saʼ li chʼuut xbʼaan naq moko kanabʼanbʼilebʼ ta chi aatinak. Tento bʼan teʼabʼinq joʼ naxye ajwiʼ li Chaqʼrabʼ.
35 Wi nekeʼraj xtzolbʼal junaq li naʼlebʼ, cheʼpatzʼoq saʼ ochoch rehebʼ li xbʼeelom xbʼaan naq xutaanal naq li ixq t-aatinaq saʼ li chʼuut.
36 Ma eerikʼin tabʼiʼ chalenaq li raatin li Yos? Ma kaʼajwiʼ laaʼex xexkʼuluk re?
37 Wi junaq li qas qiitzʼin naxkʼoxla naq propeet malaj wank rikʼin li maatan li nachalk saʼ xkʼabʼaʼ li santil musiqʼej, tento tixkʼe reetal naq li xintzʼiibʼa eere aʼan xtaql li Qaawaʼ.
38 Abʼan, wi junaq li qas qiitzʼin inkʼaʼ naxkʼe saʼ ajl aʼin, inkʼaʼ ajwiʼ tkʼeheʼq saʼ ajl* aʼan.
39 Joʼkan bʼiʼ ex wechpaabʼanel, meekanabʼ xkʼebʼal eechʼool chi aatinak joʼ propeet ut meeram chiruhebʼ li junchʼol naq teʼaatinaq saʼ jalan jalanq chi aatinobʼaal.
40 Abʼan bʼaanumaq chixjunil chi chaabʼil ut chi tustu ru.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
^ Maare «wi junaq li qas qiitzʼin maakʼaʼ xnaʼlebʼ joʼkan tkanaaq».
