2 Pedro 2:1-22
2 Abʼanan, joʼ chanru xeʼwank bʼalaqʼil propeet saʼ xyanq li tenamit, teʼwanq ajwiʼ saʼ eeyanq ebʼ aj kʼutunel li inkʼaʼ nekeʼxye li yaal. Teʼxkʼam chaq li jachok ibʼ saʼ eeyanq re xsachbʼal leepaabʼal toj reetal teetzʼeqtaana li kiloqʼok eere. Ut saʼ xkʼabʼaʼ naq nekeʼnaʼlebʼak chi joʼkan, teʼsacheʼq saʼ junpaat.
2 Joʼkan ajwiʼ naabʼalebʼ teʼoq chi maakobʼk chi maakʼaʼebʼ xxutaan* joʼ aʼanebʼ ut saʼ xmaakebʼ teʼxye li yibʼ aj aatin chirix li xbʼehil li yaal.
3 Ut saʼ xkʼabʼaʼ naq inkʼaʼ nekeʼkʼojlaak xchʼool teʼxyal eeqʼunbʼesinkil rikʼin bʼalaqʼil aatin. Abʼan li tojbʼamaak li kixaqabʼamank junxil choʼq rehebʼ inkʼaʼ tbʼayq ut chʼolchʼo naq teʼsacheʼq.
4 Joʼkan naq li Yos kixkʼehebʼ chi xtojbʼal xmaak ebʼ li ánjel li xeʼmaakobʼk ut kixkutebʼ saʼ li Tártaro,* kixbʼakʼebʼ* chi kareen saʼ chamal qʼoqyink re naq teʼroybʼeni li raqok aatin li tchalq saʼ xbʼeenebʼ.
5 Kixkʼe ajwiʼ chi xtojbʼal xmaak ebʼ li qas qiitzʼin li xeʼwank chaq junxil, abʼan kixkol laj Noé li kixkʼe chi naweʼk li tiikilal rochbʼeen wuqubʼ chik li qas qiitzʼin naq kixkʼam chaq jun li bʼutʼihaʼ saʼ xbʼeenebʼ li inkʼaʼ nekeʼroxloqʼi li Yos.
6 Ut kixkʼe chi xtojbʼal xmaak li tenamit Sodoom ut Gomoor naq kixkʼatebʼ toj reetal xeʼchahoʼk ut chi joʼkan kixkʼut chiruhebʼ li inkʼaʼ nekeʼroxloqʼi li Yos li tkʼulmanq rikʼinebʼ.
7 Kixkol ajwiʼ laj Lot li tiik xchʼool. Laj Lot qʼaxal yook chaq xkʼaʼuxl xbʼaan naq li maaʼusebʼ xnaʼlebʼ* yookebʼ chi maakobʼk chi maakʼaʼebʼ xxutaan.*
8 Joʼkan naq li winq aʼin li tiik xchʼool wank chaq saʼ xyanqebʼ li qas qiitzʼin li qʼaxal maaʼusebʼ xnaʼlebʼ, ra chaq xchʼool rajlal kutan xbʼaan naq naril li nekeʼxbʼaanu ut narabʼi li nekeʼxye.
9 Joʼkan naq li Jehobʼa* naxnaw chanru tixkol chiruhebʼ li chʼaʼajkilal li nekeʼloqʼonink re ut naxkʼulahebʼ li inkʼaʼ tiikebʼ xchʼool re naq teʼosoʼq saʼ xkutankil li raqbʼa aatin
10 ut ma tojaʼ ta chik inkʼaʼ tixsachebʼ li nekeʼraj xtzʼajninkil li xtibʼel ebʼ li junchʼol ut nekeʼxtzʼeqtaana li wankebʼ xwankil.
Ut saʼ xkʼabʼaʼ naq yal nekeʼxkut saʼ rehebʼ ut kawebʼ xjolom, inkʼaʼ nekeʼxuwak chi xhobʼalebʼ li kʼebʼilebʼ xloqʼal xbʼaan li Yos.
11 Abʼanan, usta ebʼ li ánjel wankebʼ xmetzʼew ut xwankil moko nekeʼxhobʼ ta ebʼ li qas qiitzʼin aʼin xbʼaan naq ebʼ li ánjel nekeʼroxloqʼi li Jehobʼa.*
12 Abʼan, ebʼ li winq aʼin chanchanebʼ li xul, xeʼyobʼtesiik re naq teʼchapeʼq ut re naq teʼosoʼq, nekeʼxye li inkʼaʼ us chirix li inkʼaʼ nekeʼxnaw. Teʼosoʼq saʼ xkʼabʼaʼ li xmaaʼus aj naʼlebʼ
13 ut teʼkʼeheʼq chi xtojbʼal xmaak saʼ xkʼabʼaʼ li xmaaʼusilalebʼ.
