1 Timoteo 2:1-15
2 Abʼan xbʼeenwa nawaj naq textzʼaamanq, textijoq, texʼelajinq chirixebʼ li junchʼol ut texbʼanyoxinq chirix li jalan jalanq chi qas qiitzʼin,
2 chirixebʼ li awabʼej ut chirixebʼ li kʼebʼilebʼ xwankil re naq tooruuq chi wank saʼ xyaalal ut saʼ tuqtuukilal naq yooqo xloqʼoninkil li Yos chi anchal qachʼool ut xbʼaanunkil chixjunil chi chaabʼil.
3 Aʼin us ut qʼaxal chaabʼil chiru li Yos, aj Kolol qe,
4 xbʼaan naq aʼan naraj naq li jalan jalanq chi qas qiitzʼin tkoleʼq ut tixtaw li nawom li tzʼaqal re ru chirix li yaal.
5 Xbʼaan naq jun ajwiʼ li Yos ut jun ajwiʼ natenqʼank saʼ li sumwank li naxbʼaanu li Yos rikʼinebʼ li qas qiitzʼin: li winq aʼan li Kristo Jesús,
6 li kixqʼaxtesi li xyuʼam choʼq reqaj li kisachmank, ut chi joʼkan xooxkol chiqajunilo* chiru li maak. Aʼin tkʼemanq chi naweʼk saʼ li hoonal li ak xaqabʼanbʼil.
7 Aʼan ajʼe naq xinxaqabʼaak choʼq aj yeehol esil ut joʼ apóstol re naq tinruuq xtzolbʼalebʼ li maawaʼebʼ aj judiiy chirix li paabʼal ut li yaal. Yookin xyeebʼal li yaal ut inkʼaʼ nintikʼtiʼik.
8 Joʼkan bʼiʼ nawaj naq ebʼ li winq inkʼaʼ teʼxkanabʼ tijok, teʼxtaqsi li ruqʼ naq yooqebʼ chi tijok ut teʼxbʼaanu chi saq ru xchʼoolebʼ, inkʼaʼ yooqebʼ xjosqʼil chi moko teʼchoqinq naq chʼutchʼuqebʼ yalaq bʼar.
9 Joʼkan ajwiʼ, ebʼ li ixq tento teʼxtiqibʼ ribʼ chi chaabʼil joʼ nekeʼxbʼaanu ebʼ laj kʼanjel chiru li Yos, teʼxyiibʼ ribʼ chiʼus re roxloqʼinkilebʼ li junchʼol ut teʼxkʼutbʼesi naq nekeʼxnaw kʼoxlak chirix chanru teʼxyiibʼ ribʼ ut inkʼaʼ txik xchʼoolebʼ chirix chanru teʼxtzʼul li rismal, chirix roksinkil li oor malaj li chʼinaʼusil pek malaj li tertokil tʼikr,
10 texkʼutbʼesi bʼan xchaabʼilal ru xnaʼlebʼebʼ joʼ xkʼulubʼebʼ li ixq li nekeʼxye naq nekeʼxloqʼoni li Yos chi anchalebʼ xchʼool.
11 Naq li ixq yooq rabʼinkil li xtzolbʼal* inkʼaʼ tixchʼik ribʼ chi aatinak ut tixkubʼsi ribʼ.
12 Inkʼaʼ ninkʼulubʼa naq li ixq tkʼutuq chi moko ttaqlanq saʼ xbʼeen li winq; inkʼaʼ bʼan tixchʼik ribʼ chi aatinak.
13 Xbʼaan naq laj Adán kiyobʼtesiik xbʼeenwa, chirix chik aʼan li xʼEva.
14 Joʼkan ajwiʼ, moko laj Adán ta kibʼalaqʼiik, li ixq bʼan kibʼalaqʼiik ut chi joʼkan kimaakobʼk.
15 Abʼanan, us raj naq li ixq wanq xkokʼal re naq inkʼaʼ tixbʼaanu li yibʼ aj naʼlebʼ. Aʼin ttenqʼanq re wi junelik kʼojkʼo xchʼool rikʼin li Yos, naxyuʼami li rahok, nawank saʼ santilal ut wi nakʼoxlak chiʼus.
Xtzʼaqobʼ ebʼ li naʼlebʼ
^ Malaj «kixkol chixjunilebʼ li qas qiitzʼin».
^ Aʼin naraj xyeebʼal, saʼ li chʼuut.
