1 Juan 1:1-10
1 Xqatzʼiibʼa eere chirix li wank chaq saʼ xtiklajik, xqabʼi chirix, xqil rikʼin xnaqʼ qu, xqil li kixbʼaanu, xqachʼeʼ rikʼin quqʼ ut xqatzʼiibʼa eere chirix li aatin li nakʼehok yuʼam
2 (joʼkan, li yuʼam kikʼutbʼesimank ut laaʼo xqil ut yooko xkʼebʼal chi naweʼk ut xkʼebʼal resil li junelik yuʼam li wank chaq rikʼin li Yuwaʼbʼej ut kikʼutbʼesimank chiqu),
3 li xqil ut xqabʼi yooko xseeraqʼinkil ajwiʼ eere re naq laaʼex wanqex ajwiʼ saʼ junajil qikʼin ut laaʼo wanqo saʼ junajil rikʼin li Yuwaʼbʼej ut li Jesukriist, li Ralal.
4 Naqatzʼiibʼa eere aʼin re naq qʼaxal sahaq saʼ qachʼool.
5 Aʼan aʼin li esil li xqabʼi rikʼin ut yooko xyeebʼal eere: li Yos aʼan saqenk ut maakʼaʼ qʼoqyink rikʼin.
6 Wi naqaye «Wanko saʼ junajil rikʼin» abʼan toj yooko chi bʼeek saʼ qʼoqyink, yooko chi tikʼtiʼik ut moko yooko ta xyuʼaminkil li yaal.
7 Abʼanan wi yooko chi bʼeek saʼ li saqenk joʼ naq aʼan wank saʼ li saqenk, chiqajunilo wanqo saʼ junajil ut li xkikʼel li Jesús, li Ralal, nokooxchʼajobʼresi chiru chixjunil li maak.
8 Wi naqaye «Maakʼaʼ qamaak», yooko xbʼalaqʼinkil qibʼ ut li yaal moko wank ta saʼ li qachʼool.
9 Wi naqaye li qamaak, saʼ xkʼabʼaʼ naq aʼan naxbʼaanu li naxye ut tiik xchʼool, naxkuy qamaak ut nokooxchʼajobʼresi chiru chixjunil li maaʼusilal.
10 Wi naqaye «Maajunwa xoomaakobʼk», yooko xyeebʼal naq aʼan aj tikʼtiʼ ut li raatin moko wank ta qikʼin.
