Apocalipsis 11:1-19
11 Ut kikʼemank we jun li tañil* li chanchan jun li cheʼ re bʼisok naq aʼan yook xyeebʼal we: «Waklin ut bʼis li rochoch li Yos, li xnaʼaj li mayej* ut li nekeʼloqʼonink aran.
2 Abʼan li nebʼaal li wank chirix li rochoch li Yos maakʼe saʼ ajl ut maabʼis xbʼaan naq xqʼaxtesiik saʼ ruqʼebʼ li junchʼol chi tenamit ut aʼanebʼ teʼxyeqʼi li santil naʼaj chiru 42 po.
3 Tinbʼaanu naq linwiibʼ chi testiiw teʼaatinaq joʼ propeet chiru 1,260 kutan ut tiqtoqebʼ rikʼin qʼesnal tʼikr».
4 Li wiibʼ chi oliibʼ ut li wiibʼ xnaʼaj kandeel* reetalil li wiibʼ chi testiiw aʼin ut xaqxokebʼ chiru li Xqaawaʼ li ruuchichʼochʼ.
5 Wi junaq li qas qiitzʼin naraj xrahobʼtesinkilebʼ, naʼelk chaq xaml saʼ rehebʼ. Li xaml aʼin naxsach chi junajwa ebʼ li xikʼ nekeʼilok rehebʼ. Chi joʼkaʼin tento teʼkamq li nekeʼraj xrahobʼtesinkilebʼ.
6 Ebʼ aʼan wankebʼ xwankil re xtzʼapbʼal li choxa ut xbʼaanunkil naq inkʼaʼ tixkʼe li habʼ chiruhebʼ li kutan naq teʼaatinaq joʼ propeet. Wankebʼ ajwiʼ xwankil re xbʼaanunkil naq li haʼ tsutqʼiiq choʼq kikʼ ut re xrahobʼtesinkil li ruuchichʼochʼ rikʼin jalan jalanq li rahilal aʼ yaal jarubʼ sut teʼraj xbʼaanunkil.
7 Naq teʼraqeʼq chi aatinak joʼ propeet, li nimla xul li kʼajoʼ xjosqʼil li naʼelk chaq saʼ chamal jul* tyaloq saʼ xbʼeenebʼ aʼan, tixqʼaxebʼ ru ut tixkamsihebʼ.
8 Ut ebʼ li kamenaq teʼkanaaq saʼ xnimal ru bʼe re li nimla tenamit bʼarwiʼ kitʼuyubʼaak ajwiʼ chiru cheʼ ebʼ li Xqaawaʼ. Sodoom ut Ejiipt reetalil li tenamit aʼin.
9 Ebʼ li qas qiitzʼin re li jalan jalanq chi kʼalebʼaal, teep, aatinobʼaal ut tenamit teʼril ebʼ li kamenaq chiru oxibʼ kutan rikʼin mero kutan ut inkʼaʼ tixkanabʼ naq ebʼ li kamenaq teʼkʼeheʼq saʼebʼ li muqlebʼaal.
10 Ut li wankebʼ saʼ ruuchichʼochʼ teʼsahoʼq saʼ xchʼool ut teʼxnima li xkamik ut teʼxtaqla xmaatan chiribʼilebʼ ribʼ xbʼaan naq li wiibʼ chi propeet aʼin xeʼxrahobʼtesi chaq ebʼ li wankebʼ saʼ ruuchichʼochʼ.
11 Naq ak xnumeʼk oxibʼ kutan rikʼin jun waʼlebʼ, li Yos kixwaklesihebʼ chi yoʼyo ut xeʼxaqli. Li xeʼilok rehebʼ kʼajoʼ xeʼxuwak.
12 Tojaʼ naq xeʼrabʼi saʼ choxa jun li yaabʼ kuxej li kʼajoʼ xkawil ut kixye rehebʼ: «Taqenqex arin». Ut xkohebʼ saʼ choxa saʼ jun li choql ut xeʼileʼk xbʼaanebʼ li xikʼ nekeʼilok rehebʼ.
13 Saʼ li hoonal ajwiʼ aʼan kiwank jun nimla hiik li kʼajoʼ xkawil. Li xlaje jachal li tenamit kitʼaneʼk ut wuqubʼ mil chi qas qiitzʼin xeʼkamk xbʼaan li nimla hiik. Li inkʼaʼ xeʼkamk kʼajoʼ naq xeʼxuwak ut xeʼxkʼe xloqʼal li Xyosil li choxa.
14 Li xkabʼ rahilal ak xnumeʼk. Kʼehomaq reetal! Li rox chi seebʼ tchalq.
15 Li xwuq ánjel kixchʼeʼ li xtrompeet. Tojaʼ naq kiʼabʼimank saʼ choxa ebʼ li xyaabʼ kuxej li kʼajoʼ xkawil ut yook xyeebʼal: «Li Xʼawabʼejilal li Qayos ut li kixsikʼ ru re naq twanq choʼq li Kriist yook chi awabʼejink anaqwan saʼ xbʼeen chixjunil li ruuchichʼochʼ ut t-awabʼejinq chi junelik».
16 Li 24 chi cheekel winq li chunchukebʼ saʼebʼ li xkʼojaribʼaal chiru li Yos xeʼxkʼutzubʼ ribʼ chiru chʼochʼ ut xeʼxloqʼoni li Yos.
17 Ut xeʼxye: «Naqabʼanyoxi aawe Jehobʼa,* li Nimajwal Yos, li wank ut li xwank chaq, xbʼaan naq wank chik saʼ laawuqʼ li xnimal laawankil ut ak xaatikibʼ awabʼejink.
18 Abʼan ebʼ li tenamit kʼajoʼ xeʼchalk xjosqʼil ut laaʼat xaakʼut laajosqʼil saʼ xbʼeenebʼ. Tojaʼ naq kichalk li hoonal li xaqabʼanbʼil re naq traqmanq aatin saʼ xbʼeenebʼ li kamenaq. Joʼkan ajwiʼ re xqʼajkamunkilebʼ li propeet li nekeʼkʼanjelak chaawu joʼ ajwiʼ ebʼ li santil paabʼanel ut ebʼ li nekeʼroxloqʼi laakʼabʼaʼ (joʼ kokʼ joʼ ninq). Ut re xsachbʼalebʼ ajwiʼ li yookebʼ xjukʼbʼal* li ruuchichʼochʼ».
19 Tojaʼ naq kiteehonk li rochoch li Yos saʼ choxa ut kiʼilmank li xkaaxil li sumwank li wank saʼ rochoch li Yos. Ut kichalk li xrepom kaaq, ebʼ li xyaabʼ kuxej, li kaaq, jun li nimla hiik ut li kawil saqbʼach.
Xtzʼaqobʼ ebʼ li naʼlebʼ
^ Malaj «li kaxlanʼaj».
^ Malaj «li altar». Taawil xchʼolobʼankil li aatin, xnaʼaj li mayej.
^ Li xnaʼaj kandeel aʼin wank wuqubʼ xxamlel.
^ Taawil xchʼolobʼankil li aatin, chamal jul.
^ Taawil xchʼolobʼankil li aatin, Jehobʼa.
^ Malaj «xpoʼbʼal».
