1 Corintios 8:1-13
8 Joʼkan bʼiʼ, chiqajunilo wank qanawom chirix li tzekemq li ak yeechiʼinbʼil chiruhebʼ li pechʼbʼil yos. Li nawom naxbʼaanu naq junaq li qas qiitzʼin qʼaxal qʼetqʼetaq, abʼan li rahok nawaklesink chʼool.
2 Wi junaq li qas qiitzʼin naxkʼoxla naq naxnaw junaq li naʼlebʼ, toj maajiʼ naxnaw chixjunil chirix li naʼlebʼ aʼin.
3 Abʼan, wi junaq li qas qiitzʼin naxra li Yos, aʼan naxnaw ru.
4 Ut chirix xwaʼbʼal li tzekemq li nayeechiʼimank chiruhebʼ li pechʼbʼil yos, naqanaw naq ebʼ li pechʼbʼil yos maakʼaʼebʼ xwankil saʼ ruuchichʼochʼ ut naqanaw ajwiʼ naq jun ajwiʼ li Yos.
5 Ebʼ li qas qiitzʼin nekeʼxye naq wank naabʼal paay li yos saʼ choxa joʼ ajwiʼ saʼ ruuchichʼochʼ. Joʼkan naq choʼq rehebʼ li qas qiitzʼin wank naabʼal chi «yos» ut naabʼal chi «qaawaʼ».
6 Abʼan choʼq qe jun ajwiʼ li Yos aʼan li Yuwaʼbʼej, li nachalk wiʼ chixjunil ut yoʼyoko choʼq re aʼan. Ut jun ajwiʼ li Qaawaʼ aʼan li Jesukriist saʼ xkʼabʼaʼ aʼan chalenaq chixjunil ut saʼ xkʼabʼaʼ aʼan wank qayuʼam.
7 Abʼan moko chixjunilebʼ ta nekeʼxtaw ru aʼin xbʼaan naq wankebʼ xeʼxloqʼoni chaq ebʼ li pechʼbʼil yos ut naq nekeʼxwaʼ li tzekemq li mayejanbʼil chiruhebʼ li pechʼbʼil yos nekeʼril chanchan tawiʼ yookebʼ xloqʼoninkil ruhebʼ. Ut chirix chik aʼan, li xchʼoolebʼ* nachʼiʼchʼiʼink rehebʼ xbʼaan naq moko kaw ta.
8 Abʼanan, li tzekemq moko qʼaxal ta nokooxjilosi rikʼin li Yos. Wi inkʼaʼ nokoowaʼak, moko maak ta ut wi nokoowaʼak, moko tnimaaq ta qu.
9 Abʼan, weent teebʼaanu rikʼin li nekeeraj xbʼaanunkil re naq inkʼaʼ teekʼehebʼ chi tichkʼok li moko kawebʼ ta li xchʼool.
10 Xbʼaan naq, wi junaq li qas qiitzʼin tatril, laaʼat li wank aanawom, chi waʼak saʼ rochoch ebʼ li pechʼbʼil yos, ma inkʼaʼ tixbʼaanu aʼin naq li xchʼool* li qas qiitzʼin li moko kaw ta li xchʼool traj xwaʼbʼal li tzekemq li yeechiʼinbʼil chiruhebʼ li pechʼbʼil yos?
11 Usta nakaanaw naq us xwaʼbʼal li tzekemq, nakaasach li xpaabʼal li moko kaw ta li xchʼool. Misach saʼ laachʼool naq aʼan aawechpaabʼanel chirix li kikamk wiʼ li Kriist.
12 Naq nekexmaakobʼk chiruhebʼ leerechpaabʼanel chi joʼkaʼin ut nekeerahobʼtesi li xchʼoolebʼ* li moko kawebʼ ta li xchʼool, yookex chi maakobʼk chiru li Kriist.
13 Joʼkan bʼiʼ, wi li tzekemq naxkʼe chi tichkʼok li wechpaabʼanel, maajunwa chik tintzeka li tibʼ re naq inkʼaʼ tinkʼe chi tichkʼok li wechpaabʼanel.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, chʼool.
^ Taawil xchʼolobʼankil li aatin, chʼool.
^ Taawil xchʼolobʼankil li aatin, chʼool.
