1 Tesalonicenses 4:1-18
4 Re xraqbʼal, ex wechpaabʼanel, ak xqakʼut cheeru chanru texwanq re xsahobʼresinkil xchʼool li Yos ut joʼkan yookex xbʼaanunkil. Abʼan anaqwan naqaye eere ut naqatzʼaama cheeru saʼ xkʼabʼaʼ li Qaawaʼ Jesús naq meekʼanabʼ xbʼaanunkil ut teebʼaanu chi tzʼaqal re ru.
2 Laaʼex nekeenaw li xkʼutum li Qaawaʼ Jesús li xqakʼe cheenaw.
3 Aʼin li naraj li Yos: naq santaqex ut teetzʼeqtaana li muxuk ibʼ.*
4 Li junjunq saʼ eeyanq tento tixnaw chanru xbʼeresinkil li xtibʼel re naq santaq ut kʼulubʼanbʼilaq xbʼaan li Yos.
5 Meekʼam eere rikʼinebʼ li tenamit li inkʼaʼ nekeʼxnaw ru li Yos xbʼaan naq aʼanebʼ qʼaxal nekeʼxrahi ru wank rikʼin winq malaj ixq ut inkʼaʼ nakʼojlaak xchʼoolebʼ.
6 Maaʼani tixbʼaanu maaʼusilal re li ras riitzʼin chi moko tixmaqʼ xkʼulubʼ chirix aʼin xbʼaan naq li Jehobʼa* tixkʼehebʼ chi xtojbʼal xmaak li nekeʼxbʼaanu aʼin, joʼ chanru xqaye eere chi rubʼelaj ut xqachʼolobʼ ajwiʼ cheeru chi tzʼaqal re ru.
7 Xbʼaan naq li Yos inkʼaʼ xooxbʼoq re naq tzʼajaqo, xooxbʼoq bʼan re naq santaqo.
8 Joʼkan bʼiʼ, li naxtzʼeqtaana aʼin moko yook ta xtzʼeqtaanankil junaq li winq, yook bʼan xtzʼeqtaanankil li Yos li naxkʼe eere li xsantil musiqʼej.
9 Joʼkan ajwiʼ, moko aajel ta ru naq texqatzʼiibʼa re naq teera eeribʼ cheeribʼil eeribʼ joʼ nekeʼxra ribʼ ebʼ li junkabʼal xbʼaan naq li Yos yook xkʼutbʼal cheeru naq teera eeribʼ cheeribʼil eeribʼ.
10 Ut ak yookex ajwiʼ xbʼaanunkil rikʼin chixjunilebʼ laj paabʼanel re Macedonia. Abʼan ex wechpaabʼanel naqaye eere naq inkʼaʼ teekanabʼ naq tkubʼeeq leerahom teekʼe bʼan chi kʼiik.
11 Kʼehomaq eeqʼe chi wank saʼ tuqtuukilal, meechʼik eeribʼ saʼ xyuʼamebʼ li junchʼol ut kʼanjelaqex rikʼin eeruqʼ, joʼ chanru xqakʼut cheeru
12 re naq ebʼ li qas qiitzʼin teʼxkʼe reetal naq nekexnaʼlebʼak chiʼus ut re naq maakʼaʼ tpaltoʼq cheeru.
13 Joʼkan ajwiʼ, ex wechpaabʼanel, naqaj naq teetaw ru li tkʼulmanq rikʼinebʼ li kamenaq re naq inkʼaʼ trahoʼq eechʼool joʼ nekeʼrahoʼk xchʼool li maakʼaʼebʼ roybʼenihom.
14 Xbʼaan naq, wi naqapaabʼ naq li Jesús kikamk ut kiwaklesiik chi yoʼyo, naqapaabʼ ajwiʼ naq li Yos tixkʼam rikʼin li ak xeʼkamk saʼ xkʼabʼaʼ li Jesús.
15 Naqaye eere aʼin saʼ xkʼabʼaʼ li raatin li Jehobʼa:* laaʼo li yoʼyoqo naq ak wanq arin* li Qaawaʼ tooxik saʼ choxa. Abʼan li ak xeʼkamk, teʼwaklesiiq chi yoʼyo xbʼeenwa ut chirix chik aʼan, toowaklesiiq chi yoʼyo laaʼo.
16 Li Qaawaʼ tkubʼeeq chiru choxa ut yooq chi taqlank rikʼin xyaabʼ xkux arkánjel ut wanq rikʼin li xtrompeet li Yos. Ut ebʼ li xtzolom li Kriist li ak xeʼkamk teʼwaklesiiq xbʼeenwa chi yoʼyo.
17 Chirix chik aʼan, laaʼo li yoʼyoqo toosapuuq saʼ choql re naq toowanq rochbʼeenebʼ ut re naq tqataw qibʼ saʼ iqʼ rikʼin li Qaawaʼ ut chi joʼkan wanqo junelik rikʼin li Qaawaʼ.
18 Joʼkan naq meekanabʼ xkʼojobʼankil eechʼool cheeribʼil eeribʼ rikʼin ebʼ li aatin aʼin.
Xtzʼaqobʼ ebʼ li naʼlebʼ
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Li aatin saʼ griego, parousía. Taawil xchʼolobʼankil li aatin, ak wanq arin.
