1 Timoteo 5:1-25
5 Maawaatina chi kaw junaq li winq li ak cheek chik. Taakʼe bʼan xnaʼlebʼ joʼ taakʼe raj xnaʼlebʼ laayuwaʼ. Ut ebʼ li al li qʼaxal saajebʼ taakʼehebʼ xnaʼlebʼ joʼ taakʼehebʼ raj xnaʼlebʼ ebʼ laawas ut ebʼ laawiitzʼin,
2 ebʼ li ixq li ak cheekebʼ chik taakʼehebʼ xnaʼlebʼ joʼ taakʼe raj xnaʼlebʼ laanaʼ ut ebʼ li ixqaʼal li qʼaxal saajebʼ taakʼehebʼ xnaʼlebʼ joʼ taakʼe raj xnaʼlebʼ ebʼ laawanabʼ ut taawoxloqʼihebʼ.
3 Taawoxloqʼi ebʼ li malkaʼan li wankebʼ xjunes.*
4 Abʼan, wi jun li malkaʼan wank xkokʼal malaj ri, ebʼ aʼin xbʼeenwa teʼxtzol xkʼutbʼesinkil saʼ rochoch naq nekeʼxloqʼoni li Yos chi anchalebʼ xchʼool. Ut teʼxkʼe re li xnaʼ ut li xyuwaʼ, li xnaʼchin ut li xyuwaʼchin li xkʼulubʼebʼ xbʼaan naq aʼin nawulak chiru li Yos.
5 Joʼkan bʼiʼ, li malkaʼan li qʼaxal naraj tenqʼaak ut maakʼaʼ wank re naxkʼojobʼ xchʼool chirix li Yos ut inkʼaʼ naxkanabʼ tzʼaamank ut tijok chi qʼeq ut chi kutan.
6 Abʼan li malkaʼan li nawank saʼ joʼmaajoʼil chanchan tawiʼ kamenaq usta yoʼyo.
7 Joʼkan bʼiʼ, maakanabʼ xkʼebʼal ebʼ li naʼlebʼ* aʼin re naq maaʼani tqʼabʼanq rehebʼ.
8 Xbʼaan naq jun li qas qiitzʼin tento tixwenteni li xjunkabʼal ut qʼaxal tixwenteni li wankebʼ saʼ rochoch, wi inkʼaʼ naxbʼaanu aʼin, ak xtzʼeqtaana li xpaabʼal ut qʼaxal yibʼ wiʼ chik ru chiru li qas qiitzʼin li maakʼaʼ xpaabʼal.
9 Li malkaʼan li tkʼemanq saʼ ajl ak xket raj 60 chihabʼ ut jun ajwiʼ xbʼeelom kiwank
10 ut nawbʼilaq ru xbʼaan li xchʼinaʼusil ru xkʼanjel, joʼ xkʼirisinkilebʼ li xkokʼal, xkʼulbʼalebʼ chiʼus li qas qiitzʼin, xchʼajbʼalebʼ li roq li santil paabʼanel, xtenqʼankilebʼ li ra wankebʼ ut kixbʼaanu jalan jalanq li chaabʼil kʼanjel.
11 Abʼan, maakʼe saʼ ajl ebʼ li malkaʼan li qʼaxal saajebʼ. Naq nekeʼok xrahinkil ru wank rikʼin winq, nekeʼraj sumlaak ut aʼin naxram chiruhebʼ kʼanjelak chiru li Kriist.
12 Ebʼ li ixq aʼin teʼxtoj xmaak xbʼaan naq inkʼaʼ xeʼxbʼaanu li xeʼxyeechiʼi rubʼelaj.
13 Kʼaynaqebʼ ajwiʼ naq maakʼaʼ nekeʼxbʼaanu ut nekeʼxik chirekabʼlal. Joʼkan, moko kaʼaj tawiʼ naq maakʼaʼ nekeʼxbʼaanu, nekeʼwulak ajwiʼ chiru numsink aatin ut nekeʼxchʼik ribʼ saʼ xyuʼamebʼ li junchʼol, nekeʼxye li moko yeeheʼk ta naraj.
