Apocalipsis 14:1-20
14 Tojaʼ naq xwil li Karneer xaqxo saʼ li tzuul Sion ut rikʼin aʼan wank 144,000 li tzʼiibʼanbʼil chi xpeekemebʼ li xkʼabʼaʼ aʼan ut li xkʼabʼaʼ li Xyuwaʼ.
2 Xwabʼi jun li xyaabʼ kuxej li kiʼelk chaq saʼ choxa; chanchan xyaabʼ li kʼiila haʼ* ut chanchan xyaabʼ li kawil kaaq. Li xwabʼi chanchan xyaabʼ xkux ebʼ laj bʼichanel li nekeʼxchʼeʼ li xʼaarp naq yookebʼ chi bʼichank.
3 Chanchan tawiʼ yookebʼ xbʼichankil jun akʼ bʼich chiru li kʼojaribʼaal, chiru li kaahibʼ chi ánjel ut chiruhebʼ li cheekel winq. Maaʼani kiruuk xtzolbʼal chiʼus li bʼich aʼin kaʼajwiʼ li 144,000 li loqʼbʼilebʼ saʼ li ruuchichʼochʼ.
4 Aʼanebʼ inkʼaʼ xeʼxmux ribʼ rikʼin ixq; inkʼaʼ bʼan xnawomebʼ ru ixq. Yookebʼ xtaqenkil li Karneer maakʼaʼ naxye bʼar yook chi xik. Xeʼloqʼeʼk saʼ xyanqebʼ li qas qiitzʼin joʼ xbʼeen ru li awimq choʼq re li Yos ut choʼq re li Karneer
5 ut inkʼaʼ xeʼbʼalaqʼik rikʼinebʼ raatin chi moko wankebʼ xpaltil.
6 Xwil jun chik li ánjel li yook chi rupupik saʼ xyi li choxa.* Wank chaq rikʼin li chaabʼil esil choʼq rehebʼ li wankebʼ saʼ ruuchichʼochʼ, aʼin naraj xyeebʼal, chixjunil ebʼ li tenamit, ebʼ li teep, ebʼ li aatinobʼaal ut ebʼ li kʼalebʼaal. Li chaabʼil esil aʼin twanq chi junelik.
7 Kixye chi kaw xyaabʼ xkux: «Oxloqʼimaq li Yos ut kʼehomaq xloqʼal xbʼaan naq ak xwulak xhoonalil naq traqoq aatin. Joʼkan naq loqʼonimaq li kixbʼaanu li choxa, li ruuchichʼochʼ, li palaw ut ebʼ li yuʼamhaʼ».
8 Chirix chik aʼan kichalk li xkabʼ ánjel li yook xyeebʼal: «Ak xqʼaxeʼk ru! Ak xqʼaxeʼk ru li Nimla Babilonia! Aʼan kixbʼaanu naq chixjunil ebʼ li tenamit re li ruuchichʼochʼ teʼrukʼ li bʼiin, li xbʼiinul li xrahinkil ru li muxuk ibʼ».*
9 Li rox ánjel kixtaqehebʼ ut kixye chi kaw xyaabʼ xkux: «Wi junaq li qas qiitzʼin naxloqʼoni li nimla xul li kʼajoʼ xjosqʼil joʼ ajwiʼ li xjalam u ut naxkʼul li eetalil chi xpeekem malaj chi ruqʼ,
10 trukʼ ajwiʼ li xbʼiinul li xjosqʼil li Yos, li moko yukʼinbʼil ta. Li Yos naxkʼe li bʼiin aʼin saʼ xsekʼil li xjosqʼil ut li qas qiitzʼin aʼin trahobʼtesiiq rikʼin xaml ut asuupr chiruhebʼ li santil ánjel ut chiru li Karneer.
