2 Timoteo 4:1-22
4 Chiru li Yos ut chiru li Kristo Jesús, li traqoq aatin saʼ xbʼeenebʼ li yoʼyo ut saʼ xbʼeenebʼ li kamenaq, naq aʼan ut li Xʼawabʼejilal tkʼutbʼesimanq, ninye aawe naq tento taabʼaanu aʼin:
2 Taakʼe chi naweʼk li raatin li Yos ut matbʼayk chi xbʼaanunkil ut taabʼaanu naq wanq li chʼaʼajkilal joʼ ajwiʼ naq maakʼaʼaq li chʼaʼajkilal; taaye rehebʼ saʼ kʼaru chi naʼlebʼ yookebʼ chi paltoʼk, qʼusebʼ re naq weent teʼxbʼaanu ut taakʼehebʼ xnaʼlebʼ abʼan taabʼaanu chixjunil aʼin rikʼin xnimal laakuyum ut taatzolebʼ chiʼus.
3 Xbʼaan naq twulaq xhoonalil naq aʼanebʼ inkʼaʼ chik teʼraj rabʼinkil li kʼutum li qʼaxal chaabʼil*, teʼxbʼaanu bʼan li nekeʼxrahi ru, teʼxsikʼ ebʼ laj kʼutunel li teʼxye rehebʼ li nekeʼraj rabʼinkil.
4 Teʼxkanabʼ rabʼinkil li yaal ut teʼxkʼe xchʼool chirix ebʼ li seeraqʼinbʼil aatin li moko yaal ta.
5 Abʼan laaʼat taakʼoxla chiʼus chixjunil li taabʼaanu, taakuy ebʼ li chʼaʼajkilal, maakanabʼ xkʼebʼal chi naweʼk li chaabʼil esil ut taabʼaanu chi tzʼaqal re ru laakʼanjel.
6 Xbʼaan naq yookin chi hoyeʼk joʼ li hoybʼil mayej ut chʼolchʼo naq yook chi nachʼok xkutankil linkamik.
7 Xinkʼe inqʼe saʼ li chaabʼil yalok, ak xinraqeʼk chi aanilak, maajunwa xinkanabʼ xpaabʼankil li Yos.
8 Chalen anaqwan li Qaawaʼ, li naraqok aatin saʼ tiikilal, ak xkawresi jun li koroon choʼq we. Li koroon aʼin choʼq rehebʼ li tiikebʼ xchʼool. Ut tixkʼe we aʼin re inqʼajkamunkil saʼ li kutan aʼan. Abʼan moko kaʼaj tawiʼ we tixkʼe, tixkʼe ajwiʼ re chixjunilebʼ li yookebʼ roybʼeninkil chi anchalebʼ xchʼool naq tixkʼutbʼesi ribʼ.
9 Bʼaanu chixjunil li wank saʼ laawuqʼ re naq tatchalq chi wilbʼal saʼ junpaat.
10 Xbʼaan naq laj Demas xkoho Tesalónica ut xinxkanabʼ xbʼaan naq xkoho xchʼool chirix li ruuchichʼochʼ* aʼin; laj Crescente xkoho Galacia ut laj Tito xkoho Dalmacia.
11 Kaʼajwiʼ laj Lucas wank wikʼin. Kʼam chaq chaawix laj Marcos xbʼaan naq aʼan nikinxtenqʼa saʼ li xkʼanjel li Yos.
12 Xintaqla laj Tíquico aran Éfeso.
13 Naq tatchalq, taakʼam chaq linkaap li xinkanabʼ saʼ rochoch laj Carpo aran Troas ut taakʼam chaq ajwiʼ li bʼotbʼilhu abʼan li qʼaxal nawaj aʼan li tzʼuum ru.
14 Laj Alejandro, li nakʼanjelak rikʼin qʼanchʼiichʼ,* kʼajoʼ li maaʼusilal kixbʼaanu we. Li Jehobʼa* tkʼehoq re chi xtojbʼal xmaak.
15 Laaʼat ajwiʼ weent taabʼaanu rikʼin li winq aʼin xbʼaan naq kixram li qaatin.
16 Naq xinxaqabʼaak xbʼeen sut chiruhebʼ li wankebʼ xwankil re xkolbʼal wibʼ maaʼani kiʼochbʼeenink we, xineʼxkanabʼ bʼan injunes. Inkʼaʼ nawaj naq saʼ xkʼabʼaʼ aʼin teʼkʼeheʼq xtojbʼal xmaak.
17 Abʼanan, li Qaawaʼ kitenqʼank we, kixkʼe inmetzʼew ut xinxkol saʼ re li kaqkoj re naq saʼ inkʼabʼaʼ tkʼemanq chi naweʼk re chixjunilebʼ li tenamit li raatin li Yos chi tzʼaqal re ru.
18 Li Qaawaʼ tkoloq we chiru chixjunil li maaʼusilal ut tinxkol choʼq re li Xʼawabʼejilal li wank saʼ choxa. Aʼan taxaq chikʼemanq xloqʼal chi junelik. Joʼkan taxaq.
19 Teekʼe xsahil xchʼool li xPrisca ut laj Áquila joʼ ajwiʼ li wankebʼ saʼ rochoch laj Onesíforo.
20 Laj Erasto kikanaak aran Corinto ut xinkanabʼ laj Trófimo aran Mileto xbʼaan naq yaj.
21 Bʼaanu chixjunil li wank saʼ laawuqʼ re naq ak wanqat arin naq ttiklaaq li habʼalqʼe.
Laj Eubulo naxtaqla xsahil laachʼool joʼ ajwiʼ laj Pudente, laj Lino ut li xClaudia ut chixjunilebʼ li qechpaabʼanel.
22 Nintijok re naq laakʼaʼuxl tixchap ribʼ rikʼin li rajom li Qaawaʼ. Ut tixkʼe taxaq eere li rusilal li qʼaxal nim.
Xtzʼaqobʼ ebʼ li naʼlebʼ
^ Malaj «li natenqʼank».
^ Taawil xchʼolobʼankil li aatin, ruuchichʼochʼ.
^ Malaj «cobre».
^ Taawil xchʼolobʼankil li aatin, Jehobʼa.
