2 Juan 1:1-13
1 Laaʼin li winq li cheekin chik ut yookin aatzʼiibʼankil at ixq,* li sikʼbʼil aawu xbʼaan li Yos, joʼ ajwiʼ ebʼ laawalal aakʼajol. Relik chi yaal naq nekexinra abʼan moko kaʼaj tawiʼ laaʼin, nekexra ajwiʼ ebʼ li nekeʼxnaw li tzʼaqal kʼutum,
2 saʼ xkʼabʼaʼ li yaal li wank qikʼin ut twanq saʼ li qachʼool chi junelik.
3 Li Yos, li Yuwaʼbʼej li wank saʼ choxa, ut li Jesukriist, li Ralal, teʼxkʼe qe li tzʼaqal kʼutum ut li rahok. Aʼanebʼ teʼxkʼe qe li xnimal rusilal, teʼruxtaana qu* ut teʼxkʼe qe li tuqtuukilal.
4 Qʼaxal xsahoʼk inchʼool xnawbʼal naq wiibʼ oxibʼ rehebʼ laawalal aakʼajol inkʼaʼ nekeʼxkanabʼ wank saʼ xbʼehil li yaal joʼ naxye li chaqʼrabʼ li xqakʼul rikʼin li Yuwaʼbʼej.
5 Joʼkan naq anaqwan nintzʼaama chaawu at ixq* naq tqara qibʼ chiqibʼil qibʼ. (Inkʼaʼ nintzʼiibʼa aawe jun akʼ chaqʼrabʼ, nintzʼiibʼa bʼan jun li chaqʼrabʼ li wank qikʼin chalen chaq saʼ xtiklajik).
6 Aʼin naraj xyeebʼal li rahok: naq inkʼaʼ tqakanabʼ wank joʼ naxye li xchaqʼrabʼ. Joʼ chanru xeerabʼi chalen chaq saʼ xtiklajik, li chaqʼrabʼ aʼan aʼin: junelik teekʼutbʼesi li rahok.
7 Xbʼaan naq ak xeʼwaklijeʼk chaq saʼ ruuchichʼochʼ naabʼalebʼ aj bʼalaqʼ, ebʼ aʼin nekeʼxye naq inkʼaʼ nekeʼxpaabʼ naq li Jesukriist kichalk saʼ tibʼelej. Aʼin laj bʼalaqʼ ut li naxtzʼeqtaana li Kriist.
8 Weent teebʼaanu re naq inkʼaʼ teesach chirix li xqakʼe wiʼ chaq qachʼool chi kʼanjelak ut re naq teekʼul chixjunil li osobʼtesink li kixkawresi li Yos choʼq eere.
9 Li inkʼaʼ naxyuʼami li xkʼutum li Kriist ut naxkʼe xtzʼaqobʼ inkʼaʼ naxtaw rusilal li Yos. Li inkʼaʼ naxkanabʼ xyuʼaminkil li xkʼutum li Kriist, naxtaw rusilal li Yuwaʼbʼej ut li Alalbʼej.
10 Wi junaq li qas qiitzʼin nachalk eerikʼin ut inkʼaʼ naxkʼam chaq li kʼutum aʼin, meekʼul saʼ leerochoch chi moko teekʼe xsahil xchʼool.
11 Xbʼaan naq li naxkʼe xsahil xchʼool li qas qiitzʼin aʼin natzʼaqonk chirix li xmaaʼusilal.
12 Usta toj wank naabʼal li tintzʼiibʼa eere, inkʼaʼ nawaj xbʼaanunkil chiru hu ut rikʼin bʼon, nawoybʼeni bʼan naq tinxik eerilbʼal ut tinʼaatinaq eerikʼin re naq qʼaxal tsahoʼq saʼ leechʼool.
13 Li ralal xkʼajol laawas ixq,* li sikʼbʼil ru, nekeʼxtaqla xsahil laachʼool.
Xtzʼaqobʼ ebʼ li naʼlebʼ
^ Malaj «qanaʼchin».
^ Malaj «teʼxtoqʼobʼa qu».
^ Malaj «qanaʼchin».
^ Malaj «laachaqʼ».
