Gálatas 4:1-31
4 Joʼkan bʼiʼ, ninye eere naq wi toj kachʼin li chʼinaʼal li tkʼuluq re li ereens, maakʼaʼ xjalanil rikʼin jun li moos, usta aʼan aj echal re li ereens
2 xbʼaan naq wankebʼ li qas qiitzʼin li nekeʼilok re li chʼinaʼal ut li nekeʼril ajwiʼ li rochoch toj reetal twulaq li kutan li xaqabʼanbʼil rubʼelaj xbʼaan li xyuwaʼ.
3 Joʼkan ajwiʼ, naq kachʼino chaq, laaʼo ajwiʼ xmoos li kʼaʼaq re ru li wank saʼ ruuchichʼochʼ.
4 Abʼan, naq kitzʼaqlok ru li hoonal li ak xaqabʼanbʼil, li Yos kixtaqla chaq li Ralal li kiyoʼlaak rikʼin jun li ixq ut kiyoʼlaak rubʼel xwankil li chaqʼrabʼ,
5 re naq tixloqʼebʼ ut trisihebʼ li wankebʼ chaq rubʼel xwankil li chaqʼrabʼ ut chi joʼkan tooxkʼul joʼ tzʼaqal ralal xkʼajol.
6 Joʼkan bʼiʼ, saʼ xkʼabʼaʼ naq laaʼex ralal xkʼajol, li Yos kixtaqla chaq li santil musiqʼej saʼ li qachʼool ut li santil musiqʼej aʼin wank rikʼin li Ralal ut aʼan naxbʼaanu naq tqaye: «Abba,* at Inyuwaʼ!».
7 Joʼkan naq maawaʼat chik moos, laaʼat bʼan chik alalbʼej. Ut wi laaʼat alabʼej, li Yos tixkʼe ajwiʼ laaʼereens.
8 Abʼanan, naq toj maajiʼ nekeenaw ru li Yos, wankex chaq choʼq xmoos li maawaʼebʼ yos.
9 Abʼan, anaqwan naq nekeenaw chik ru li Yos malaj li Yos naxnaw chik eeru, chanru naq nekeʼxsutqʼiik rikʼin li kʼaʼaq re ru li maakʼaʼ xwankil ut maakʼaʼ naʼok wiʼ ut nekeeraj wank wiʼ chik choʼq xmoosebʼ?
10 Laaʼex nekeekʼoxla naq wank xwankil ebʼ li kutan, ebʼ li po, ebʼ li qʼehil ut ebʼ li chihabʼ joʼkan naq nekeenima ru.
11 Yook inkʼaʼuxl cheerix xbʼaan naq maare yal xinsach inhoonal cheetenqʼankil.
12 Ex wechpaabʼanel, nintzʼaama cheeru naq cheekʼam eere wikʼin xbʼaan naq laaʼin xinwank chaq ajwiʼ joʼ laaʼex ut moko xikʼ ta xineeril.
13 Laaʼex nekeenaw naq yajin chaq ut saʼ xkʼabʼaʼ aʼin xinkʼe cheenaw xbʼeen sut li chaabʼil esil.
14 Usta linyajel kichʼaʼajkink eere, inkʼaʼ xineetzʼeqtaana chi moko xineechuubʼa. Xineekʼul bʼan joʼ li xʼánjel li Yos malaj joʼ li Kristo Jesús.
15 Bʼar xkoho li xsahil eechʼool? Xbʼaan naq chʼolchʼo chiwu naq, wi xexruuk raj, xeerisi raj xnaqʼ eeru ut xeekʼe raj we.
16 Ut anaqwan xikʼ nikineeril xbʼaan naq ninye eere li yaal.
17 Aʼanebʼ nekeʼraj eerechaninkil, abʼan moko us ta nekeʼxkʼoxla cheerix. Nekeʼraj eenajtobʼresinkil wikʼin re naq aʼanebʼ chik teetaqehebʼ.
