1 Corintios 15:1-58
-
Li Kriist kiwaklesiik chi yoʼyo (1-11)
-
Li wakliik chi yoʼyo aʼan xxeʼil li paabʼank (12-19)
-
Yaal naq twanq li wakliik chi yoʼyo xbʼaan naq li Kriist ak xwaklesiik chi yoʼyo (20-34)
-
Nekeʼkamk saʼ tibʼelej ut nekeʼwaklesiik chi yoʼyo saʼ musiqʼej (35-49)
-
Inkʼaʼ nakamk chi moko naqʼaak (50-57)
-
Meekanabʼ kʼanjelak chiru li Qaawaʼ (58)
15 Ex wechpaabʼanel, anaqwan nawaj xjultikankil eere li chaabʼil esil li xinkʼe cheenaw, li xeekʼulubʼa ut li xeekʼojobʼ wiʼ eechʼool.
2 Texruuq ajwiʼ chi koleʼk saʼ xkʼabʼaʼ li chaabʼil esil li xinkʼe cheenaw wi nekeechap eeribʼ chi kaw rikʼin. Abʼan, wi inkʼaʼ nekeebʼaanu, maakʼaʼ ajʼe naq xexʼok chi paabʼank.
3 Xbʼaan naq saʼ xyanq li xbʼeen naʼlebʼ li xinkʼe cheenaw wank ajwiʼ li xinkʼul laaʼin: naq li Kriist kikamk saʼ xkʼabʼaʼ li qamaak joʼ naxye li Raatin li Yos;
4 naq kimuqeʼk ut kiwaklesiik chi yoʼyo saʼ rox kutan, joʼ naxye li Raatin li Yos
5 ut naq kixkʼut ribʼ chiru laj Cefas* ut chirix chik aʼan chiru li Kabʼlaju.
6 Moqon chik kixkʼut ribʼ chiru numenaq oobʼ siʼeent li qechpaabʼanel, li xkʼihalil toj wankebʼ qikʼin anaqwan, usta wankebʼ kamenaqebʼ chik.
7 Chirix chik aʼan, kixkʼut ribʼ chiru laj Santiago; moqon chik, chiru chixjunilebʼ li apóstol.
8 Tojaʼ naq kixkʼut ribʼ chiwu, laaʼin, li chanchanin li kʼuulaʼal li xyoʼlaak naq toj maajiʼ xqʼehil.
9 Xbʼaan naq laaʼin li kachʼin saʼ xyanqebʼ li apóstol, ut moko inkʼulubʼ ta naq tinkʼabʼaʼiiq joʼ apóstol xbʼaan naq xinrahobʼtesi li wankebʼ saʼ xchʼuut li Yos.
10 Abʼan saʼ xkʼabʼaʼ li xnimal rusilal li Yos, laaʼin apóstol. Ut moko maakʼaʼ ta ajʼe naq li Yos kixkʼutbʼesi chiwu li xnimal rusilal xbʼaan naq naabʼal wiʼ chik li kʼanjel xinbʼaanu laaʼin chiru li kʼanjel li xeʼxbʼaanu aʼanebʼ. Abʼan, moko laaʼin ta xinbʼaanunk re, li xnimal bʼan rusilal li Yos li wank wikʼin xbʼaanunk re.
11 Maakʼaʼ naxye ma laaʼin malaj aʼanebʼ, chi joʼkaʼin xqakʼe chi naweʼk li chaabʼil esil ut chi joʼkaʼin xexʼok chi paabʼank.
12 Joʼkan bʼiʼ, wi yook chi kʼemank chi naweʼk naq li Kriist kiwaklesiik chi yoʼyo saʼ xyanqebʼ li kamenaq, kʼaʼut wankebʼ nekeʼxye naq moko yaal ta naq ebʼ li kamenaq teʼwaklesiiq chi yoʼyo?
