Filemón 1:1-25
1 Laaʼin laj Pablo li wankin saʼ tzʼalam saʼ xkʼabʼaʼ li Kristo Jesús rochbʼeen laj Timoteo nintzʼiibʼa li esilhu re laj Filemón, li qechpaabʼanel ut qechkʼanjel li raaro qabʼaan,
2 joʼ ajwiʼ li xʼApfia, li qechpaabʼanel, ut laj Arquipo, li kaw nakʼanjelak qochbʼeen joʼ jun li soldaad, ut ebʼ li qechpaabʼanel li nekeʼchʼutlaak saʼ laawochoch:
3 Chiwanq taxaq eerikʼin li xnimal rusilal ut li xtuqtuukilal li Yos, li Qayuwaʼ, ut li Qaawaʼ Jesukriist.
4 Naq nintijok chiru Linyos junelik nintzʼaamank chaawix
5 xbʼaan naq rajlal yookin rabʼinkil naq nakaapaabʼ ut nakaara li Qaawaʼ Jesús ut chixjunilebʼ li santil paabʼanel.
6 Nintijok re naq laapaabʼal ut li xpaabʼalebʼ li junchʼol ttenqʼanq aawe chi xkʼebʼal reetal naq chixjunil li qosobʼtesinkil nachalk saʼ xkʼabʼaʼ li Kriist.
7 Xsahoʼk ut xwaklesi tzʼaqal linchʼool xnawbʼal naq nakatrahok xbʼaan naq rikʼin laabʼaanuhom xaawaklesi xchʼoolebʼ li santil paabʼanel.
8 Usta kʼebʼil inwankil xbʼaan li Kriist re xyeebʼal aawe naq tento taabʼaanu li us,
9 inkʼaʼ nawaj xbʼaanunkil, ninkanabʼ bʼan naq laarahom t-ekʼasinq aawe chi xbʼaanunkil li us xbʼaan naq laaʼin laj Pablo cheekin chik ut anaqwan wankin saʼ tzʼalam saʼ xkʼabʼaʼ li Kristo Jesús.
10 Nintzʼaama usilal chaawu naq taatenqʼa laj Onésimo, li xwil joʼ walal naq wankin chaq saʼ tzʼalam.
11 Junxil maakʼaʼ naʼok wiʼ chaawu abʼan anaqwan nakʼanjelak chiwu joʼ ajwiʼ chaawu.
12 Nintaqla wiʼ chik aawikʼin laj Onésimo, li qʼaxal raaro inbʼaan.
13 Nawaj raj naq tkanaaq wikʼin choʼq aawuuchil ut tkʼanjelaq chiwu anaqwan naq wankin saʼ tzʼalam saʼ xkʼabʼaʼ li chaabʼil esil.
14 Inkʼaʼ nawaj xbʼaanunkil junaq li naʼlebʼ wi toj maajiʼ ninpatzʼ aawe re naq taabʼaanu chi anchal aachʼool ut inkʼaʼ chi minbʼil aawu.
15 Maare xbʼaan aʼin xʼelelik chaawu jun kʼamokaq re naq truuq chi kanaak aawikʼin chi junelik,
16 maawaʼaq chik moos, aawechpaabʼanelaq bʼan chik. Laaʼin qʼaxal ninra abʼan laaʼat taara joʼ aamoos ut joʼ aawechpaabʼanel saʼ xkʼabʼaʼ li Qaawaʼ.
17 Joʼkan bʼiʼ, wi laaʼin aawamiiw, taakʼul chi sa laachʼool joʼ tinaakʼul raj laaʼin.
18 Joʼkan ajwiʼ, wi xmaakobʼk chaawu malaj wank xkʼas aawikʼin, laaʼin tintojoq re.
19 Laaʼin laj Pablo nakatintzʼiibʼa rikʼin wuqʼ, laaʼin tintoj aawe (jultikoʼq ajwiʼ aawe naq wankat saʼ kʼas wikʼin chirix laayuʼam).
20 Joʼkan, at wechpaabʼanel, bʼaanu we li usilal aʼin saʼ xkʼabʼaʼ li Qaawaʼ; waklesi linchʼool saʼ xkʼabʼaʼ li Kriist.
21 Nakatintzʼiibʼa xbʼaan naq chʼolchʼo chiwu naq moko kaʼaj tawiʼ taabʼaanu li xinye, taakʼe bʼan xtzʼaqobʼ.
22 Joʼkan ajwiʼ, nintzʼaama chaawu naq taakawresi innaʼaj bʼarwiʼ tinkanaaq, nawoybʼeni naq tinsutqʼiiq eerikʼin xbʼaan naq kaw yookex chi tijok chiwix.
23 Laj Epafras, li wank ajwiʼ saʼ tzʼalam saʼ xkʼabʼaʼ li Kristo Jesús, naxtaqla xsahil aachʼool.
24 Nekeʼxtaqla ajwiʼ xsahil aachʼool ebʼ li wechkʼanjel aʼ laj Marcos, laj Aristarco, laj Demas ut laj Lucas.
25 Aʼ taxaq li xnimal rusilal li Qaawaʼ Jesukriist chiwanq eerikʼin xbʼaan naq chaabʼil eechʼool.
