1 Corintios 9:1-27
-
Li eetalil li kixkanabʼ laj Pablo joʼ apóstol (1-27)
-
«Maakʼe xtzʼapbʼal re li teelom wakax» (9)
-
«Ra tchalq saʼ inbʼeen wi inkʼaʼ ninkʼe chi naweʼk li chaabʼil esil!» (16)
-
Laj Pablo kixbʼaanu chixjunil li wank saʼ ruqʼ re xtenqʼankil jalan jalanq li qas qiitzʼin (19-23)
-
Aajel ru naq tqanaw xbʼeresinkil qibʼ chiʼus saʼ li aanilak re xtawbʼal li yuʼam (24-27)
-
9 Ma laaʼin tabʼiʼ moos? Ma maawaʼin apóstol? Ma inkʼaʼ tabʼiʼ ak wilom li Jesús, li Qaawaʼ? Ma inkʼaʼ tabʼiʼ laaʼex nekeekʼutbʼesi naq laaʼin apóstol?
2 Usta ebʼ li junchʼol inkʼaʼ nikineʼril joʼ apóstol, chʼolchʼo naq laaʼex nikineeril joʼ apóstol. Xbʼaan naq laaʼex li eetalil li nakʼutbʼesink re, naq laaʼin xʼapóstol li Qaawaʼ.
3 Aʼin tinye rehebʼ li nekeʼxwechʼ wix.
4 Peʼyaal naq wank qakʼulubʼ naq toowaʼaq ut tooʼukʼaq?
5 Peʼyaal naq wank qakʼulubʼ naq toorochbʼeeni li qixaqil li wank choʼq aj paabʼanel joʼ nekeʼxbʼaanu ebʼ li junchʼol chi apóstol, ebʼ li riitzʼin li Qaawaʼ ut laj Cefas?*
6 Ma kaʼajwiʼ laj Bernabé ut laaʼin tento tookʼanjelaq re xchʼolaninkil qibʼ?
7 Ma wank junaq aj puubʼ li naxtoj li xsachomq naq yook chi kʼanjelak? Ma wank junaq li qas qiitzʼin li naraw li uubʼ ut inkʼaʼ naxyal li ru? Malaj wank junaq li qas qiitzʼin li wank xkarneer ut inkʼaʼ narukʼ bʼayaq xleechil ebʼ li xkarneer?
8 Moko yookin ta xyeebʼal aʼin joʼ nakʼoxlak li winq. Ma maawaʼ tabʼiʼ aʼin naxye li Chaqʼrabʼ?
9 Xbʼaan naq tzʼiibʼanbʼil saʼ Xchaqʼrabʼ laj Moisés: «Maakʼe xtzʼapbʼal re li teelom wakax naq yooq risinkil rix li triiw». Ma kaʼajwiʼ chirixebʼ li teelom wakax naxkʼe xchʼool li Yos?
10 Malaj naxye aʼin re naq us wanqo? Joʼkan, chʼolchʼo tzʼaqal naq kitzʼiibʼamank aʼin re naq us wanqo xbʼaan naq li winq li naxkʼanjela li chʼochʼ naroybʼeni naq tixxok ru li triiw ut li winq li narisi rix li triiw naroybʼeni naq tixkʼul ru li triiw.
11 Wi xqawotz eerikʼin li raatin li Yos, ma inkʼaʼ us naq tooʼeetenqʼa rikʼin li naʼajmank chiqu?
12 Wi ebʼ li junchʼol wankebʼ xkʼulubʼ re naq teetenqʼahebʼ, ma inkʼaʼ tabʼiʼ qʼaxal wank qakʼulubʼ laaʼo re naq tooʼeetenqʼa? Usta joʼkan, laaʼo moko yooko ta roksinkil li tenqʼ aʼin, yooko bʼan xkuybʼal chixjunil li chʼaʼajkilal re naq inkʼaʼ tqaram chiru junaq li qas qiitzʼin xpaabʼankil li chaabʼil esil chirix li Kriist.
13 Ma inkʼaʼ nekeenaw naq ebʼ li winq li nekeʼkʼanjelak saʼ rochoch li Yos nekeʼxwaʼ li nekeʼxkʼam chaq ebʼ li qas qiitzʼin saʼ rochoch li Yos ut li nekeʼkʼanjelak chi rajlal saʼ xnaʼaj li mayej,* nekeʼtzʼaq li nakʼemank choʼq mayej?
14 Joʼkan ajwiʼ, li Qaawaʼ kixye naq li nekeʼxkʼe chi naweʼk li chaabʼil esil yoʼyoqebʼ saʼ xkʼabʼaʼ li chaabʼil esil.
15 Abʼan maajun rehebʼ li tenqʼ aʼin yookin roksinkil. Abʼanan, moko yookin ta xtzʼiibʼankil chixjunil aʼin re naq teebʼaanu choʼq we, us raj naq tinkamq chiru naq... Maajunwa raj nawaj xtzʼeqbʼal inkʼulubʼ re xnimankil wibʼ chirix li chaabʼil esil li ninkʼe chi naweʼk chi sibʼil.