13 Joʼkan ajwiʼ, wi ebʼ li kamenaq inkʼaʼ teʼwaklesiiq chi yoʼyo, li Kriist moko kiwaklesiik ta chi yoʼyo.
14 Abʼan, wi li Kriist inkʼaʼ kiwaklesiik chi yoʼyo, li esil li naqakʼe chi naweʼk ut leepaabʼal maakʼaʼ naʼok wiʼ.
15 Joʼkan ajwiʼ, wi relik chi yaal naq ebʼ li kamenaq inkʼaʼ teʼwaklesiiq chi yoʼyo, li Yos moko kixwaklesi ta ajwiʼ chi yoʼyo li Kriist, aʼin naraj xyeebʼal naq yooko chi tikʼtiʼik chirix li Yos naq naqaye naq aʼan kixwaklesi chi yoʼyo li Kriist.
16 Xbʼaan naq, wi ebʼ li kamenaq inkʼaʼ teʼwaklesiiq chi yoʼyo, li Kriist ajwiʼ inkʼaʼ kiwaklesiik chi yoʼyo.
17 Joʼkan ajwiʼ, wi li Kriist inkʼaʼ kiwaklesiik chi yoʼyo, leepaabʼal maakʼaʼ naʼok wiʼ. Laaʼex toj wankex saʼ leemaak.
18 Ut li xeʼkamk joʼ aj tqehom re li Kriist xeʼkamk chi junajwa.
19 Wi yooko chi yoʼonink rikʼin li Kriist anaqwan naq yoʼyoko, qʼaxal toqʼobʼaal wiʼ chik qu.
20 Abʼan naqanaw naq li Kriist kiwaklesiik chi yoʼyo saʼ xyanqebʼ li kamenaq. Aʼan kiwaklesiik chi yoʼyo xbʼeenwa chiruhebʼ li ak xeʼkamk joʼ xbʼeen ru li awimq.
21 Xbʼaan naq saʼ xkʼabʼaʼ jun li winq kichalk li kamk, joʼkan ajwiʼ li wakliik chi yoʼyo kichalk saʼ xkʼabʼaʼ jun li winq.
22 Joʼ chanru naq chixjunilebʼ yookebʼ chi kamk saʼ xkʼabʼaʼ laj Adán, joʼkan ajwiʼ chixjunilebʼ teʼxkʼul li yuʼam saʼ xkʼabʼaʼ li Kriist.
23 Abʼan aʼin tkʼulmanq chi tustu ru: xbʼeenwa li Kriist, chirix chik aʼan ebʼ li re li Kriist. Ut ebʼ aʼin teʼwaklesiiq chi yoʼyo naq ak wanq arin.*
24 Naq ak xwulak chik li xraqik, aʼan tixqʼaxtesi li Awabʼejilal saʼ ruqʼ li Xyos ut li Xyuwaʼ. Tkʼulmanq aʼin naq ak xsach chixjunil ebʼ li awabʼejilal ut ebʼ li wankilal.
25 Xbʼaan naq aʼan tento t-awabʼejinq toj reetal naq li Yos tixkʼe rubʼel roq chixjunilebʼ li xikʼ nekeʼilok re.
26 Ut naq ak xeʼsacheʼk ru chixjunilebʼ li xikʼ nekeʼilok, tsachmanq li kamk li xikʼ naʼilok.
27 Li Yos «kixkʼe chixjunil li kʼaʼaq re ru rubʼel roq li Kriist». Abʼan naq li Yos naxye naq chixjunil li kʼaʼaq re ru kixkʼe rubʼel xwankil, chʼolchʼo naq saʼ xyanq chixjunil aʼin moko wank ta li Yos li kikʼehok re li kʼaʼaq re ru rubʼel xwankil.
28 Ut naq chixjunil li kʼaʼaq re ru ak xkʼemank rubʼel xwankil aʼan, li Alalbʼej tixkʼe ajwiʼ ribʼ rubʼel xwankil li kikʼehok re li kʼaʼaq re ru rubʼel xwankil aʼan re naq li Yos aʼanaq chixjunil choʼq re chixjunil.
