Apocalipsis 12:1-17
12 Tojaʼ naq xwil saʼ choxa jun li nimla eetalil: li xtiqibʼankil jun li ixq lemtzʼunk joʼ li saqʼe, wank chaq li po rubʼel roq ut saʼ xjolom wank chaq jun li koroon li yiibʼanbʼil rikʼin kabʼlaju li chahim.
2 Yaj aj ixq ut japjo re xbʼaan xrahilal xbʼaan naq yoʼlaak re xkʼuulaʼal.
3 Ut kiʼilmank saʼ choxa jun chik li eetalil: jun li kʼantiʼ li xuwajel ru chanchan xaml li xbʼonol, wank wuqubʼ xjolom, lajeebʼ xxukubʼ ut saʼebʼ li xjolom wank wuqubʼ li koroon;
4 li xye yook xkelelinkil li rox jachal li chahim li wank saʼ choxa ut kixkut saʼ ruuchichʼochʼ. Li kʼantiʼ li xuwajel ru kikanaak chi xaqxo chiru li ixq chi roybʼeninkil naq tyoʼlaaq li xyum re xnuqʼbʼal.
5 Li ixq kiwank jun xyum li tixbʼeresi chixjunilebʼ li tenamit rikʼin jun li xuqʼ re chʼiichʼ joʼ naxbʼaanu laj ilol karneer. Tojaʼ naq li xyum kikʼameʼk saʼ junpaat rikʼin li Yos li wank saʼ li xkʼojaribʼaal.
6 Ut li ixq kiʼelk aran ut xkoho saʼ li chaqichʼochʼ bʼarwiʼ kawresinbʼil jun li naʼaj choʼq re xbʼaan li Yos ut aran tchʼolaniiq chiru 1,260 kutan.
7 Ut kitiklaak jun li yalok u saʼ choxa. Laj Miguel* ut ebʼ li xʼánjel xeʼyalok saʼ xbʼeen li kʼantiʼ li xuwajel ru. Ut li kʼantiʼ li xuwajel ru ut ebʼ li xʼánjel xeʼyalok ajwiʼ
8 abʼan inkʼaʼ xeʼqʼaxok u* chi moko xwank ta chik xnaʼajebʼ saʼ choxa.
9 Joʼkan naq kikuteʼk chaq taqʼa li kʼantiʼ li xuwajel ru aʼ li najter kʼantiʼ li nakʼabʼaʼiik choʼq Diʼaabʼ* ut choʼq Tza li yook xbʼalaqʼinkil chixjunil li ruuchichʼochʼ. Kikuteʼk chaq saʼ ruuchichʼochʼ ut ebʼ li xʼánjel xeʼkuteʼk chaq ajwiʼ rochbʼeen.
10 Ut xwabʼi jun li kawil kuxej saʼ choxa li yook xyeebʼal:
«Li Yos kixkʼam chaq li kolbʼa ibʼ saʼ xbʼeenebʼ li qas qiitzʼin! Li xwankilal ak xqʼaxok u! Ak xxaqabʼaak li Xʼawabʼejilal! Li Xkriist ak xtikibʼ roksinkil li xwankilal! Xbʼaan naq kikuteʼk chaq taqʼa li naqʼabʼank rehebʼ li qechpaabʼanel chi qʼeq ut chi kutan chiru li Qayos.
11 Xeʼxqʼax ru saʼ xkʼabʼaʼ li xkikʼel li Karneer ut saʼ xkʼabʼaʼ li esil li xeʼxkʼe chi naweʼk. Inkʼaʼ xeʼok xkʼaʼuxl chi xqʼaxtesinkil li xyuʼam ut kamk.
12 Saʼ xkʼabʼaʼ aʼin, sahaq saʼ leechʼool ex choxa ut li wankex aran! Abʼan ra tchalq saʼ xbʼeen li ruuchichʼochʼ ut saʼ xbʼeen li palaw! Xbʼaan naq laj Tza* ak xkubʼeek bʼarwiʼ wankex chi kʼajoʼ xjosqʼil xbʼaan naq naxnaw naq moko najt ta chik twanq».
13 Joʼkan bʼiʼ, naq li kʼantiʼ li xuwajel ru kixkʼe reetal naq kikuteʼk saʼ ruuchichʼochʼ, kixtaqe li ixq li kiwank jun xyum re xrahobʼtesinkil.
14 Abʼan kikʼeheʼk re li ixq wiibʼ li xikʼ joʼebʼ li xxikʼ jun li nimla tʼiw re naq trupupiq saʼ li chaqichʼochʼ ut aran tchʼolaniiq chiru oxibʼ chihabʼ rikʼin waqibʼ po najt chiru li kʼantiʼ.
15 Ut li kʼantiʼ kixxaʼwa chaq jun tuubʼ li haʼ joʼ jun nimaʼ chirix li ixq re naq li ixq tixjiqʼ li haʼ ut tkamq.
16 Abʼan li chʼochʼ kichalk xtenqʼankil li ixq. Li chʼochʼ kixte saʼ re ut kixnuqʼ li nimaʼ li kixxaʼwa chaq li kʼantiʼ li xuwajel ru.
17 Joʼkan naq li kʼantiʼ li xuwajel ru kichalk xjosqʼil saʼ xbʼeen li ixq ut xkoho chi yalok saʼ xbʼeenebʼ li ralal xkʼajol li ixq li toj xeʼkanaak. Aʼanebʼ li nekeʼxpaabʼ li xchaqʼrabʼ li Yos ut tenebʼanbʼil saʼ xbʼeenebʼ xkʼebʼal chi naweʼk chirix li Jesús.
Xtzʼaqobʼ ebʼ li naʼlebʼ
^ Li naraj xyeebʼal “ma wank junaq joʼ li Yos?”.
^ Maare «aʼan [aʼin naraj xyeebʼal, li kʼantiʼ li xuwajel ru] kiqʼaxeʼk ru».
^ Taawil xchʼolobʼankil li aatin, Diʼaabʼ.
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
