1 Pedro 5:1-14
5 Joʼkan bʼiʼ, laaʼin ajwiʼ cheekel winq, xwil li rahilal li kixkʼul li Kriist ut laaʼin ajwiʼ jun rehebʼ li tixkʼul li loqʼal li tkʼutbʼesimanq. Nintzʼaama aʼin rehebʼ li cheekel winq li wankebʼ saʼ eeyanq:
2 teeril ebʼ li xkarneer li Yos li xkʼemank saʼ eeruqʼ joʼ naxbʼaanu laj ilol karneer, texkʼanjelaq joʼ cheekel winq;* meebʼaanu chi minbʼil eeru, teebʼaanu bʼan chi anchal eechʼool joʼ aj kʼanjel chiru li Yos chi moko teebʼaanu ta xbʼaan naq nekeeraj xtawbʼal junaq li kʼaʼaq re ru, seebʼaqex bʼan chi xbʼaanunkil
3 chi moko texnaʼlebʼaq chanchan tawiʼ laaʼex aj echal rehebʼ li xʼereens li Yos, teekʼutbʼesi bʼan naq chaabʼil eenaʼlebʼ ut ebʼ li karneer teʼxkʼam rehebʼ eerikʼin.
4 Ut naq li xbʼeenil aj kʼaakʼalenel ak xkʼutbʼesimank, laaʼex teekʼul li koroon li naxkʼe li loqʼal li inkʼaʼ naʼosoʼk.
5 Joʼkan ajwiʼ laaʼex saaj al, kʼehomaq eeribʼ rubʼel xwankil li ak cheekebʼ cheeru. Joʼkan bʼiʼ, tiqibʼomaq eeribʼ rikʼin li kubʼsink ibʼ naq wanqex rikʼinebʼ li junchʼol xbʼaan naq li Yos xikʼ naril li qʼetqʼetil abʼan naxkʼutbʼesi li xnimal rusilal rehebʼ li nekeʼxkubʼsi ribʼ.
6 Joʼkan bʼiʼ, kʼehomaq eeribʼ rubʼel xwankil li ruqʼ li Yos re naq aʼan tixnima eeru saʼ li hoonal li ak xaqabʼanbʼil
7 ut qʼaxtesimaq chixjunil leekʼaʼuxl saʼ ruqʼ xbʼaan naq aʼan naxkʼe xchʼool cheerix.
8 Kʼoxlanqex chiʼus ut ajʼooq eeru! Li xikʼ naʼilok eere aʼ laj Tza* yook eesutbʼal joʼ jun li kaqkoj li kaw naxjap re ut yook xsikʼbʼal ani tixnuqʼ.
9 Abʼan kawaqex chiru aʼan rikʼin xkawil leepaabʼal xbʼaan naq nekeenaw naq chixjunil leerechpaabʼanel saʼ ruuchichʼochʼ yookebʼ ajwiʼ xkʼulbʼal li rahilal joʼ laaʼex.
10 Joʼkan bʼiʼ, li Yos tixchoy eekawresinkil naq ak xeenumsi li rahilal chiru jun kʼamok. Aʼan naxkʼe li xnimal rusilal saʼ chixjunil ut aʼan xbʼoqok eere re naq texwanq saʼ junajil rikʼin li Kriist ut teekʼul eeloqʼal chi junelik. Aʼan tixkawresi leepaabʼal, tixkʼe eemetzʼew ut tixbʼaanu naq kaw xaqxoqex.
11 Re taxaq li wankilal chi junelik. Joʼkan taxaq.
12 Saʼ xkʼabʼaʼ laj Silvano,* li inkʼaʼ naxtzʼeqtaana li Yos, xintzʼiibʼa eere wiibʼ oxibʼ li aatin re xwaklesinkil leechʼool ut xkʼebʼal cheenaw naq relik chi yaal naq li Yos yook xkʼutbʼesinkil cheeru li xnimal rusilal. Chapomaq eeribʼ chi kaw rikʼin aʼin.
13 Naxtaqla xsahil eechʼool li ixq li wank Babilonia li sikʼbʼil ru joʼ laaʼex, joʼ ajwiʼ laj Marcos, li chanchan walal.
14 Kʼehomaq xsahil leechʼool cheeribʼil eeribʼ ut teetzʼubʼ eeru re xkʼutbʼesinkil naq nekeera eeribʼ.
Chiwanq taxaq eerikʼin li tuqtuukilal laaʼex li wankex saʼ junajil rikʼin li Kriist.
Xtzʼaqobʼ ebʼ li naʼlebʼ
^ Malaj «teekʼe eechʼool chirix».
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
^ Silas ajwiʼ nakʼabʼaʼiik.
