1 Tesalonicenses 2:1-20
2 Ex aj paabʼanel, laaʼex nekeenaw chiʼus naq moko maakʼaʼ ta ajʼe naq xexqulaʼani.
2 Joʼ nekeenaw, xqakʼul li rahilal ut xoorahobʼtesiik aran Filipos. Abʼan saʼ xkʼabʼaʼ li Qayos xwaklesiik li qachʼool re xkʼebʼal chi naweʼk li chaabʼil esil chirix li Yos, usta kaw yookebʼ chaq qarahobʼtesinkil.
3 Chʼolchʼo chiqu naq li naʼlebʼ li naqakʼe eere moko inkʼaʼ ta us chi moko tzʼaj ta ru chi moko xqakʼe ta eere re eebʼalaqʼinkil.
4 Saʼ xkʼabʼaʼ naq li Yos xooxkʼulubʼa ut xooxxaqabʼ re xkʼebʼal chi naweʼk li chaabʼil esil, inkʼaʼ nokooʼaatinak re xsahobʼresinkil xchʼool ebʼ li winq, nokooʼaatinak bʼan re xsahobʼresinkil xchʼool li Yos li naxtzʼil rix li qachʼool.
5 Joʼkan ajwiʼ, laaʼex nekeenaw naq maajunwa xexqabʼalaqʼi rikʼin chaabʼil aatin chi moko xqabʼaanu ta qibʼ naq chaabʼilo yal re naq tkʼemanq qatumin. Li Yos naxnaw chi tzʼaqal aʼin.
6 Chi moko xqasikʼ ta naq tnimaaq qu xbʼaanebʼ li winq, chi moko laaʼex chi moko ebʼ li junchʼol. Saʼ xkʼabʼaʼ naq laaʼo xtzolom li Kriist xooruuk raj xyeebʼal eere naq teetoj chixjunil li qasachomq.
7 Xexqara bʼan ut tuulano eerikʼin, joʼ jun li naʼbʼej li naxtuʼresi ut qʼaxal naxra li xkʼuulaʼal.
8 Joʼkan bʼiʼ, saʼ xkʼabʼaʼ naq kʼajoʼ nekexqara nasahoʼk qachʼool chi xkʼebʼal eere li chaabʼil esil chirix li Yos ut xkʼebʼal eere li qayuʼam re eetenqʼankil.
9 Chʼolchʼo naq jultik eere ex aj paabʼanel, naq kaw xookʼanjelak ut xqakʼe qaqʼe. Naq xqakʼe cheenaw li chaabʼil esil chirix li Yos, xookʼanjelak chi qʼeq ut chi kutan re naq maaʼani eere tixtoj chixjunil li qasachomq.
10 Joʼkan ajwiʼ, laaʼex nekeenaw ut li Yos naxnaw ajwiʼ naq xoonaʼlebʼak saʼ santilal, saʼ tiikilal ut inkʼaʼ xoomaakobʼk cheeru laaʼex laj paabʼanel.
11 Laaʼex nekeenaw chiʼus naq joʼ naxbʼaanu jun li yuwaʼbʼej rikʼinebʼ li xkokʼal, laaʼo xqakʼe eenaʼlebʼ, xqakʼojobʼ eechʼool ut xqakʼe eenaʼlebʼ cheejunqal chirix chanru teebʼeresi leeyuʼam
12 re naq texwanq joʼ chanru nawulak chiru li Yos, li yook eebʼoqbʼal saʼ li Xʼawabʼejilal ut saʼ li xloqʼal.
13 Joʼkan naq nokoobʼanyoxink ajwiʼ chi rajlal chiru li Yos. Naq laaʼex xeekʼul li raatin li Yos, li xeerabʼi qikʼin, inkʼaʼ xeekʼulubʼa joʼ raatin winq, xeekʼulubʼa bʼan chi tzʼaqal joʼ raatin li Yos, li yook eetenqʼankil laaʼex laj paabʼanel.
14 Ex aj paabʼanel, laaʼex xeekʼam eere rikʼinebʼ li xchʼuut li Yos li wankebʼ saʼ junajil rikʼin li Kristo Jesús aran Judea xbʼaan naq laaʼex xeekʼul li rahilal saʼ ruqʼebʼ leerechtenamitul. Aʼin ajwiʼ li rahilal li yookebʼ xkʼulbʼal aʼanebʼ saʼ ruqʼebʼ laj judiiy
15 aʼanebʼ ajwiʼ xeʼxkamsi li Qaawaʼ Jesús ut ebʼ li propeet ut xikʼ yookebʼ qilbʼal. Joʼkan ajwiʼ, moko yookebʼ ta xsahobʼresinkil xchʼool li Yos ut li nekeʼxbʼaanu moko us ta choʼq rehebʼ li qas qiitzʼin
16 naq nekeʼxram chiqu xkʼebʼal chi naweʼk li chaabʼil esil rehebʼ li tenamit re naq teʼruuq chi koleʼk. Rikʼin aʼin nekeʼxtamresi li xmaakebʼ. Abʼan ak xchalk li xjosqʼil li Yos saʼ xbʼeenebʼ.
17 Ex aj paabʼanel, naq xooʼelk* jun kʼamok saʼ eeyanq (usta maaʼanihex qikʼin, wankex saʼ li qachʼool), qʼaxal xqaj rilbʼal eeru joʼkan naq xqabʼaanu chixjunil li wank saʼ quqʼ.
18 Joʼkan naq xqaj eerulaʼaninkil. Ut laaʼin laj Pablo wiibʼ sut xwaj eerulaʼanikil. Abʼan laj Tza xram qabʼe.
19 Xbʼaan naq, bʼar wank li qoybʼenihom, li xsahil qachʼool malaj li qakoroon li nakʼehok sahil chʼoolejil chiru li Qaawaʼ Jesús naq ak wanq arin?* Ma maawaʼ tabʼiʼ laaʼex?
20 Joʼkan, laaʼex li qaloqʼal ut li xsahil qachʼool.
Xtzʼaqobʼ ebʼ li naʼlebʼ
^ Malaj «naq xooʼeʼrisi».
^ Li aatin saʼ griego, parousía. Taawil xchʼolobʼankil li aatin, ak wanq arin.
