1 Corintios 3:1-23
3 Joʼkan bʼiʼ, ex wechpaabʼanel, inkʼaʼ xinruuk eeraatinankil joʼebʼ li qas qiitzʼin li bʼeresinbʼilebʼ xbʼaan li santil musiqʼej, xinʼaatinak bʼan eerikʼin joʼebʼ li qas qiitzʼin li nekeʼkʼoxlak joʼ li winq.
2 Xexinchʼolani rikʼin leech ut maawaʼ rikʼin kawil tzekemq xbʼaan naq toj maajiʼ nekeekuy xwaʼbʼal li kawil tzekemq. Joʼkan ajwiʼ anaqwan, toj maajiʼ nekeekuy xwaʼbʼal li kawil tzekemq
3 xbʼaan naq toj nekexkʼoxlak joʼ nekeʼkʼoxlak ebʼ li winq. Saʼ xkʼabʼaʼ naq wank li kaqalink ut li pleetik saʼ eeyanq, aʼin naxkʼutbʼesi naq yookex chi naʼlebʼak joʼ nekeʼnaʼlebʼak ebʼ li qas qiitzʼin re li ruuchichʼochʼ aʼin.
4 Naq jun eere naxye «Laaʼin rehin laj Pablo», ut jalan chik naxye «Laaʼin rehin laj Apolos», ma inkʼaʼ yookex chi naʼlebʼak joʼ nekeʼnaʼlebʼak ebʼ li winq?
5 Ani laj Apolos? Ani laj Pablo? Ebʼ li winq aʼin yal ebʼ aj kʼanjel li xeʼtenqʼank eere re naq texʼoq chi paabʼank. Xeʼxbʼaanu li kʼanjel joʼ chanru xkʼemank re li junjunq xbʼaan li Qaawaʼ.
6 Laaʼin xinʼawok, laj Apolos kitʼaqresink abʼan li Yos kikʼehok re chi kʼiik,
7 joʼkan naq chi moko li kiʼawok chi moko li kitʼaqresink nanimaak ru, kaʼajwiʼ li Yos li nakʼehok re chi kʼiik.
8 Joʼkan bʼiʼ, li naʼawok ut li natʼaqresink nekeʼkʼanjelak saʼ junajil abʼan li junjunq tixkʼul li xqʼajkamunkil aʼ yaal chanru xkʼanjelak.
9 Xbʼaan naq rechkʼanjelo li Yos. Laaʼex li xchʼochʼ li Yos li yook xkʼanjelankil ru, aʼin li ochoch li yook xkabʼlankil li Yos.
10 Saʼ xkʼabʼaʼ li xnimal rusilal li Yos li xkʼutbʼesi chiwu, laaʼin xinkʼe li rubʼelankil joʼ naxbʼaanu li najolomink re li kabʼlak, abʼan jalan chik yook chi kabʼlak saʼ xbʼeen li rubʼelankil. Li junjunq chixkʼehaq reetal chanru yook chi kabʼlak saʼ xbʼeen aʼan.
11 Xbʼaan naq maaʼani naru naxkʼe junaq chik li rubʼelankil chiru li ak wank aʼ li Jesukriist.
12 Joʼkan bʼiʼ, jun li qas qiitzʼin naru nakabʼlak saʼ xbʼeen li rubʼelankil rikʼin oor, plaat ut chʼinaʼusil pek malaj rikʼin tzʼalamcheʼ, chaqi pim ut kʼim.
13 Naq twulaq xkutankil t-ilmanq chanru xkʼanjelak li junjunq. Rikʼin xaml t-ilmanq ma us malaj inkʼaʼ us li xkʼanjel.
14 Wi maakʼaʼ naxkʼul li kixkabʼla jun li qas qiitzʼin saʼ xbʼeen li rubʼelankil, tixkʼul xqʼajkamunkil.
15 Wi nakʼatk li kixkabʼla junaq li qas qiitzʼin, tsachq li xkʼanjel, abʼan aʼan tixkol ribʼ. Ut chanchanaq li winq li naʼelelik chiru li xaml.
16 Ma inkʼaʼ nekeenaw naq laaʼex rochoch li Yos ut li xsantil musiqʼej li Yos wank eerikʼin?
17 Wi junaq li qas qiitzʼin naxjukʼ li rochoch li Yos, li Yos tixsach ru aʼan xbʼaan naq saant li rochoch li Yos ut laaʼex li ochoch aʼin.
18 Maaʼani tixbʼalaqʼi ribʼ: wi junaq eere naxkʼoxla naq wank xnaʼlebʼ saʼ li ruuchichʼochʼ* aʼin, xbʼaanuhaq ribʼ naq maakʼaʼ xnaʼlebʼ re naq tixtaw xnaʼlebʼ.
19 Li xnaʼlebʼ li ruuchichʼochʼ maakʼaʼ naʼok wiʼ chiru li Yos xbʼaan naq tzʼiibʼanbʼil: «Li Yos naxbʼaanu naq li winq li wank xnaʼlebʼ ttʼaneʼq saʼ li bʼalaqʼik li naxkʼubʼ xjunes».
20 Tzʼiibʼanbʼil ajwiʼ: «Li Jehobʼa* naxnaw naq li xkʼaʼuxebʼ li wankebʼ xnaʼlebʼ maakʼaʼ naʼok wiʼ».
21 Joʼkan naq maaʼani chixnimobʼresi ribʼ saʼ xkʼabʼaʼebʼ li winq xbʼaan naq eere chixjunil li kʼaʼaq re ru:
22 aʼ yaal ma laj Pablo, laj Apolos, laj Cefas,* li ruuchichʼochʼ, li yuʼam, li kamk, li yook chi kʼulmank anaqwan malaj li tkʼulmanq moqon. Chixjunil eere.
23 Ut laaʼex rehex li Kriist ut li Kriist re li Yos.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, ruuchichʼochʼ.
^ Taawil xchʼolobʼankil li aatin, Jehobʼa.
^ Pedro ajwiʼ nakʼabʼaʼiik.