14 Joʼkan naq nawaj naq ebʼ li malkaʼan li qʼaxal saajebʼ teʼsumlaaq, teʼwanq xkokʼal, teʼxchʼolani li rochoch. Ut chi joʼkan inkʼaʼ teʼxbʼaanu junaq li naʼlebʼ li tixbʼaanu naq ebʼ li xikʼ nekeʼilok teʼxwechʼ qix.
15 Joʼkan ajwiʼ, wankebʼ ak xeʼxjal xbʼe re xtaqenkil laj Tza.
16 Wi jun li ixq aj paabʼanel, wank jun rech-alal li kamenaq xbʼeelom chixtenqʼaq re naq maawaʼaq iiq choʼq re li chʼuut ut chi joʼkan li chʼuut truuq xtenqʼankilebʼ li malkaʼan li wankebʼ xjunes.*
17 Ebʼ li cheekel winq qʼaxal teʼoxloqʼiiq ru xbʼaan naq us nekeʼxbʼeresi li chʼuut, abʼan qʼaxal teʼoxloqʼiiq wiʼ chik ru ebʼ li kaw nekeʼkʼanjelak naq nekeʼaatinak ut nekeʼxkʼut li raatin li Yos.
18 Xbʼaan naq jun xraqal li Raatin li Yos naxye «Maakʼe xtzʼapbʼal re li teelom wakax naq yooq risinkil rix li triiw». Ut jun chik li raqal naxye: «Laj kʼanjel xkʼulubʼ naq tkʼeheʼq xtojbʼal».
19 Maakʼaʼ taabʼaanu wi jun li qas qiitzʼin naxqʼabʼa jun li winq li ak cheek chik. Abʼan wi wank wiibʼ malaj oxibʼ li testiiw li yookebʼ chi qʼabʼank re, naru nakat-okenk.
20 Chiru li komonil taaqʼusebʼ li yookebʼ chi maakobʼk re naq ebʼ li junchʼol teʼxuwaq.
21 Ninye aawe chiru li Yos, chiru li Kristo Jesús ut chiruhebʼ li ánjel li sikʼbʼilebʼ ru naq maakanabʼ xbʼaanunkil li naʼlebʼ aʼin. Taatzʼil rix chiʼus chixjunil naq toj maajiʼ nakaabʼaanu li xaakʼoxla ut matsikʼoʼk u.
22 Maakʼe saʼ junpaat laawuqʼ saʼ xbʼeen junaq li winq.* Chi moko tat-okenq chirixebʼ li xmaak li junchʼol. Saqaq ru laanaʼlebʼ.
23 Kanabʼ rukʼbʼal li haʼ, ukʼ bʼan bʼayaq li bʼiin choʼq re laasaʼ xbʼaan naq rajlal nakatyajerk.
24 Wankebʼ nanawmank li xmaakebʼ ut saʼ xkʼabʼaʼ aʼin saʼ junpaat naraqmank aatin saʼ xbʼeenebʼ, abʼan wankebʼ toj moqon naʼelk chi kutankil li xmaakebʼ.
25 Joʼkan ajwiʼ, li chaabʼil bʼaanuhom nawbʼil chiru li komonil ut li moko nawbʼil ta chiru li komonil moko naru ta xmuqbʼal.
Xtzʼaqobʼ ebʼ li naʼlebʼ
^ Aʼin naraj xyeebʼal, naq maakʼaʼebʼ xkomon re naq teʼtenqʼaaq.
^ Malaj «ebʼ li taql».
^ Aʼin naraj xyeebʼal, naq maakʼaʼebʼ xkomon re naq teʼtenqʼaaq.
^ Aʼin naraj xyeebʼal, naq inkʼaʼ txaqabʼaaq saʼ junpaat junaq li winq saʼ li xkʼanjel.
