1 Timoteo 1:1-20
1 Laaʼin laj Pablo xʼapóstol li Kristo Jesús li taqlanbʼil xbʼaan li Yos, aj Kolol qe, ut li Kristo Jesús, li naqataw wiʼ qoybʼenihom.
2 Choʼq re laj Timoteo,* li nawil joʼ tzʼaqal walal li yook chi kʼanjelak chiru li Yos:
Chiwanq taxaq aawikʼin li xnimal rusilal li Yos, li uxtaanank u,* ut li tuqtuukilal li nachalk rikʼin li Yos, li Yuwaʼbʼej, ut li Kristo Jesús, li Qaawaʼ.
3 Naq ak xik xik we Macedonia xinye aawe naq tatkanaaq Éfeso ut anaqwan ninye wiʼ chik aawe naq tento taaye re wiibʼ oxibʼ li qas qiitzʼin naq inkʼaʼ teʼxjekʼi li bʼalaqʼil kʼutum
4 chi moko teʼxkʼe xchʼool chi rabʼinkil ebʼ li seeraqʼinbʼil aatin li moko yaal ta chi moko li kitzʼiibʼamank chirixebʼ li xkʼabʼaʼ ebʼ li xeʼtoon. Maakʼaʼ rusilal naxkʼam chaq aʼin, kaʼajwiʼ naxbʼaanu naq ebʼ li qas qiitzʼin teʼxye li naʼlebʼ li inkʼaʼ teʼruuq xkʼutbʼesinkil ma yaal, chixjunil aʼin inkʼaʼ naxchap ribʼ rikʼin li naxkʼe li Yos re xwaklesinkil li qapaabʼal.
5 Xinkʼe eere li naʼlebʼ aʼin re naq chiqajunilo tooruuq xkʼutbʼesinkil li rahok. Li rahok aʼin nachalk saʼ jun li chʼoolej li saq ru, li inkʼaʼ naqʼabʼank ut li nachalk saʼ jun li paabʼal li maawaʼ aj kaʼpakʼal u.
6 Naq xeʼxtzʼeqtaana li naʼlebʼ aʼin, wankebʼ xeʼok chi tzʼaqonq chirixebʼ li seeraqʼ li maakʼaʼ naʼok wiʼ.
7 Nekeʼraj wank choʼq aj kʼutunel chirix li chaqʼrabʼ, abʼan inkʼaʼ nekeʼxtaw ru li nekeʼxye chi moko nekeʼxtaw ru li naxik wiʼ xchʼoolebʼ.
8 Joʼkan bʼiʼ, laaʼo naqanaw naq chaabʼil li Chaqʼrabʼ wi naʼoksimank chiʼus
9 ut nawbʼil naq li chaqʼrabʼ moko xaqabʼanbʼil ta choʼq rehebʼ li tiikebʼ xchʼool, kixaqabʼaak bʼan choʼq rehebʼ li nekeʼxqʼet li chaqʼrabʼ ut ebʼ li inkʼaʼ nekeʼabʼink, ebʼ li inkʼaʼ nekeʼroxloqʼi li Yos ut ebʼ li nekeʼmaakobʼk, ebʼ li nekeʼxtzʼeqtaana li Yos ut ebʼ li nekeʼxtzʼeqtaana li kʼulanbʼil choʼq re li Yos, ebʼ li nekeʼxkamsi li xnaʼ ut ebʼ li nekeʼxkamsi li xyuwaʼ, ebʼ laj kamsinel,
10 ebʼ li nekeʼxmux ribʼ,* ebʼ li winq li nekeʼwank rikʼin rechwinqilal,* ebʼ laj elqʼ qas qiitzʼin,* ebʼ laj tikʼtiʼ ut ebʼ li inkʼaʼ nekeʼxbʼaanu li nekeʼxye, joʼ ajwiʼ chixjunil li naxram li kʼutum li qʼaxal chaabʼil*
11 li naxchap ribʼ rikʼin li chaabʼil esil li wank xloqʼal li xkʼemank we. Li kʼutum aʼin chalenaq rikʼin li Yos li sa saʼ xchʼool.
