1 Pedro 4:1-19
4 Saʼ xkʼabʼaʼ naq li Kriist kixkʼul li rahilal saʼ tibʼelej, kawresimaq eeribʼ re naq texkʼoxlaq ajwiʼ joʼ aʼan xbʼaan naq li qas qiitzʼin li kixkʼul li rahilal saʼ tibʼelej ak xtzʼeqtaana li maak
2 re naq junelik troksi li xyuʼam re xbʼaanunkil li naraj li Yos, joʼ najtil twanq saʼ tibʼelej, ut inkʼaʼ re xbʼaanunkil li naraj li ruuchichʼochʼ.
3 Junxil xeebʼaanu chaq li naxbʼaanu li ruuchichʼochʼ, xexmaakobʼk chi maakʼaʼ eexutaan,* junes xmuxbʼal eeribʼ nekeeraj chaq, xexkalaak, xexninqʼehik saʼ joʼmajoʼil, xexninqʼehik re ukʼaʼk ut xeeloqʼoni li pechʼbʼil yos* li inkʼaʼ naxkʼulubʼa li chaqʼrabʼ.
4 Sachsokebʼ xchʼool chi rilbʼal naq inkʼaʼ chik nekeebʼaanu li maaʼusilal rochbʼeenebʼ joʼkan naq nekeʼxye li inkʼaʼ us cheerix.
5 Abʼan ebʼ li qas qiitzʼin aʼin teʼxqʼaxtesi li xbʼaanuhom chiru li ok re chi raqok aatin saʼ xbʼeenebʼ li yoʼyo ut saʼ xbʼeenebʼ li kamenaq.
6 Saʼ xkʼabʼaʼ aʼin kikʼemank chi naweʼk li chaabʼil esil rehebʼ li kamenaq re naq teʼruuq chi wank joʼ naraj li Yos rikʼin li xtenqʼ li santil musiqʼej usta ebʼ li winq teʼraqoq aatin saʼ xbʼeenebʼ.
7 Abʼan xnachʼok chaq li xraqik chixjunil. Joʼkan bʼiʼ, kʼoxlanqex chiʼus ut ajʼajaq eeru chi tijok.
8 Abʼan li wank xwankil aʼan naq qʼaxal teera eeribʼ cheeribʼil eeribʼ xbʼaan naq li rahok naxtzʼap ru naabʼal li maak.
9 Teekʼul eeribʼ chi anchal eechʼool abʼan mexwechʼok naq teebʼaanu aʼin.
10 Li junjunq saʼ eeyanq kixkʼul jun li maatan. Joʼkan naq oksimaq li maatan aʼin joʼebʼ laj kʼanjel li nekeʼxtenqʼa ribʼ chiribʼilebʼ ribʼ chi xtawbʼal li xnimal rusilal li Yos li nakʼutbʼesimank rikʼin jalan jalanq li naʼlebʼ.
11 Wi junaq li qas qiitzʼin naʼaatinak, xbʼaanuhaq joʼ naxbʼaanu jun li qas qiitzʼin li naxkʼe chi naweʼk li esil li nachalk rikʼin li Yos. Ut wi junaq naraj xtenqʼankilebʼ li junchʼol, xbʼaanuuq rikʼin li metzʼew li naxkʼe li Yos re naq tkʼeheʼq xloqʼal li Yos saʼ chixjunil saʼ xkʼabʼaʼ li Jesukriist. Re aʼan li loqʼal ut li wankil chi junelik. Joʼkan taxaq.
12 Ex wechpaabʼanel li raarokex inbʼaan, li yalbʼaʼix li yookex xkʼulbʼal chanchan xaml. Misach eechʼool xbʼaan aʼin xbʼaan naq ak eerilom.
13 Sahaq bʼan leechʼool xbʼaan naq laaʼex yookex xkʼulbʼal li rahilal chirix li kirahobʼtesiik wiʼ li Kriist ut chi joʼkan sahaq leechʼool naq tkʼutbʼesimanq li xloqʼal.
14 Wi yookex chi hobʼeʼk saʼ xkʼabʼaʼ li Kriist, sahaq eechʼool xbʼaan naq li xsantil metzʼew li Yos ut li xloqʼal wank saʼ eebʼeen.
15 Joʼkan bʼiʼ, maaʼani taxaq eere tixkʼul li rahilal saʼ xkʼabʼaʼ naq aj kamsinel, aj elqʼ, maaʼus xnaʼlebʼ malaj naxchʼik ribʼ saʼ xyuʼamebʼ li junchʼol.
16 Abʼan, wi junaq naxkʼul li rahilal saʼ xkʼabʼaʼ naq naxtaqe li Kriist, mixutaanak; yooq bʼan xkʼebʼal xloqʼal li Yos joʼebʼ li nekeʼtaqenk re li Kriist.
17 Xbʼaan naq aʼin li hoonal li xaqabʼanbʼil re naq li raqok aatin ttiklaaq saʼ li rochoch li Yos. Abʼanan, wi qikʼin natiklaak xbʼeenwa, chanru teʼosoʼq li inkʼaʼ nekeʼxpaabʼ li chaabʼil esil chirix li Yos?
18 «Ut wi raachisa tkoleʼq li tiik xchʼool, kʼaru tawiʼ tixkʼul laj maak ut li inkʼaʼ naroxloqʼi li Yos?».
19 Joʼkan bʼiʼ, li yookebʼ xkʼulbʼal li rahilal saʼ xkʼabʼaʼ li rajom li Yos, meʼxkanabʼ xkʼebʼal li xyuʼam saʼ ruqʼ aʼan xbʼaan naq aʼan laj Yobʼtesinel ut naru naqakʼojobʼ qachʼool rikʼin.
Xtzʼaqobʼ ebʼ li naʼlebʼ
^ Li aatin saʼ griego, asélgueia. Taawil xchʼolobʼankil li aatin, maakobʼk chi maakʼaʼ li xutaan.
^ Malaj «yalaq kʼaru chik».