Kʼajoʼ nekeʼwulak chiru waʼak, ukʼak ut ninqʼehik saʼ joʼmajoʼil, usta kutan! Chanchanebʼ li tzʼaj li wank chiru li tʼikr ut joʼ li tochʼolal li wank saʼ xnaqʼ ru junaq li qas qiitzʼin. Naq wankebʼ eerochbʼeen saʼ jun nimla waʼak, sa nekeʼril xseeraqʼinkil li bʼalaqʼil kʼutum.
14 Kʼajoʼ nekeʼxrahi ru muxuk sumlaak.* Inkʼaʼ nekeʼruuk xkanabʼankil li maak ut nekeʼxkʼe chi tʼaneʼk li moko kawebʼ ta xpaabʼal. Qʼaxal seebʼebʼ xchʼool chi xkʼutbʼesinkil naq inkʼaʼ nekeʼkʼojlaak xchʼool. Li Yos tixkʼehebʼ chi xtojbʼal xmaak.
15 Naq xeʼxkanabʼ li tiikil bʼe, xeʼjaleʼk li xbʼe. Xeʼxtaqe li xbʼe laj Balaam ralal laj Beor. Aʼan kixbʼaanu li inkʼaʼ us xbʼaan naq kiraj xkʼulbʼal li xqʼajkamunkil
16 abʼan kiqʼuseʼk xbʼaan naq kixqʼet ribʼ chiru li us. Jun li bʼuur li inkʼaʼ naru chi aatinak, kiʼaatinak. Ut kixram chiru li propeet xbʼaanunkil li memil naʼlebʼ.
17 Ebʼ aʼan chanchanebʼ li yuʼamhaʼ li maakʼaʼ haʼ chisaʼ ut joʼebʼ li choql li kʼambʼilebʼ xbʼaan li kawil iqʼ ut kʼulanbʼil li chamal qʼoqyink choʼq rehebʼ.
18 Xbʼaan naq li nekeʼxye chanchan tawiʼ wank xwankil abʼan maakʼaʼ naʼok wiʼ. Ebʼ aʼan nekeʼmaakobʼk chi maakʼaʼebʼ xxutaan* ut nekeʼxbʼaanu naq ebʼ li junchʼol teʼmaakobʼq wiʼ chik. Nekeʼqʼunbʼesiik re naq teʼxbʼaanu li maaʼusilal li tojaʼ xeʼxkanabʼ xbʼaanunkil.
19 Usta nekeʼxye rehebʼ naq teʼelq chi moosil, ebʼ aʼan wankebʼ choʼq xmoos li maak. Xbʼaan naq li naqʼaxeʼk ru xbʼaan anihaq* nakanaak choʼq xmoos li qas qiitzʼin aʼin.
20 Wi ak xeʼxkanabʼ xbʼaanunkil li xmaaʼusilal li ruuchichʼochʼ saʼ xkʼabʼaʼ li nawom li tzʼaqal re ru chirix li Qaawaʼ Jesukriist, aj Kolonel, ut nekeʼok wiʼ chik xbʼaanunkil li yibʼru aj naʼlebʼ ut nekeʼqʼaxeʼk xbʼaan, aʼin qʼaxal yibʼru chiru naq inkʼaʼ nekeʼxnaw chaq li tzʼaqal kʼutum.
21 Qʼaxal us raj choʼq rehebʼ naq inkʼaʼ xeʼxnaw chi tzʼaqal re ru xbʼehil li tiikilal chiru xnawbʼal ut chirix chik aʼan teʼxkanabʼ li santil chaqʼrabʼ li xeʼxkʼul chaq.
22 Xeʼxkʼul tzʼaqal joʼ naxye jun li aatin: «Li tzʼiʼ kixlow wiʼ chik li xxaʼaw ut li aaq* li ak xʼatisiik, xtolkʼosi ribʼ wiʼ chik saʼ sulul».
Xtzʼaqobʼ ebʼ li naʼlebʼ
^ Li aatin saʼ griego, asélgueia. Taawil xchʼolobʼankil li aatin, maakobʼk chi maakʼaʼ li xutaan.
^ Taawil xchʼolobʼankil li aatin, Tártaro.
^ Maare «kixkʼehebʼ saʼ jul».
^ Malaj «li nekeʼxqʼet li chaqʼrabʼ».
^ Li aatin saʼ griego, asélgueia. Taawil xchʼolobʼankil li aatin, maakobʼk chi maakʼaʼ li xutaan.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Malaj «muxuk kaxaar».
^ Li aatin saʼ griego, asélgueia. Taawil xchʼolobʼankil li aatin, maakobʼk chi maakʼaʼ li xutaan.
^ Malaj «kʼaruhaq».
^ Malaj «li kuy».
