Gálatas 1:1-24
1 Laaʼin li apóstol Pablo li nekexintzʼiibʼa. Moko winq ta kixaqabʼank we choʼq apóstol, wankin bʼan choʼq apóstol saʼ xkʼabʼaʼ li Jesukriist ut saʼ xkʼabʼaʼ li Yos li Yuwaʼbʼej, li kiwaklesink re chi yoʼyo saʼ xyanqebʼ li kamenaq,
2 joʼkan tzʼaqal, laaʼin ut ebʼ li qechpaabʼanel li wankebʼ wochbʼeen nekexqatzʼiibʼa laaʼex li wankex saʼebʼ li chʼuut saʼ xweent Galacia:
3 Chiwanq taxaq eerikʼin li xnimal rusilal ut li xtuqtuukilal li Yos li Qayuwaʼ ut li Xyuwaʼ li Qaawaʼ Jesukriist.
4 Aʼan kixqʼaxtesi ribʼ saʼ xkʼabʼaʼ li qamaak re qakolbʼal chiru li maaʼus aj ruuchichʼochʼ* aʼin joʼ naraj li Qayos ut li Qayuwaʼ
5 ut aʼan chikʼeheʼq xloqʼal chi junelik. Joʼkan taxaq.
6 Nasach inchʼool rilbʼal naq saʼ junpaat yookex chi najtoʼk* rikʼin li kibʼoqok eere saʼ xkʼabʼaʼ li xnimal rusilal li Kriist ut yookex chi xik chirix jalan chik li chaabʼil esil.
7 Inkʼaʼ yookin xyeebʼal naq wank jalan chik li chaabʼil esil, yookin bʼan xyeebʼal naq wankebʼ nekeʼraj eekʼebʼal saʼ chʼaʼajkilal ut nekeʼraj xjalpaqinkil li chaabʼil esil chirix li Kriist.
8 Abʼanan, wi junaq qe malaj jun rehebʼ li ánjel li wank saʼ choxa tixkʼe cheenaw junaq li naʼlebʼ li jalan chiru li chaabʼil esil li naqakʼe chi naweʼk laaʼo, xkʼulubʼ naq tchalq li rahilal saʼ xbʼeen.
9 Ninye wiʼ chik eere li ak xinye chi rubʼelaj: maakʼaʼ naxye ani tixkʼe cheenaw junaq li naʼlebʼ li jalan chiru li chaabʼil esil li xeekʼulubʼa, xkʼulubʼ naq tchalq li rahilal saʼ xbʼeen.
10 Ma yookin xkʼebʼal inqʼe re xtawbʼal rusilal ebʼ li winq malaj li Yos? Ma yookin tabʼiʼ xkʼebʼal inqʼe chi xsahobʼresinkil xchʼool ebʼ li winq? Wi toj yookin raj xsahobʼresinkil xchʼool ebʼ li winq, moko laaʼin ta raj xmoos li Kriist.
11 Xbʼaan naq nawaj naq teenaw ex wechpaabʼanel, naq li chaabʼil esil li xqakʼe cheenaw moko chalenaq ta rikʼin winq
12 xbʼaan naq moko xinkʼul ta rikʼin junaq winq chi moko xeʼxkʼut ta chiwu, xinkʼul bʼan rikʼin li Jesukriist.
13 Laaʼex xeerabʼi chanru linnaʼlebʼ naq yookin chaq xyuʼaminkil li xkʼutum ebʼ laj judiiy. Xeerabʼi naq qʼaxal xinrahobʼtesi li xchʼuut li Yos ut naabʼal li maaʼusilal xinbʼaanu re.
14 Joʼkan ajwiʼ, qʼaxal yookin chaq chi kʼiik saʼ xkʼutumebʼ laj judiiy chiruhebʼ li junchʼol chik aj judiiy li juntaqʼeetebʼ xchihabʼ wikʼin xbʼaan naq ninbʼaanu chaq chi anchal inchʼool li xnajteril naʼlebʼ linnaʼ linyuwaʼ.
15 Abʼan naq li Yos li kixbʼaanu naq tinyoʼlaaq ut kibʼoqok we saʼ xkʼabʼaʼ li xnimal rusilal, kixkʼul xchʼool
16 woksinkil re xkʼebʼal chi naweʼk li chaabʼil esil rehebʼ li junchʼol chi tenamit re naq aʼanebʼ teʼxnaw ru li Ralal. Naq kixsikʼ wu re xbʼaanunkil aʼin, maaʼani ajʼe xinpatzʼ innaʼlebʼ.
17 Chi moko xintaqeʼk Jerusalén re rilbʼalebʼ chaq li ak junxil nekeʼok choʼq apóstol chiwu laaʼin. Xkohin bʼan Arabia ut chirix chik aʼan xinsutqʼiik Damasco.
18 Naq oxibʼ chihabʼ xnumik aʼin, xintaqeʼk Jerusalén chi rulaʼaninkil laj Cefas* ut oʼlaju kutan xinkanaak rikʼin.
19 Abʼan maaʼani rehebʼ li apóstol xwil ru, kaʼajwiʼ laj Santiago, li riitzʼin li Qaawaʼ.
20 Chʼolchʼo chiru li Yos naq moko tikʼtiʼ ta li nintzʼiibʼa eere.
21 Moqon chik, xkohin saʼ xteepal Siria ut Cilicia.
22 Abʼan ebʼ li chʼuut re Judea li wankebʼ saʼ junajil rikʼin li Kriist maajunwa rilomebʼ wu.
23 Kaʼajwiʼ nekeʼrabʼi xyeebʼal: «Li winq li kʼajoʼ xooxrahobʼtesi ut kixbʼaanu naabʼal li maaʼusilal rehebʼ li chʼuut, anaqwan yook xkʼebʼal chi naweʼk li chaabʼil esil».
24 Joʼkan naq xeʼok xkʼebʼal xloqʼal li Yos saʼ xkʼabʼaʼ li xinkʼul.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, ruuchichʼochʼ.
^ Malaj «yookebʼ eenajtobʼresinkil».
^ Pedro ajwiʼ nakʼabʼaʼiik.