29 Wi moko joʼkan ta, kʼaru teʼxbʼaanu li nekeʼxkʼul li kubʼihaʼ li nakʼamok saʼ li kamk? Wi ebʼ li kamenaq inkʼaʼ teʼwaklesiiq chi yoʼyo, kʼaʼut aʼanebʼ yookebʼ xkʼulbʼal li kubʼihaʼ aʼin?
30 Kʼaʼut junelik naqakʼe saʼ xiwxiw li qayuʼam?
31 Wulaj wulaj nawil ru li kamk. Relik chi yaal aʼin, ex wechpaabʼanel, joʼ naq nawekʼa xsahil linchʼool cheerix saʼ xkʼabʼaʼ li Kristo Jesús, li Qaawaʼ.
32 Wi laaʼin xinyalok rikʼinebʼ li josqʼ aj xul aran Éfeso, joʼ nekeʼxbʼaanu ebʼ li junchʼol chi winq, kʼaru xintaw chirix aʼin? Wi ebʼ li kamenaq inkʼaʼ chik teʼwaklesiiq chi yoʼyo, «choowaʼaq ut chooʼukʼaq xbʼaan naq wulaj tookamq».
33 Meekʼe eeribʼ chi bʼalaqʼiik. Ebʼ li yibʼ aj amiiw nekeʼxpoʼ li chaabʼil naʼlebʼ li ak yookex xyuʼaminkil.
34 Ajʼooq eeru ut bʼaanuhomaq li us ut meeyuʼami li maak xbʼaan naq wiibʼ oxibʼ eere inkʼaʼ nekeʼxnaw ru li Yos chi tzʼaqal re ru. Ninye eere aʼin re naq texxutaanaq.
35 Abʼanan, wank tyeehoq re: «Chanru teʼwaklesiiq chi yoʼyo ebʼ li kamenaq? Chanruhaq li xtibʼelebʼ?».
36 Kʼajoʼ aamemil! Li nakaawaw inkʼaʼ tyoʼlaaq wi toj maajiʼ nakamk.
37 Ut li nakaawaw maawaʼ li cheʼ li ak xkʼiik chik, li xaawaw aʼan bʼan li iyaj aʼ yaal ma riyajil triiw malaj junaq chik li iyaj,
38 abʼan li Yos naxkʼe chi kʼiik joʼ naraj aʼan, ut li xkʼiijik li junjunq chi iyaj moko junaqik ta.
39 Moko junaqik ta li junjunq chi tibʼelej: wank xtibʼel winq, ebʼ li ketomq, ebʼ li xul li nekeʼrupupik ut ebʼ li kar.
40 Ut ak xtibʼelebʼ li wankebʼ saʼ choxa ut ak xtibʼelebʼ li wankebʼ saʼ ruuchichʼochʼ, abʼan jalan li xloqʼal li wankebʼ saʼ choxa chiru li wankebʼ saʼ ruuchichʼochʼ.
41 Jalan xloqʼal li saqʼe, jalan xloqʼal li po, jalan xloqʼal ebʼ li chahim; joʼkan naq li xloqʼal li junjunq chi chahim jalan chiruhebʼ li junchʼol chi chahim.
42 Joʼkan ajwiʼ nakʼulmank naq ebʼ li kamenaq nekeʼwaklesiik chi yoʼyo. Naq nekeʼkamk, nekeʼqʼaak ut naq nekeʼwaklesiik chi yoʼyo, inkʼaʼ chik nekeʼqʼaak.
43 Naq nekeʼkamk, inkʼaʼ oxloqʼinbʼilebʼ ut naq nekeʼwaklesiik chi yoʼyo, kʼebʼilebʼ xloqʼal. Naq nekeʼkamk, maakʼaʼebʼ xmetzʼew ut naq nekeʼwaklesiik chi yoʼyo, wankebʼ xmetzʼew.
44 Nekeʼkamk saʼ tibʼelej abʼan nekeʼwaklesiik chi yoʼyo saʼ musiqʼej, wi wank li tibʼelej wank ajwiʼ li musiqʼej.
45 Joʼkaʼin tzʼiibʼanbʼil: «Laj Adán, li xbʼeen winq, kiwank xyuʼam saʼ tibʼelej. Li xkabʼil Adán* kiwank xyuʼam saʼ musiqʼej* ut aʼan aj kʼehol yuʼam».