16 Joʼkan bʼiʼ, wi ninkʼe chi naweʼk li chaabʼil esil, maakʼaʼ xyaalal naq ninnima wibʼ chirix xbʼaan naq aʼin tenebʼanbʼil saʼ inbʼeen. Ra tchalq saʼ inbʼeen wi inkʼaʼ ninkʼe chi naweʼk li chaabʼil esil!
17 Wi ninbʼaanu aʼin chi anchal inchʼool; tinkʼul inqʼajkamunkil. Abʼan, usta inkʼaʼ nawaj xbʼaanunkil, aʼin jun li kʼanjel li ak xtenebʼaak saʼ inbʼeen.
18 Joʼkan bʼiʼ, bʼar wank linqʼajkamunkil? Linqʼajkamunkil aʼan xkʼebʼal resil li chaabʼil esil chi sibʼil. Chi joʼkan moko tinpatzʼ ta li wank inkʼulubʼ chi xpatzʼbʼal joʼ aj kʼehol resil li chaabʼil esil.
19 Usta maawaʼin xmoos junaq li winq, xinkʼe wibʼ choʼq xmoos chixjunilebʼ re rechaninkil naabʼalebʼ li qas qiitzʼin joʼ naruhank.
20 Xinkʼe wibʼ joʼ aj judiiy naq wankin saʼ xyanqebʼ laj judiiy re rechaninkilebʼ laj judiiy. Xinkʼe wibʼ chanchan tawiʼ wankin rubʼel chaqʼrabʼ re rechaninkilebʼ li wankebʼ rubʼel li chaqʼrabʼ. Usta moko wankin ta rubʼel li chaqʼrabʼ, ninbʼaanu aʼin re rechaninkilebʼ li wankebʼ rubʼel li chaqʼrabʼ.
21 Xinkʼe wibʼ joʼ li inkʼaʼ naxpaabʼ li chaqʼrabʼ naq wankin saʼ xyanqebʼ li inkʼaʼ nekeʼxpaabʼ li chaqʼrabʼ re rechaninkilebʼ li inkʼaʼ nekeʼxpaabʼ li chaqʼrabʼ. Usta laaʼin ninpaabʼ li xchaqʼrabʼ li Yos ut wankin rubʼel li xchaqʼrabʼ li Kriist.
22 Naq xinwank saʼ xyanqebʼ li maakʼaʼebʼ xmetzʼew, xinkʼe wibʼ joʼ li maakʼaʼ xmetzʼew re rechaninkil li maakʼaʼebʼ xmetzʼew. Xinbʼaanu chixjunil li wank saʼ wuqʼ re xtenqʼankil jalan jalanq li qas qiitzʼin re naq tinruuq xkolbʼal wiibʼ oxibʼ.
23 Abʼan ninbʼaanu chixjunil saʼ xkʼabʼaʼ li chaabʼil esil re xwotzbʼal rikʼinebʼ li junchʼol.
24 Ma inkʼaʼ nekeenaw naq saʼ jun li aanilak chixjunilebʼ nekeʼaanilak abʼan jun ajwiʼ naxkʼul li maatan? Joʼkan naq aanilaqex re naq teekʼul li maatan.
25 Joʼkan bʼiʼ, chixjunilebʼ li nekeʼtzʼaqonk saʼ li aanilak nekeʼxkʼutbʼesi naq nekeʼruuk xbʼeresinkil ribʼ* chiʼus saʼebʼ li xyuʼamebʼ. Chʼolchʼo naq aʼanebʼ nekeʼxbʼaanu aʼin re xkʼulbʼal jun li koroon li yiibʼanbʼil rikʼin xaq cheʼ li nachaqik, abʼan laaʼo naqabʼaanu re xkʼulbʼal jun li koroon li inkʼaʼ nachaqik.
26 Joʼkan bʼiʼ, laaʼin inkʼaʼ ninʼaanilak wi moko chʼolchʼo ta chiwu bʼar tinxik chi moko ninsakʼ li iqʼ naq ninyalok.
27 Ninsakʼ* bʼan lintibʼel ut ninkʼe choʼq inmoos re naq li Yos inkʼaʼ tinxtzʼeqtaana naq ak xinkʼe chi naweʼk li chaabʼil esil rehebʼ li junchʼol.
Xtzʼaqobʼ ebʼ li naʼlebʼ
^ Pedro ajwiʼ nakʼabʼaʼiik.
^ Malaj «li altar». Taawil xchʼolobʼankil li aatin, xnaʼaj li mayej.
^ Li aatin saʼ griego yook tana chi aatinak chirix li xbʼaanuhom, li raatin malaj li naxkʼoxla junaq li qas qiitzʼin.
^ Malaj «Ninqʼus chi kaw».
