2 Tesalonicenses 2:1-17
2 Ex wechpaabʼanel laaʼex nekeenaw naq li Qaawaʼ Jesukriist ak wanq arin* ut nekeenaw ajwiʼ naq toochʼutubʼaaq rochbʼeen aʼan. Abʼanan naqatzʼaama cheeru
2 naq junelik texkʼoxlaq chiʼus ut mexxuwak wi junaq li qas qiitzʼin tixye eere naq li xkutankil li Jehobʼa* ak wank arin. Chi moko t-oq eekʼaʼuxl usta nekeʼxye eere naq li esil aʼin nachalk rikʼin li Yos* malaj teerabʼi aʼin rikʼin junaq li qas qiitzʼin malaj teeril saʼ junaq li esilhu naq yookebʼ xyeebʼal naq laaʼo xootzʼiibʼank re aʼin.
3 Maaʼani taxaq tbʼalaqʼinq eere xbʼaan naq xbʼeenwa tchalq li qʼetok ibʼ chiru li Yos ut tkʼutbʼesimanq li winq li maaʼus xnaʼlebʼ ut naxqʼet li chaqʼrabʼ. Li winq aʼin t-osoʼq. Ut chirix chik aʼan tchalq li kutan aʼin.
4 Xikʼ naʼilok ut naxnima ribʼ saʼ xbʼeen chixjunil li naxkʼe ribʼ joʼ yos malaj li naloqʼoniik ru joʼkan naq nachunlaak saʼ rochoch li Yos ut naxkʼut ribʼ chiru li komonil joʼ yos.
5 Ma inkʼaʼ jultik eere naq xinye chaq eere chixjunil aʼin naq wankin chaq saʼ eeyanq?
6 Anaqwan nekeenaw ani naramok re li winq li maaʼus xnaʼlebʼ re naq tkʼutbʼesimanq saʼebʼ li kutan li ak xaqabʼanbʼil.
7 Yaal, li xmaaʼusilal li winq aʼin wank chi muqmu ut ak yook chi kʼanjelak, abʼan li xmaaʼusilal wanq chi muqmu toj reetal naq maaʼanihaq chik li naramok re.
8 Tojaʼ naq li winq li naxqʼet li chaqʼrabʼ tkʼutbʼesimanq. Ut li Qaawaʼ Jesús troksi li xwankil li raatin re naq t-osoʼq li winq aʼin ut tkʼulmanq aʼin naq tkʼemanq chi naweʼk naq li Jesús ak wanq arin.*
9 Abʼan li winq li naxqʼet li chaqʼrabʼ naxkʼut ribʼ saʼ xkʼabʼaʼ laj Tza. Laj Tza nakʼehok re xwankil re naq tixbʼaanu jalan jalanq ebʼ li xninqal ru bʼaanuhom, ebʼ li xninqal ru naʼlebʼ ut ebʼ li bʼalaqʼil sachbʼachʼoolej
10 ut li jalan jalanq chi naʼlebʼ li naxkʼam chaq li bʼalaqʼik ut li inkʼaʼ us. Li naʼlebʼ aʼin naxbʼalaqʼi ebʼ li qas qiitzʼin li teʼosoʼq.* Ut teʼxtoj rix li xmaak rikʼin li osoʼk xbʼaan naq inkʼaʼ xeʼxkʼulubʼa ut inkʼaʼ xeʼraj li yaal. Wi xeʼxkʼulubʼa raj, xeʼruuk raj chi koleʼk.
11 Joʼkan naq li Yos kixkanabʼ naq teʼbʼalaqʼiiq rikʼin bʼalaqʼil kʼutum re naq teʼxpaabʼ li tikʼtiʼ
12 re naq traqmanq aatin saʼ xbʼeen chixjunilebʼ xbʼaan naq inkʼaʼ xeʼxpaabʼ li yaal, xeʼsahoʼk bʼan saʼ xchʼool chi xbʼaanunkil li inkʼaʼ us.
13 Abʼanan, ex wechpaabʼanel li raarokex xbʼaan li Jehobʼa* junelik naqekʼa naq tento toobʼanyoxinq cheerix chiru li Yos xbʼaan naq chalen saʼ xtiklajik li Yos kixsikʼ eeru re naq texkoleʼq naq xexsantobʼresi rikʼin li xsantil musiqʼej* ut saʼ xkʼabʼaʼ leepaabʼal chirix li yaal.
14 Aʼan xexbʼoq saʼ xkʼabʼaʼ li chaabʼil esil li naqakʼe chi naweʼk re naq texruuq xtawbʼal li xloqʼal li Qaawaʼ Jesukriist.
15 Joʼkan naq ex qechpaabʼanel, kaw xaqxoqex ut chapomaq chi kaw li xkʼutmank cheeru aʼ yaal ma chi aatinanbʼil malaj rikʼin li qaʼesilhu.
16 Joʼkan ajwiʼ aʼ taxaq li Qaawaʼ Jesukriist ut li Yos, li Qayuwaʼ, li xooxra ut kixkʼe qe li kʼojobʼank chʼool li inkʼaʼ naraqeʼk ut kixkʼe ajwiʼ qe jun li oybʼenihom li tzʼaqal re ru saʼ xkʼabʼaʼ li xnimal rusilal,
17 teʼxkʼojobʼ ut teʼxwaklesi leechʼool re naq junelik teeye ut teebʼaanu li us.
Xtzʼaqobʼ ebʼ li naʼlebʼ
^ Li aatin saʼ griego, parousía. Taawil xchʼolobʼankil li aatin, ak wanq arin.
^ Taawil xchʼolobʼankil li aatin, Jehobʼa.
^ Malaj «li musiqʼej». Taawil xchʼolobʼankil li aatin, musiqʼ.
^ Li aatin saʼ griego, parousía. Taawil xchʼolobʼankil li aatin, ak wanq arin.
^ Malaj «li yookebʼ chi kamk».
^ Taawil xchʼolobʼankil li aatin, Jehobʼa.
^ Li aatin saʼ griego, pnéuma. Taawil xchʼolobʼankil li aatin, musiqʼ.