46 Abʼanan, xbʼeenwa nachalk li tibʼelej ut maawaʼ li musiqʼej xbʼaan naq li musiqʼej moko nachalk ta xbʼeenwa.
47 Li xbʼeen winq chalenaq saʼ ruuchichʼochʼ ut yobʼtesinbʼil rikʼin poqs; li xkabʼ winq chalenaq saʼ choxa.
48 Li xeʼyobʼtesiik rikʼin poqs chanchanebʼ li kiyobʼtesiik rikʼin poqs; li wankebʼ saʼ choxa chanchanebʼ li chalenaq saʼ choxa.
49 Ut joʼ chanru naq laaʼo xjalam u li kiyobʼtesiik rikʼin poqs, toowanq ajwiʼ joʼ xjalam u li chalenaq saʼ choxa.
50 Abʼan, ex wechpaabʼanel, ninye eere aʼin: li tibʼelej li wank xbʼaqel inkʼaʼ naru narechani li Xʼawabʼejilal li Yos, chi moko li tibʼelej li naqʼaak naru narechani li tibʼelej li inkʼaʼ naqʼaak.
51 Ilomaq, ninye eere jun li muqmukil naʼlebʼ: moko chiqajunilo ta tookamq, abʼan li Yos tixbʼaanu naq chiqajunilo toojalaaq,
52 saʼ junpaat tkʼulmanq aʼin, saʼ jun mutzʼul u, naq jun aj chik li trompeet t-ekʼanq. Xbʼaan naq li trompeet t-ekʼanq ut ebʼ li kamenaq teʼwaklesiiq chi yoʼyo ut inkʼaʼ chik teʼqʼaaq, ut li Yos tixbʼaanu naq toojalaaq.
53 Xbʼaan naq li tibʼelej aʼin li naqʼaak tjalaaq rikʼin jun chik li tibʼelej li inkʼaʼ naqʼaak ut li tibʼelej aʼin li nakamk tjalaaq rikʼin jun chik li tibʼelej li inkʼaʼ nakamk.
54 Naq li tibʼelej aʼin li naqʼaak tjalaaq rikʼin jun chik li tibʼelej li inkʼaʼ naqʼaak ut naq li tibʼelej aʼin li nakamk tjalaaq rikʼin jun chik li tibʼelej li inkʼaʼ nakamk aran ttzʼaqloq ru li tzʼiibʼanbʼil: «Li kamk t-osoʼq* chi junajwa».
55 «At kamk, bʼar wank laawankil re qʼaxok u? At kamk, bʼar wank laawankil re naq tatrahobʼtesinq?».
56 Li wankil li naxkʼam chaq li kamk aʼan li maak ut li wankil li naxkʼam chaq li maak aʼan li Chaqʼrabʼ.*
57 Abʼan naqabʼanyoxi re li Yos xbʼaan naq aʼan nokooxtenqʼa chi qʼaxok u saʼ xkʼabʼaʼ li Qaawaʼ Jesukriist!
58 Joʼkan bʼiʼ, ex wechpaabʼanel, li raarokex inbʼaan, junelik kaw xaqxoqex, maakʼaʼ chiʼekʼasinq eere ut meekanabʼ kʼanjelak chiru li Qaawaʼ xbʼaan naq li kʼanjel li nekeebʼaanu chiru li Qaawaʼ moko maakʼaʼ ta ajʼe.
Xtzʼaqobʼ ebʼ li naʼlebʼ
^ Pedro ajwiʼ nakʼabʼaʼiik.
^ Li aatin saʼ griego, parousía. Taawil xchʼolobʼankil li aatin, ak wanq arin.
^ Arin yook chi aatinak chirix li Jesús.
^ Li aatin saʼ griego, pnéuma. Taawil xchʼolobʼankil li aatin, musiqʼ.
^ Saʼ griego «tnuqʼeʼq».
^ Malaj «li Chaqʼrabʼ naxkʼe xwankil li maak».
