Gálatas 5:1-26
5 Li Kriist kixbʼaanu naq inkʼaʼ chik toowanq choʼq moos.* Joʼkan bʼiʼ, junelik kaw xaqxoqex ut meekanabʼ naq texkʼeheʼq wiʼ chik choʼq moos.
2 Kʼehomaq reetal, laaʼin laj Pablo ninye eere naq wi nekeekʼe chi seteʼk xtzʼuumal leetzʼejwal, maakʼaʼ ajʼe li kixbʼaanu chaq li Kriist.
3 Ninye wiʼ chik re li naxkʼe chi seteʼk xtzʼuumal xtzʼejwal naq tento tixbʼaanu chixjunil li naxye li Chaqʼrabʼ.
4 Laaʼex, li nekeeyal eeqʼe re naq tyeemanq cheerix naq tiik eechʼool saʼ xkʼabʼaʼ li chaqʼrabʼ, xeerisi eeribʼ rikʼin li Kriist. Ut xeetzʼeqtaana li xnimal rusilal.
5 Abʼanan laaʼo, saʼ xkʼabʼaʼ li santil musiqʼej naqoybʼeni chi anchal qachʼool li tiikilal li natawmank saʼ xkʼabʼaʼ li paabʼal.
6 Xbʼaan naq choʼq re jun li qas qiitzʼin li nataqenk re li Kristo Jesús moko wank ta chik xwankil ma setbʼil xtzʼuumal xtzʼejwal malaj inkʼaʼ. Li wank tzʼaqal xwankil aʼan naq wanq xpaabʼal ut tixkʼutbʼesi rikʼin rahok.
7 Us yookex chaq chi aanilak. Ani kiramok cheeru naq teekanabʼ xpaabʼankil li yaal?
8 Li kʼaʼuxej aʼin moko nachalk ta rikʼin li yook chi bʼoqok eere.
9 Jultikoʼq eere naq rikʼin kachʼin li chʼam aj qʼem natzʼubʼoʼk chixjunil li qʼem.
10 Chʼolchʼo chiwu naq laaʼex, li wankex saʼ junajil rikʼin li Qaawaʼ, texkʼoxlaq ajwiʼ joʼ laaʼin. Abʼan li yook eekʼebʼal saʼ chʼaʼajkilal, maakʼaʼ naxye ani, tixkʼul xtojbʼal xmaak joʼ chanru xkʼulubʼ.
11 Ex wechpaabʼanel, wi toj yookin xkʼutbʼal naq ebʼ li qas qiitzʼin teʼsetmanq xtzʼuumal xtzʼejwal, ebʼ aʼan moko xikʼ ta raj nikineʼril ut linkʼutum chirix li xkamik li Jesús chiru cheʼ* inkʼaʼ raj chik tixkʼehebʼ chi tichkʼok ebʼ li qas qiitzʼin.
12 Us raj naq teʼpoqʼeʼq xnaqʼ xtzʼejwal ebʼ li winq li nekeʼraj xsachbʼal eenaʼlebʼ.
13 Ex wechpaabʼanel xexbʼoqeʼk re naq maawaʼaqex chik moos. Abʼan meekʼoxla naq saʼ xkʼabʼaʼ naq moko laaʼex ta chik moos texruuq xbʼaanunkil li naraj li tibʼelej, kanabʼomaq bʼan naq li rahok t-ekʼasinq eere chi xmoosinkil eeribʼ cheeribʼil eeribʼ.
14 Xbʼaan naq chixjunil li Chaqʼrabʼ natzʼaqlok ru rikʼin li taql aʼin: «Taara laawas aawiitzʼin joʼ naq nakaara aawibʼ».
15 Abʼanan, wi inkʼaʼ nekeekanabʼ xtiwbʼal ut xtʼupinkil eeribʼ cheeribʼil eeribʼ, weent teebʼaanu meejukʼ leepaabʼal cheeribʼil eeribʼ.
16 Abʼanan, laaʼin ninye eere: kanabʼomaq naq li santil musiqʼej tbʼeresinq eere junelik re naq inkʼaʼ teebʼaanu li naraj li tibʼelej.
17 Saʼ xkʼabʼaʼ naq li naxrahi ru li tibʼelej naxram li santil musiqʼej, li santil musiqʼej naxram li tibʼelej. Ut saʼ xkʼabʼaʼ naq nekeʼxram ribʼebʼ, laaʼex inkʼaʼ nekeebʼaanu li nekeeraj.
18 Joʼkan ajwiʼ, wi li santil musiqʼej nabʼeresink eere, moko wankex ta rubʼel xwankil li chaqʼrabʼ.
19 Joʼkan bʼiʼ, li naxyuʼami li naraj li xtibʼel naxbʼaanu aʼin: naxmux ribʼ,* naxbʼaanu li tzʼaj aj naʼlebʼ, namaakobʼk chi maakʼaʼ xxutaan,*
20 naxloqʼoni ebʼ li pechʼbʼil yos,* naʼaatinak rikʼinebʼ li maaʼus aj musiqʼej,* xikʼ narilebʼ li junchʼol, napleetik, naxkʼula saʼ xchʼool li nekeʼxbʼaanu re, qʼaxal josqʼ, naxchoqihebʼ li junchʼol, naxjachebʼ li junchʼol, naxtaqe xkʼutum li winq,
21 nakaqalik, nakalaak, naninqʼehik saʼ joʼmajoʼil ut toj wank chik xkomon li naxbʼaanu. Ninye eere aʼin joʼ ak xinye eere chi rubʼelaj, li nekeʼxyuʼami chixjunil aʼin inkʼaʼ teʼrechani li Xʼawabʼejilal li Yos.
22 Joʼkan ajwiʼ, li santil musiqʼej naruuchi li rahok, li sahil chʼoolejil, li tuqtuukilal, li kuyum, li chaabʼilal, li usilal, li paabʼank,
23 li tuulanil, li kuyuk ibʼ. Maakʼaʼ junaq li chaqʼrabʼ li naxye naq moko us ta ebʼ li naʼlebʼ aʼin.
24 Joʼkan ajwiʼ, li rehebʼ li Kristo Jesús nekeʼxklawxi chiru cheʼ li qʼaxal naxrahi ru li xtibʼelebʼ ut li naraj li xtibʼelebʼ.
25 Wi wanko joʼ chanru naraj li santil musiqʼej, miqakanabʼ ajwiʼ xbʼeresinkil qibʼ joʼ chanru naraj li santil musiqʼej.
26 Inkʼaʼ tqabʼaanu qibʼ naq qʼaxal wank qawankil, inkʼaʼ tqayal qaqʼe chiqibʼil qibʼ ut inkʼaʼ tqakaqali qibʼ chiqibʼil qibʼ.
Xtzʼaqobʼ ebʼ li naʼlebʼ
^ Aʼin naraj xyeebʼal, xmoos li Chaqʼrabʼ.
^ Malaj «cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Li aatin saʼ griego, asélgueia. Taawil xchʼolobʼankil li aatin, maakobʼk chi maakʼaʼ li xutaan.
^ Malaj «yalaq kʼaru chik».
^ Malaj «naroksi li xnaʼlebʼebʼ li maaʼus aj musiqʼej», «natuulak», «naroksi li bʼan li nakanobʼresink u». Taawil xchʼolobʼankil li aatin, aatinak rikʼinebʼ li maaʼus aj musiqʼej.
