2 Corintios 6:1-18
6 Joʼ aj tenqʼahom re, naqatzʼaama ajwiʼ cheeru naq meekʼulubʼa li xnimal rusilal li Yos ut moqon inkʼaʼ chik teekʼe eechʼool chirix aʼin.
2 Xbʼaan naq aʼan naxye: «Xatwabʼi naq xwulak xhoonalil re naq twusila aawu. Ut xatintenqʼa naq xwulak xhoonalil li kolbʼa ibʼ». Aʼin xhoonalil re naq li Yos trusila qu! Ut aʼin xhoonalil re naq li Yos tooxkol!
3 Laaʼo moko yooko ta xbʼaanunkil junaq li naʼlebʼ li tixkʼe chi tichkʼok ebʼ li junchʼol re naq chi joʼkan maaʼani tixtaw xpaltil li qakʼanjel.
4 Naqakʼutbʼesi bʼan naq laaʼo aj kʼanjel chiru li Yos saʼ chixjunil li naqabʼaanu. Naqakuy xnumsinkil naabʼal li aaleek, li rahilal, li wank saʼ rajbʼal ru, li chʼaʼajkilal,
5 naqakuy xnumsinkil li sakʼeʼk, li wank saʼ tzʼalam, li mululink ibʼ, li kawil kʼanjel, naqakuy qawara ut wank sut naqakuy qasaʼ,
6 wanko chi saq ru qayuʼam, naqakʼutbʼesi naq wank qanaʼlebʼ, wank qakuyum ut chaabʼilo, naqakanabʼ naq li santil musiqʼej tbʼeresinq qe, naqakʼutbʼesi naq nokoorahok abʼan inkʼaʼ saʼ kaʼpakʼal u,
7 junelik naqaye li yaal, naqakʼojobʼ qachʼool rikʼin li xwankil li Yos, naqachap li xkʼanjelobʼaal li tiikilal rikʼin li qanim uqʼ* ut li qatzʼe uqʼ,*
8 naq nekeʼxnima qu malaj naq nekeʼxkubʼsi qawankil, naq us malaj naq inkʼaʼ us nekeʼaatinak chiqix. Nokooʼeʼril joʼ aj tikʼtiʼ usta naqaye li yaal,
9 chanchan tawiʼ inkʼaʼ nekeʼxnaw qu usta nekeʼxnaw qu chiʼus, chanchan tawiʼ yooko chi kamk* usta yoʼyoko, usta xooʼeʼxrahobʼtesi inkʼaʼ xookamk,
10 chanchan tawiʼ ra qachʼool usta junelik sa qachʼool, chanchan tawiʼ nebʼaʼo usta naqabʼihomobʼresi naabʼal li qas qiitzʼin, chanchan tawiʼ maakʼaʼ li kʼaru qe usta wank chixjunil li naqaj.
11 Ex aj Corinto, xqate li xtzʼuumal qe re eeraatinankil* ut xqate ajwiʼ li qachʼool cheeru.
12 Laaʼo inkʼaʼ xqaram cheeru li qarahom abʼan laaʼex xeeram chiqu leerahom.
13 Joʼkan naq, yookin eeraatinankil chanchan tawiʼ laaʼex walal inkʼajol, kʼulumaq li qarahom ut teehomaq leechʼool chiqu.
14 Meejunaji eeribʼ rikʼinebʼ li maawaʼebʼ aj paabʼanel. Xbʼaan naq, ma naxchap ribʼ li tiikilal rikʼin li maaʼusilal?* Ma naxkʼul ribʼ li saqenk rikʼin li qʼoqyink?
15 Joʼkan ajwiʼ, ma wank saʼ aatin li Kriist rikʼin laj Tza?* Ma juntaqʼeet laj paabʼanel rikʼin li maawaʼ aj paabʼanel?
16 Ut ma wank saʼ aatin li rochoch li Yos rikʼinebʼ li pechʼbʼil Yos? Xbʼaan naq laaʼo li rochoch jun li yoʼyokil Yos, joʼ kixye chaq li Yos: «Laaʼin wanqin rikʼinebʼ ut wanqin saʼ xyanqebʼ ut laaʼinaq Xyosebʼ ut aʼanaqebʼ lintenamit».
17 «Joʼkan naq elenqex ut isihomaq eeribʼ saʼ xyanqebʼ (chan li Jehobʼa)* ut kanabʼomaq xchʼeʼbʼal li tzʼaj ru», «ut laaʼin texinkʼul».
18 «“Ut laaʼinaq leeyuwaʼ, ut laaʼexaq li walal ut ebʼ linrabʼin”, chan li Jehobʼa,* li Nimajwal».
Xtzʼaqobʼ ebʼ li naʼlebʼ
^ Maare re sakʼok.
^ Maare re xkolbʼal ribʼ.
^ Malaj «chanchan tawiʼ qakʼulubʼ kamk».
^ Malaj «xexqaatina chi maakʼaʼ qakʼaʼuxl».
^ Saʼ griego «xqʼetbʼal li chaqʼrabʼ», aʼin naraj xyeebʼal, xtzʼeqtaanankil li chaqʼrabʼ li Yos.
^ Saʼ griego «Belial». Li kʼabʼaʼej aʼin chalenaq saʼ hebreo li naraj xyeebʼal “maakʼaʼ naʼok wiʼ”.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