11 Li xsibʼel li xaml li narahobʼtesink rehebʼ twanq chi junelik. Ut li nekeʼxloqʼoni li nimla xul li kʼajoʼ xjosqʼil joʼ ajwiʼ li xjalam u ut li nekeʼxkʼul reetalil li xkʼabʼaʼ inkʼaʼ teʼhilanq chi qʼeq chi moko chi kutan.
12 Joʼkan naq naʼajmank naq wanqebʼ xkuyum ebʼ li santil paabʼanel, li nekeʼxpaabʼ li xchaqʼrabʼ li Yos ut nekeʼxchap ribʼ chi kaw rikʼin xpaabʼankil li Jesús».
13 Ut xwabʼi jun li kawil kuxej saʼ choxa li yook xyeebʼal: «Tzʼiibʼa ebʼ li aatin aʼin: “Ebʼ li xtzolom li Qaawaʼ li teʼkamq sahebʼ saʼ xchʼool chalen anaqwan. Joʼkan, chan li santil musiqʼej, cheʼhilanq chirixebʼ li xkʼanjel xbʼaan naq chixjunil li xeʼxbʼaanu txik chirixebʼ”».
14 Tojaʼ naq xwil jun saqi choql ut li chunchu saʼ xbʼeen li choql chanchan jun ralal li winq; saʼ xjolom wank jun li koroon re oor ut saʼ ruqʼ wank jun li kʼonkʼokil chʼiichʼ li qʼes ru.
15 Jun chik li ánjel kiʼelk chaq saʼ rochoch li Yos ut chi kaw xyaabʼ xkux kixye re li chunchu saʼ xbʼeen li choql: «Chap li kʼonkʼokil chʼiichʼ, sikʼ ut chʼutubʼ ru li awimq. Ak xwulak xhoonalil naq taasikʼ ut taachʼutubʼ ru li awimq xbʼaan naq ak xqʼanoʼk chiʼus li awimq li wank saʼ chʼochʼ!».
16 Tojaʼ naq li chunchu saʼ xbʼeen li choql kiʼok xsikʼbʼal ru li awimq li wank saʼ ruuchichʼochʼ rikʼin li xkʼonkʼokil chʼiichʼ.
17 Jun chik li ánjel kiʼelk chaq saʼ rochoch li Yos li wank saʼ choxa; aʼan ajwiʼ wank xkʼonkʼokil chʼiichʼ li qʼes ru.
18 Ut saʼ xbʼeen li xnaʼaj li mayej* kiʼelk chaq jun chik li ánjel li wank xwankil saʼ xbʼeen li xaml. Ut chi kaw xyaabʼ xkux kixye re li wank rikʼin li kʼonkʼokil chʼiichʼ li qʼes ru: «Chap li kʼonkʼokil chʼiichʼ li qʼes ru ut sikʼ li xchiijilal ebʼ li uubʼ li wank saʼ chʼochʼ xbʼaan naq ak xqʼanoʼk chiʼus!».
19 Li ánjel kixchʼik li kʼonkʼokil chʼiichʼ saʼ chʼochʼ ut kixyokʼ ebʼ li xtoonal li uubʼ li wank saʼ ruuchichʼochʼ ut kixkut saʼ li nimla yatzʼlebʼaal. Li yatzʼlebʼaal aʼin reetalil li xjosqʼil li Yos.
20 Ebʼ li kawaay yookebʼ xyeqʼinkil ebʼ li xtoonal li uubʼ chirix li tenamit ut li kikʼ li kiʼelk saʼ li yatzʼlebʼaal kiwulak toj saʼ xteram xjolomebʼ li kawaay ut kachʼin chik ma oxibʼ siʼeent kilómetro kibʼeek li roq li kikʼ.
Xtzʼaqobʼ ebʼ li naʼlebʼ
^ Malaj «jun li nimla haʼ li napujujnak».
^ Malaj «saʼ iqʼ», «taqeʼq».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «li altar». Taawil xchʼolobʼankil li aatin, xnaʼaj li mayej.
