1 Corintios 5:1-13
5 Joʼkan ajwiʼ, xwabʼi resil naq saʼ eeyanq wank jun li winq li wank rikʼin rixaqil li xyuwaʼ ut xmux ribʼ. Li muxuk ibʼ* aʼin qʼaxal yibʼ wiʼ chik ru chiru li nekeʼxbʼaanu ebʼ li inkʼaʼ nekeʼpaabʼank.*
2 Ut laaʼex sa eechʼool? Ma inkʼaʼ raj xrahoʼk saʼ leechʼool ut xeerisi raj li winq aʼin saʼ eeyanq?
3 Usta moko wankin ta eerikʼin, yookin xkʼoxlankil li yookex xkʼulbʼal, ut ak xinraqok aatin saʼ xbʼeen li winq aʼin chanchan tawiʼ wankin eerikʼin.
4 Naq teechʼutubʼ eeribʼ saʼ xkʼabʼaʼ li Qaawaʼ Jesús, cheenawaq naq xinkʼul li wankilal rikʼin li Qaawaʼ Jesús ut yookin xkʼoxlankil li yookex xkʼulbʼal.
5 Qʼaxtesihomaq li winq aʼin saʼ ruqʼ laj Tza re naq tsachmanq li maak li kixkʼam chaq saʼ li chʼuut ut tkoleʼq li chʼuut saʼ xkutankil li Qaawaʼ xbʼaan li xchaabʼilal ru xnaʼlebʼ.
6 Moko us ta naq teenima eeribʼ. Ma inkʼaʼ nekeenaw naq li chʼam aj qʼem usta kachʼin naxbʼaanu naq ttzʼubʼoʼq chixjunil li qʼem?
7 Isihomaq li qʼem li ak junxil natzʼubʼoʼk re naq laaʼexaq akʼil qʼem, saqaq eeru ut maajunwa teekanabʼ wank chi saq eeru. Xbʼaan naq li Kriist, li qakarneer re li Paswa, ak xkamsiik.
8 Joʼkan naq moko tqoksi ta li chʼam aj qʼem li ak junxil natzʼubʼoʼk saʼ li chʼutam naq ak xnumeʼk li Paswa chi moko tqoksi li chʼam aj qʼem li nareetali li maaʼusilal ut li maak. Kaʼajwiʼ bʼan tqoksi li kaxlanwa li maakʼaʼ xchʼamal. Aʼin reetalil li us ut li yaal.
9 Xintzʼiibʼa eere jun li esilhu re naq teekanabʼ wank saʼ amiiwil* rikʼinebʼ li nekeʼxmux ribʼ.*
10 Rikʼin aʼin moko yookin ta xyeebʼal eere naq teerisi eeribʼ chi junajwa saʼ xyanqebʼ li qas qiitzʼin re li ruuchichʼochʼ li nekeʼxyuʼami li muxuk ibʼ,* li nekeʼxrahi ru li inkʼaʼ us, li nekeʼelqʼak ut li nekeʼxloqʼoni li pechʼbʼil yos.* Wi joʼkan, tento raj texʼelq saʼ li ruuchichʼochʼ.
11 Abʼan anaqwan nintzʼiibʼa eere naq kanabʼomaq wank saʼ amiiwil* rikʼin li nawbʼil ru joʼ aj paabʼanel abʼan naxmux ribʼ,* naxrahi ru li inkʼaʼ us, naxloqʼoni li pechʼbʼil yos,* nahobʼok, nakalaak malaj naʼelqʼak. Chi moko texwaʼaq rochbʼeen.
12 Abʼan, kʼaʼut naq laaʼin tinraqoq aatin saʼ xbʼeenebʼ li moko wankebʼ ta saʼ li chʼuut? Ma inkʼaʼ tabʼiʼ laaʼex nekexraqok aatin saʼ xbʼeenebʼ li wankebʼ saʼ li chʼuut
13 ut li Yos naraqok aatin saʼ xbʼeenebʼ li moko wankebʼ ta saʼ li chʼuut? «Isihomaq saʼ eeyanq li winq li maaʼus xnaʼlebʼ».
Xtzʼaqobʼ ebʼ li naʼlebʼ
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «li nekeʼbʼaanu saʼebʼ li tenamit».
^ Malaj «teekanabʼ xjunajinkil eeribʼ».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «yalaq kʼaru chik».
^ Malaj «kanabʼomaq xjunajinkil eeribʼ».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «yalaq kʼaru chik».
