Gálatas 3:1-29
-
Xjalanil li naxye li Chaqʼrabʼ rikʼin li paabʼank (1-14)
-
«Li tiik xchʼool twanq xyuʼam saʼ xkʼabʼaʼ li xpaabʼal» (11)
-
-
Li yeechiʼom li kikʼemank re laj Abrahán moko chalenaq ta saʼ li Chaqʼrabʼ (15-18)
-
Li ralal laj Abrahán: li Kriist (16)
-
-
Bʼar chalenaq li Chaqʼrabʼ ut kʼaʼut kikʼemank (19-25)
-
«Ralal xkʼajolex li Yos xbʼaan leepaabʼal» (26-29)
-
Ralal xkʼajolebʼ laj Abrahán: li rehebʼ li Kriist (29)
-
3 Ex aj Galacia li maakʼaʼ eenaʼlebʼ, ani kibʼalaqʼink eere laaʼex li xchʼolobʼamank cheeru chi tzʼaqal re ru chirix li xkamik li Jesukriist chiru cheʼ?
2 Kaʼajwiʼ aʼin nawaj xpatzʼbʼal eere:* ma xeekʼul li santil musiqʼej* saʼ xkʼabʼaʼ naq nekeebʼaanu li naxye li chaqʼrabʼ malaj xeekʼul saʼ xkʼabʼaʼ naq xeepaabʼ li xeerabʼi?
3 Ma relik chi yaal naq maakʼaʼ eenaʼlebʼ? Naq xeetikibʼ chaq kʼojkʼo eechʼool rikʼin li santil musiqʼej ut anaqwan yookex xkʼojobʼankil eechʼool rikʼin xkʼaʼuxl li winq.
4 Ma maakʼaʼ ajʼe naq xeekʼul li rahilal? Chʼolchʼo chiwu naq moko joʼkan ta.
5 Joʼkan naq li naxkʼe eere li santil musiqʼej ut naxbʼaanu ebʼ li sachbʼachʼoolej* saʼ eeyanq, ma naxbʼaanu saʼ xkʼabʼaʼ naq nekeebʼaanu li naxye li chaqʼrabʼ malaj naxbʼaanu saʼ xkʼabʼaʼ naq xeepaabʼ li xeerabʼi?
6 Aʼin tzʼaqal li kikʼulmank rikʼin laj Abrahán: «Kixpaabʼ li Jehobʼa* ut kiʼilmank naq tiik xchʼool».
7 Chʼolchʼo naq nekeenaw naq li wankebʼ xpaabʼal aʼanebʼ li ralal xkʼajol laj Abrahán.
8 Joʼkan bʼiʼ, saʼ xkʼabʼaʼ naq li Raatin li Yos kiril chi rubʼelaj naq li Yos tixye naq tiikebʼ xchʼool li junchʼol chi tenamit saʼ xkʼabʼaʼebʼ li xpaabʼal, joʼkan naq junxil kixye li chaabʼil esil aʼin re laj Abrahán: «Saʼ aakʼabʼaʼ osobʼtesinbʼilaq chixjunilebʼ li tenamit».
9 Joʼkan bʼiʼ, li wankebʼ xpaabʼal, osobʼtesinbʼilebʼ rochbʼeen laj Abrahán, li kiwank ajwiʼ xpaabʼal.
10 Chixjunilebʼ li nekeʼxkʼe xchʼool chirix li naxye li chaqʼrabʼ ra tchalq saʼ xbʼeenebʼ xbʼaan naq tzʼiibʼanbʼil: «Ra tchalq saʼ xbʼeenebʼ li inkʼaʼ nekeʼxbʼaanu chixjunil li tzʼiibʼanbʼil saʼ xhuhil li Chaqʼrabʼ».
11 Joʼkan ajwiʼ, ilbʼil naq maaʼani tyeemanq chirix naq tiik xchʼool chiru li Yos rikʼin xpaabʼankil li chaqʼrabʼ xbʼaan naq tzʼiibʼanbʼil naq «li tiik xchʼool twanq xyuʼam saʼ xkʼabʼaʼ li xpaabʼal».
12 Li Chaqʼrabʼ moko nachalk ta saʼ xkʼabʼaʼ li paabʼal, tzʼiibʼanbʼil naq «li naxbʼaanu li naxye aʼin, twanq xyuʼam saʼ xkʼabʼaʼ aʼin».
13 Li Kriist xooxloqʼ re naq inkʼaʼ tchalq saʼ qabʼeen li rahilal li tzʼiibʼanbʼil saʼ li Chaqʼrabʼ ut saʼ xbʼeen aʼan kichalk li rahilal li qakʼulubʼ laaʼo xbʼaan naq tzʼiibʼanbʼil: «Ra tchalq saʼ xbʼeen li ttʼuyubʼaaq chiru cheʼ».
14 Kikʼulmank aʼin re naq li osobʼtesink li tixkʼul laj Abrahán twulaq rikʼinebʼ li junchʼol chi tenamit saʼ xkʼabʼaʼ li Kristo Jesús re naq tqakʼul li santil musiqʼej li kiyeechiʼimank qe saʼ xkʼabʼaʼ li qapaabʼal.
