2 Corintios 3:1-18
3 Ma aajel ru naq tqakʼutbʼesi wiʼ chik cheeru aniho? Ma aajel ru ebʼ li esilhu li teʼaatinaq chiʼus chiqix joʼ nekeʼxbʼaanu ebʼ li junchʼol? Ma naʼajmank naq teetzʼiibʼa chiqix ebʼ li esilhu joʼ aʼin? Inkʼaʼ.
2 Laaʼex li qaʼesilhu li tzʼiibʼanbʼil saʼ li qachʼool, nawbʼil ut yaabʼasinbʼil xbʼaan chixjunilebʼ li qas qiitzʼin.
3 Chʼolchʼo naq laaʼex li esilhu li nachalk rikʼin li Kriist, li tzʼiibʼanbʼil qabʼaan joʼ aj kʼanjel. Moko tzʼiibʼanbʼil ta rikʼin bʼon, tzʼiibʼanbʼil bʼan rikʼin li xsantil musiqʼej li yoʼyokil Yos, chi moko tzʼiibʼanbʼil ta chiru perpokil pek, tzʼiibʼanbʼil bʼan saʼ leechʼool.
4 Chirix aʼin kʼojkʼo qachʼool chiru li Yos saʼ xkʼabʼaʼ li Kriist.
5 Moko laaʼo ta naqakawresi qibʼ re xbʼaanunkil junaq li kʼanjel, li Yos bʼan nokooxkawresi re xbʼaanunkil yalaq kʼaru chi kʼanjel.
6 Aʼan xooxkawresi re naq laaʼaqo aj kʼanjel chirix li akʼ sumwank, moko chirix ta li Chaqʼrabʼ, chirix bʼan li santil musiqʼej. Xbʼaan naq li Chaqʼrabʼ naxtenebʼ li kamk, abʼan li xsantil musiqʼej li Yos nakʼehok yuʼam.
7 Joʼkan bʼiʼ, li Chaqʼrabʼ li naxtenebʼ li kamk ut kitzʼiibʼamank chiru pek numtajenaq xloqʼal naq kiwulak. Joʼkan naq ebʼ li ralal xkʼajol ebʼ laj Israel inkʼaʼ nekeʼruuk rilbʼal xnaqʼ ru laj Moisés xbʼaan xlemtzʼunil. Abʼan twulaq xkutankil naq tsachmanq li loqʼal aʼin.
8 Joʼkan bʼiʼ, li Chaqʼrabʼ kikʼemank rikʼin loqʼal, abʼan li santil musiqʼej kikʼemank rikʼin naabʼal chik li loqʼal.
9 Wi li Chaqʼrabʼ li naxtenebʼ kamk saʼ xbʼeen li winq wank xloqʼal, qʼaxal wank wiʼ chik xloqʼal li kʼanjel li naxbʼaanu naq tyeemanq naq ebʼ li qas qiitzʼin tiikebʼ xchʼool.
10 Joʼkan ajwiʼ, li kixkʼul chaq xloqʼal junxil kisach li xloqʼal xbʼaan naq kiqʼaxeʼk ru xbʼaan jun chik li loqʼal.
11 Xbʼaan naq, wi li ok re chi sachmank kiwulak rikʼin loqʼal, qʼaxal wanq wiʼ chik xloqʼal li tkanaaq junelik.
12 Saʼ xkʼabʼaʼ naq yook qachʼool chirix aʼin, nokooʼaatinak chi maakʼaʼ qakʼaʼuxl
13 ut inkʼaʼ naqabʼaanu joʼ laj Moisés, li naxtzʼap li xnaqʼ ru rikʼin jun li tʼikr re naq ebʼ laj Israel inkʼaʼ teʼxkaʼya chanru traqeʼq li ok re chi sachmank.
14 Ut toj saʼebʼ li kutan aʼin, tzʼaptzʼo li xkʼaʼuxebʼ chanchan tawiʼ tzʼaptzʼo rikʼin jun li tʼikr ut inkʼaʼ nekeʼruuk xtawbʼal ru li najter sumwank. Li tʼikr aʼin naruhank risinkil saʼ xkʼabʼaʼ li Kriist.
15 Joʼkan naq, toj saʼebʼ li kutan aʼin rajlal naq nayaabʼasimank li kixtzʼiibʼa chaq laj Moisés, jun li tʼikr natzʼapok re li xchʼoolebʼ.
16 Abʼan naq jun li qas qiitzʼin nasutqʼiik rikʼin li Jehobʼa,* naʼelk li tʼikr.
17 Xbʼaan naq li Jehobʼa* aʼan musiqʼej* ut li wankebʼ rikʼin li xsantil musiqʼej li Jehobʼa* moko wankebʼ ta chik choʼq moos.
18 Chiqajunilo li xqisi li tʼikr saʼ qu chanchano ebʼ li lem li nekeʼxlemtzʼuni li xloqʼal li Jehobʼa.* Chiqajunilo yooko chi jalaak re naq chanchanaqo xjalam u li Yos ut re naq rajlal yooqo xkʼutbʼesinkil chi chaabʼil li xlemtzʼunil li xloqʼal li Jehobʼa* joʼ chanru naraj aʼan.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Li aatin saʼ griego, pnéuma. Taawil xchʼolobʼankil li aatin, musiqʼ.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Malaj «li Jehobʼa li musiqʼej». Taawil xchʼolobʼankil li aatin, Jehobʼa.