18 Abʼanan, us raj naq junelik wank junaq li qas qiitzʼin li tixkʼe xchʼool cheerechaninkil ut us tixkʼoxla cheerix abʼan moko kaʼaj tawiʼ tixbʼaanu naq wanqin saʼ eeyanq,
19 ex inkokʼal, saʼ eekʼabʼaʼ yookin rekʼankil wiʼ chik li rahilal li narekʼa jun li ixq li ok re chi wank xkʼuulaʼal ut inkʼaʼ tinkanabʼ rekʼankil aʼin toj reetal teekʼutbʼesi naq yookex xyuʼaminkil li xnaʼlebʼ li Kriist.
20 Nawaj raj naq ak wanqin eerikʼin anaqwan ajwiʼ ut jalan raj chik xyaabʼ inkux twoksi naq texwaatina xbʼaan naq inkʼaʼ ninnaw kʼaru yookex xkʼulbʼal.
21 Yeehomaq we, laaʼex li wankex rubʼel xwankil li chaqʼrabʼ, ma inkʼaʼ nekeerabʼi li naxye li Chaqʼrabʼ?
22 Jun eetalil, tzʼiibʼanbʼil naq laj Abrahán kiwank wiibʼ li ralal: jun rikʼin li ixq li wank choʼq moos ut li jun chik rikʼin li ixq li moko wank ta choʼq moos.
23 Li xyum li moos kiyoʼlaak joʼ nekeʼyoʼlaak ebʼ li kokʼal, abʼan li xyum li ixq li moko wank ta choʼq moos kiyoʼlaak saʼ xkʼabʼaʼ jun li yeechiʼom.
24 Chixjunil aʼin wank jun chik xyaalal xbʼaan naq li wiibʼ chi ixq aʼin reetalil wiibʼ li sumwank. Jun li sumwank kibʼaanumank saʼ li tzuul Sinaí ut li nekeʼyoʼlaak rikʼin wankebʼ choʼq moos ut chanchan li xʼAgar.
25 Li xʼAgar reetalil li tzuul Sinaí li wank Arabia ut aʼan li Jerusalén li wank saʼebʼ li qakutan. Xbʼaan naq li tenamit Jerusalén ut li ralal xkʼajol wankebʼ choʼq moos.
26 Abʼan li Jerusalén li wank taqeʼq moko wank ta choʼq moos ut aʼan li qanaʼ.
27 Xbʼaan naq tzʼiibʼanbʼil: «Chisahoʼq saʼ laachʼool at ixq li inkʼaʼ naru nawank laakʼuulaʼal. Jap aawe xbʼaan xsahil laachʼool xbʼaan naq inkʼaʼ nakaakʼul li rahilal li narekʼa jun li ixq li ok re chi wank xkʼuulaʼal. Xbʼaan naq li ralal xkʼajol li ixq li kikanabʼaak qʼaxal naabʼal wiʼ chik chiru li ralal xkʼajol li ixq li wank xbʼeelom».
28 Joʼkan bʼiʼ ex wechpaabʼanel, laaʼex ralal xkʼajol li yeechiʼom joʼ laj Isaac.
29 Joʼ chanru kikʼulmank junxil, li alabʼej li kiyoʼlaak joʼ nekeʼyoʼlaak ebʼ li kokʼal xikʼ kiʼok rilbʼal li kiyoʼlaak saʼ xkʼabʼaʼ li santil musiqʼej ut joʼkan ajwiʼ nakʼulmank anaqwan.
30 Abʼanan, kʼaru naxye li Raatin li Yos? «Isi arin li moos ut li xyum. Li xyum li ixq li moko wank ta choʼq moos maajoqʼe tixwotz li xʼereens rikʼin li xyum li moos».
31 Joʼkan bʼiʼ, ex wechpaabʼanel, laaʼo maawaʼo ralal xkʼajol jun li moos, laaʼo bʼan ralal xkʼajol li ixq li moko wank ta choʼq moos.
Xtzʼaqobʼ ebʼ li naʼlebʼ
^ Aʼin jun li aatin saʼ hebreo malaj arameo li naraj xyeebʼal “at inyuwaʼ”. Ebʼ li kokʼal nekeʼroksi li aatin aʼin naq nekeʼaatinak rikʼin li xyuwaʼ.