15 Ex wechpaabʼanel tinkʼe eere jun li eetalil li naʼilmank wulaj wulaj: naq naxaqabʼamank xwankil jun li sumwank usta winq tbʼaanunq re maaʼani naru risinkil xwankil chi moko naru xkʼebʼal xtzʼaqobʼ.
16 Xbʼaan naq li yeechiʼom kibʼaanumank re laj Abrahán ut re li ralal. Ut inkʼaʼ naxye «ut laawalal aakʼajol» chanchan tawiʼ yook chi aatinak chirix naabʼalebʼ li qas qiitzʼin, naxye bʼan «ut laawalal» xbʼaan naq yook chi aatinak chirix jun ajwiʼ aʼ li Kriist.
17 Ninye ajwiʼ eere aʼin: li Chaqʼrabʼ li kikʼemank 430 chihabʼ chirix aʼin inkʼaʼ narisi xwankil li sumwank li kixbʼaanu chaq li Yos chi moko naxsach li yeechiʼom.
18 Xbʼaan naq wi li ereens tchalq rikʼin li chaqʼrabʼ, inkʼaʼ chik tchalq rikʼin li yeechiʼom. Abʼanan li Yos kixkʼe aʼin re laj Abrahán chi anchal xchʼool saʼ xkʼabʼaʼ jun li yeechiʼom.
19 Kʼaʼut kikʼemank li Chaqʼrabʼ chi joʼkanan? Li Chaqʼrabʼ kikʼanjelak re xkʼebʼal chi kutankil li xmaaʼusilalebʼ li qas qiitzʼin toj reetal naq twulaq li alalbʼej li kiyeeheʼk re li yeechiʼom. Li Yos kiroksi ebʼ li ánjel re xkʼebʼal chi naweʼk li Xchaqʼrabʼ re laj Moisés tojaʼ naq laj Moisés kixkʼe chi naweʼk li Chaqʼrabʼ rehebʼ li qas qiitzʼin.
20 Abʼanan naq jun ajwiʼ li qas qiitzʼin naxbʼaanu li sumwank moko aajel ta chik ru naq junaq chik li qas qiitzʼin ttenqʼanq saʼ li sumwank. Joʼkan ajwiʼ rikʼin li Yos, kaʼajwiʼ aʼan kixbʼaanu li yeechiʼom aʼin.
21 Ma naxqʼet ribʼ li Chaqʼrabʼ chiru li xyeechiʼom li Yos chi joʼkanan? Chʼolchʼo naq inkʼaʼ! Xbʼaan naq wi kikʼemank raj jun li chaqʼrabʼ li naxkʼe li yuʼam, li tiikilal ttawmanq raj saʼ xkʼabʼaʼ li chaqʼrabʼ.
22 Abʼan li Raatin li Yos kixqʼaxtesi chixjunil rubʼel xwankil li maak re naq li yeechiʼom li natawmank saʼ xkʼabʼaʼ xpaabʼankil li Jesukriist tkʼemanq rehebʼ li nekeʼxkʼutbʼesi li xpaabʼal.
23 Abʼanan naq toj maajiʼ naqapaabʼ li Kriist ak yooko roybʼeninkil li tixkʼutbʼesi li Yos, kʼaakʼalenbʼilo chaq xbʼaan li chaqʼrabʼ ut wanko rubʼel xwankil.
24 Joʼkan naq li Chaqʼrabʼ chanchan aj chʼilom qe li xooxkʼam toj bʼarwiʼ wank li Kriist re naq tyeemanq chiqix naq tiik qachʼool saʼ xkʼabʼaʼ li qapaabʼal.
25 Abʼan, anaqwan naq xooʼok xpaabʼankil li Kriist moko wanko ta chik rubʼel xwankil laj chʼilom qe.
26 Joʼkan ajwiʼ, cheejunilex ralal xkʼajolex li Yos xbʼaan leepaabʼal chirix li Kristo Jesús.
27 Ut cheejunilex li xkubʼeek eehaʼ saʼ xkʼabʼaʼ li Kriist xeetiqibʼ eeribʼ rikʼin li Kriist.
28 Maakʼaʼ naxye ma laaʼat aj judiiy malaj laaʼat aj griego, ma wankat choʼq moos malaj inkʼaʼ wankat choʼq moos, ma laaʼat winq malaj laaʼat ixq xbʼaan naq cheejunilex wankex saʼ junajil joʼ xtzolom li Kristo Jesús.
29 Joʼkan ajwiʼ, wi rehex li Kriist, laaʼex ralal xkʼajolex laj Abrahán. Ut laaʼex teekʼul li ereens joʼ kixye li Yos.
Xtzʼaqobʼ ebʼ li naʼlebʼ
^ Saʼ griego «xtzolbʼal we eerikʼin».
^ Li aatin saʼ griego, pnéuma. Taawil xchʼolobʼankil li aatin, musiqʼ.
^ Malaj «naxbʼaanu ebʼ li xninqal ru bʼaanuhom».
^ Taawil xchʼolobʼankil li aatin, Jehobʼa.