12 Ninbʼanyoxi re li Kristo Jesús, li Qaawaʼ, li kixkʼe inwankil, xbʼaan naq kixkʼe we li kʼanjel aʼin
13 usta junxil xinye chaq li inkʼaʼ us chirix li Yos, xinrahobʼtesi li xtenamit ut qʼetqʼetin chaq rikʼinebʼ. Abʼanan, kiruxtaana wu* xbʼaan naq xinbʼaanu chixjunil aʼin xbʼaan xmaakʼaʼil innaʼlebʼ ut xbʼaan xmaakʼaʼil linpaabʼal.
14 Abʼan li Qaawaʼ numtajenaq wiʼ chik li xnimal rusilal kixkʼutbʼesi wikʼin ut wank wikʼin li paabʼal ut li rahok xbʼaan naq laaʼin jun rehebʼ li xtzolom li Kristo Jesús.
15 Li yookin xyeebʼal tzʼaqal yaal ut teekʼulubʼa chi anchal eechʼool. Li Kristo Jesús kichalk saʼ li ruuchichʼochʼ aʼin re xkolbʼalebʼ laj maak. Saʼ xyanq chixjunilebʼ laj maak, laaʼin li qʼaxal wank inmaak.
16 Abʼan kiʼuxtaanaak wu* re naq saʼ inkʼabʼaʼ, laaʼin li qʼaxal wank inmaak, li Kristo Jesús tixkʼutbʼesi li xnimal ru xkuyum naq tinxkʼe joʼ eetalil choʼq rehebʼ li teʼpaabʼanq re ut chi joʼkan teʼxtaw li junelik yuʼam.
17 Anaqwan li Awabʼej li wank chi junelik, li inkʼaʼ naqʼaak, li inkʼaʼ naʼilmank ru, li jun ajwiʼ chi Yos, re taxaq li oxloqʼiik ut li loqʼal chi junelik. Joʼkan taxaq.
18 Timoteo, at walal, ninkʼe aawe li naʼlebʼ* aʼin li naxchap ribʼ rikʼinebʼ li xeʼxye chaq chaawix ebʼ li propeet. Ebʼ li aatin aʼin ttenqʼanq aawe re naq inkʼaʼ taakanabʼ yalok joʼ jun li soldaad li naxnaw yalok chiʼus.
19 Naq yooqat xbʼaanunkil aʼin, kʼe aaqʼe re naq wanq aapaabʼal ut re naq laachʼool* inkʼaʼ tatxqʼabʼa, wankebʼ xeʼxkanabʼ xbʼaanunkil aʼin. Joʼkan naq li xpaabʼalebʼ kisach joʼ naxkʼul li jukubʼ* li naxik rubʼel haʼ.
20 Saʼ xyanq aʼin wank laj Himeneo ut laj Alejandro, li xinqʼaxtesihebʼ saʼ ruqʼ laj Tza, re naq teʼxtzol rikʼin li xqʼusbʼalebʼ naq inkʼaʼ teʼxye li inkʼaʼ us chirix li Yos.
Xtzʼaqobʼ ebʼ li naʼlebʼ
^ Aʼin naraj xyeebʼal, “li naroxloqʼi li Yos”.
^ Malaj «li toqʼobʼank u».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «ebʼ li winq li nekeʼxmux ribʼ rikʼin rechwinqilal».
^ Ebʼ laj elqʼ aʼin saʼ puʼersinbʼil nekeʼxkʼam li qas qiitzʼin.
^ Malaj «li natenqʼank».
^ Malaj «kixtoqʼobʼa wu».
^ Malaj «kitoqʼobʼaak wu».
^ Malaj «li taql».
^ Taawil xchʼolobʼankil li aatin, chʼool.
^ Malaj «li kayuuk».
