2 Corintios 13:1-14
13 Aʼin li rox sut naq ninkawresi wibʼ re eerulaʼaninkil: «Rikʼin raatin wiibʼ malaj oxibʼ li testiiw tchʼolaaq ru chixjunil».
2 Usta moko wankin ta aran, chanchan tawiʼ ak wankin aran xkaʼsutil. Joʼkan naq chi rubʼelaj ninye rehebʼ li xeʼmaakobʼk chaq junxil joʼ ajwiʼ rehebʼ li junchʼol naq, wi tinruuq chi sutqʼiik, meʼxkʼoxla naq inkʼaʼ teʼxkʼul xtijbʼalebʼ
3 ut chi joʼkan, tinkʼut cheeru naq li Kriist yook woksinkil re eeraatinankil. Li Kriist kaw naqʼusuk ut naxkʼutbʼesi xwankil saʼ eeyanq.
4 Yaal naq aʼan kitʼuyubʼaak chiru cheʼ naq moko kaw ta ribʼ, abʼan anaqwan yoʼyo saʼ xkʼabʼaʼ li xwankil li Yos. Ut yaal naq laaʼo ajwiʼ moko kaw ta qibʼ joʼ kixkʼul aʼan, abʼan toowanq rochbʼeen saʼ xkʼabʼaʼ li xwankil li Yos li wank saʼ eebʼeen.
5 Meekanabʼ xtzʼilbʼal rix leeyuʼam re xnawbʼal ma kaw xaqxokex saʼ leepaabʼal. Meekanabʼ xkʼutbʼesinkil anihex chi tzʼaqal. Malaj inkʼaʼ nekeekʼe reetal naq li Jesukriist wank saʼ junajil eerikʼin? Abʼanan, li Kriist inkʼaʼ twanq saʼ junajil eerikʼin wi moko wank ta rusilal li Yos eerikʼin.
6 Nawoybʼeni chi tzʼaqal naq teekʼe reetal naq wank rusilal li Yos qikʼin.
7 Nokootijok chiru li Yos re naq inkʼaʼ teebʼaanu junaq li maaʼusilal. Inkʼaʼ naqabʼaanu aʼin re naq ebʼ li junchʼol teʼril naq wank qikʼin li rusilal, naqabʼaanu bʼan re naq laaʼex teebʼaanu li us, usta wankebʼ nekeʼxkʼoxla naq maakʼaʼ qikʼin li rusilal.
8 Xbʼaan naq laaʼo inkʼaʼ naru naqaqʼet qibʼ chiru li yaal, nokookʼanjelak bʼan chirix li yaal.
9 Nasahoʼk qachʼool naq moko kaw ta qibʼ abʼan laaʼex kaw eeribʼ. Aʼin li naqatzʼaama saʼ li qatij: naq teetiikobʼresi leekʼaʼuxl.
10 Joʼkan naq nekexintzʼiibʼa naq toj maajiʼ wankin aran. Chi joʼkan naq ak wanqin aran, inkʼaʼ twoksi li wankilal li kixkʼe we li Qaawaʼ re eeqʼusbʼal, twoksi bʼan re xkawresinkil leepaabʼal ut inkʼaʼ re xjukʼbʼal.
11 Re xraqbʼal, ex wechpaabʼanel, meekanabʼ xsahobʼresinkil eechʼool, meekanabʼ xtiikobʼresinkil leekʼaʼuxl, junelik teekʼulubʼa li xkʼojobʼankil eechʼool, junelik junajaq ru leekʼaʼuxl ut wanqex saʼ tuqtuukilal, ut chi joʼkan li Xyosil li rahok ut li tuqtuukilal twanq eerikʼin.
12 Naq teekʼe xsahil eechʼool cheeribʼil eeribʼ, teetzʼubʼ eeru.
13 Chixjunilebʼ li santil paabʼanel nekextaqla xsahil leechʼool.
14 Aʼ taxaq li xnimal rusilal li Qaawaʼ Jesukriist, li xrahom li Yos ut li santil musiqʼej li nekeetaw rusilal cheejunilex, chiwanq eerikʼin.
