2 Corintios 4:1-18
4 Joʼkan bʼiʼ, xqakʼul li kʼanjel aʼin saʼ xkʼabʼaʼ naq li Yos naʼuxtaanank u,* joʼkan naq inkʼaʼ naqakanabʼ xbʼaanunkil.
2 Abʼan xqatzʼeqtaana li xutaanalil naʼlebʼ li nabʼaanumank saʼ muqmu ut inkʼaʼ nokoobʼalaqʼik chi moko naqajalpaqi ru li raatin li Yos. Naqakʼe bʼan chi naweʼk li yaal ut chi joʼkan laaʼo jun chaabʼil eetalil choʼq rehebʼ li qas qiitzʼin* chiru li Yos.
3 Wi li chaabʼil esil li naqakʼe chi naweʼk muqmu rikʼin jun li tʼikr, muqmu choʼq rehebʼ li yookebʼ chi kamk,
4 choʼq rehebʼ li maawaʼebʼ aj paabʼanel li xeʼmutzʼobʼresiik xkʼaʼuxl xbʼaan li xyosil li ruuchichʼochʼ* aʼin re naq inkʼaʼ teʼruuq rilbʼal li xsaqenkil li xloqʼal li chaabʼil esil chirix li Kriist aʼ li xjalam u li Yos.
5 Xbʼaan naq moko chiqix ta naqakʼe chi naweʼk, naqakʼe bʼan chi naweʼk naq li Jesukriist aʼan li Qaawaʼ ut naq laaʼo wanko choʼq eemoos saʼ xkʼabʼaʼ li Jesús.
6 Xbʼaan naq li Yos kixye aʼin: «Chilemtzʼunq li saqenk saʼ xchamal li qʼoqyink». Ut aʼan xkutanobʼresi li qachʼool rikʼin xnimal xnawom li Yos saʼ xkʼabʼaʼ li xnaqʼ ru li Kriist.
7 Abʼanan, li Yos kixkʼe qe li nimla kʼanjel aʼin, usta laaʼo chanchano li pakʼbʼil sekʼ bʼarwiʼ naxokmank li qʼaxal loqʼ. Ut aʼin naxkʼutbʼesi chi tzʼaqal re ru naq wank qikʼin li wankilal, li inkʼaʼ nekeʼruuk xtawbʼal ebʼ li qas qiitzʼin. Li wankilal aʼin moko chalenaq ta qikʼin chalenaq bʼan rikʼin li Yos.
8 Sutsuko xbʼaanebʼ li chʼaʼajkilal abʼan moko tzʼaptzʼoko ta chi junajwa, xwiibʼank ru li qachʼool abʼan tooruuq chi elk chiʼubʼej.
9 Xikʼ nokooʼeʼril abʼan moko kanabʼanbʼilo ta qajunes, yook qakʼaʼuxl abʼan naqakuy xnumsinkil.
10 Junelik naqakuy xnumsinkil li rahilal li kixkuy li Jesús ut aʼin naxkʼutbʼesi chiruhebʼ li qas qiitzʼin naq nokoorahobʼtesiik joʼ kirahobʼtesiik li Jesús.
11 Saʼ li qayuʼam junelik naqil ru li kamk saʼ xkʼabʼaʼ li Jesús. Aʼin nakʼanjelak re xkʼutbʼesinkil chiruhebʼ li qas qiitzʼin naq nokoorahobʼtesiik joʼ kirahobʼtesiik li Jesús.
12 Usta laaʼo rajlal naqil ru li kamk, aʼin naxkʼam chaq yuʼam choʼq eere.
13 Aʼin li tzʼiibʼanbʼil: «Xwank linpaabʼal joʼkan naq xinʼaatinak». Laaʼo ajwiʼ wank qikʼin li paabʼal aʼin joʼkan naq nokooʼaatinak.
14 Chʼolchʼo naq li kiwaklesink re chi yoʼyo li Jesús, tooxwaklesi ajwiʼ chi yoʼyo laaʼo re naq toowanq rochbʼeen li Jesús ut tooxkʼam chiru li Jesús.
15 Chixjunil aʼin natenqʼank eere re naq li xnimal rusilal li Yos qʼaxal tkʼihanq wiʼ chik chiʼus saʼ xkʼabʼaʼ naq naabʼalebʼ li qas qiitzʼin nekeʼbʼanyoxink re xkʼebʼal xloqʼal li Yos.
16 Joʼkan bʼiʼ, miqakanabʼ kʼanjelak chiru li Yos. Usta li qatibʼel yook chi osoʼk, chʼolchʼo naq li wank saʼ li qachʼool yook chi akʼoʼk rajlal kutan.
17 Usta ebʼ li chʼaʼajkilal* junpaat ajwiʼ nekeʼwank ut moko nimebʼ ta, ebʼ li chʼaʼajkilal aʼin nekeʼxbʼaanu naq tqakʼul li loqʼal li inkʼaʼ naxkanabʼ kʼiik ut wank chi junelik.
18 Ut inkʼaʼ tqakanabʼ xkaʼyankil li inkʼaʼ naʼilmank ru ut maawaʼ li naʼilmank ru. Xbʼaan naq li naʼilmank ru junpaat ajwiʼ nawank, ut li inkʼaʼ naʼilmank ru wanq chi junelik.
Xtzʼaqobʼ ebʼ li naʼlebʼ
^ Malaj «natoqʼobʼank u».
^ Saʼ griego «li xchʼoolebʼ li qas qiitzʼin». Taawil xchʼolobʼankil li aatin, chʼool.
^ Taawil xchʼolobʼankil li aatin, ruuchichʼochʼ.
^ Malaj «ebʼ li aaleek».
