1 Timoteo 4:1-16
4 Abʼanan, li aatin li nachalk rikʼin li Yos* naxye chi tzʼaqal re ru naq saʼebʼ li kutan chalk re wankebʼ teʼxkanabʼ paabʼank naq teʼrabʼi ebʼ li bʼalaqʼil esil* li chanchan tawiʼ chalenaq rikʼin li Yos ut ebʼ li kʼutum li chalenaq rikʼinebʼ li maaʼus aj musiqʼej,
2 teʼrabʼi ajwiʼ li tikʼtiʼ li nekeʼxye ebʼ laj kaʼpakʼal u. Ebʼ li winq aʼin maakʼaʼ chik nekeʼrekʼa, li xchʼoolebʼ chanchan tawiʼ kʼatbʼil rikʼin tiqwal chʼiichʼ.
3 Aʼanebʼ nekeʼxye naq inkʼaʼ us li sumlaak ut nekeʼxye rehebʼ li qas qiitzʼin naq tento teʼxtzʼeqtaana li tzekemq li kixyobʼtesi li Yos re naq li wankebʼ xpaabʼal ut li nekeʼxnaw li yaal chi tzʼaqal re ru teʼxtzeka ut teʼxbʼanyoxi re li Yos.
4 Xbʼaan naq chixjunil li kixyobʼtesi li Yos qʼaxal chaabʼil ut maakʼaʼ raj ttzʼeqmanq wi nokootijok naq naqakʼul re xbʼanyoxinkil
5 xbʼaan naq nasantobʼresiik saʼ xkʼabʼaʼ li raatin li Yos ut li tijok.
6 Naq taakʼe li naʼlebʼ aʼin rehebʼ li qechpaabʼanel, taakʼutbʼesi naq chaabʼil nakatkʼanjelak chiru li Kristo Jesús. Taakʼutbʼesi ajwiʼ naq tzolbʼilat rikʼinebʼ li aatin li nokooxtenqʼa chi xpaabʼankil li Yos ut li chaabʼil kʼutum li nakaakʼe wiʼ aachʼool.
7 Abʼan tzʼeqtaana ebʼ li seeraqʼinbʼil aatin li moko yaal ta li inkʼaʼ naxnima ru li Yos joʼ li nekeʼxseeraqʼi ebʼ li xaʼan. Joʼkan ajwiʼ, kawresi aawibʼ re xloqʼoninkil li Yos chi anchal aachʼool.
8 Xbʼaan naq li naxkawresi li xtibʼel moko naabʼal ta rusilal naxtaw, abʼan li naxloqʼoni li Yos chi anchal xchʼool naabʼal rusilal naxtaw xbʼaan naq naxkʼul rosobʼtesinkil saʼebʼ li kutan aʼin ut saʼebʼ li kutan chalk re.
9 Li yookin xyeebʼal tzʼaqal yaal ut teekʼulubʼa chi anchal eechʼool.
10 Joʼkan naq kaw yooko chi kʼanjelak ut yooko xkʼebʼal qaqʼe xbʼaan naq kʼojkʼo qachʼool rikʼin li yoʼyokil Yos, aj Kolol re jalan jalanq li qas qiitzʼin, abʼan qʼaxal naxkolebʼ wiʼ chik li nekeʼkʼanjelak chiru ut nekeʼxkʼojobʼ xchʼool rikʼin.
11 Maakanabʼ xkʼebʼal ut xkʼutbʼal ebʼ li taql aʼin.
12 Maakanabʼ naq tateʼxtzʼeqtaana xbʼaan naq saajat. Kanabʼ bʼan jun chaabʼil eetalil choʼq rehebʼ li nekeʼkʼanjelak chiru li Yos ut kʼojkʼokebʼ xchʼool rikʼin ut taakʼutbʼesi aʼin rikʼin chanru nakat-aatinak, chanru nakatnaʼlebʼak, laarahom, laapaabʼal ut naq saq ru laayuʼam.
13 Maakanabʼ rilbʼal li raatin li Yos chiruhebʼ li komonil, maakanabʼ kʼehok naʼlebʼ* ut kʼutuk toj reetal naq tinwulaq.
14 Maakanabʼ xchʼolaninkil li maatan li wank aawikʼin ut li xaakʼul saʼ xkʼabʼaʼ jun li propesiiy naq jun chʼuut chi cheekel winq kixkʼe li ruqʼ saʼ xbʼeen laajolom.
15 Kʼoxla rix chixjunil aʼin; kʼe aachʼool chirix re naq chixjunilebʼ teʼxkʼe reetal chi tzʼaqal re ru naq yook chi kʼiik laapaabʼal.
16 Maakanabʼ xkʼebʼal reetal chanru laanaʼlebʼ ut chanru nakatkʼutuk. Maakanabʼ xbʼaanunkil aʼin ut chi joʼkan, tatkoleʼq laaʼat ut teʼkoleʼq ajwiʼ li teʼabʼinq aawe.
Xtzʼaqobʼ ebʼ li naʼlebʼ
^ Saʼ griego «li musiqʼej». Taawil xchʼolobʼankil li aatin, musiqʼ.
^ Saʼ griego «li musiqʼej». Li aatin saʼ griego, pnéuma. Taawil xchʼolobʼankil li aatin, musiqʼ.
^ Malaj «waklesink chʼool».
