Apocalipsis 18:1-24
18 Chirix chik aʼin xwil jun chik li ánjel li yook chaq chi kubʼeek saʼ choxa rikʼin xnimal ru xwankilal ut li ruuchichʼochʼ kilemtzʼunoʼk xbʼaan li xloqʼal.
2 Aʼan kixye chi kaw xyaabʼ xkux: «Ak xqʼaxeʼk ru! Ak xqʼaxeʼk ru li Nimla Babilonia! Ut kikanaak choʼq xnaʼajebʼ li maaʼus aj musiqʼej bʼarwiʼ muqmukebʼ chixjunilebʼ li tzʼaj aj musiqʼej ut chixjunilebʼ li xul li nekeʼrupupik li tzʼajebʼ ru ut inkʼaʼ sa ilbʼilebʼ.
3 Xbʼaan naq li xbʼiinul li xrahinkil ru li muxuk ibʼ* kixbʼaanu naq chixjunilebʼ li tenamit teʼkalaaq. Ebʼ li awabʼej re li ruuchichʼochʼ xeʼxmux ribʼ* rikʼin li ixq aʼin ut ebʼ laj yakonel re li ruuchichʼochʼ xeʼbʼihomoʼk rikʼin li bʼihomal li kixtambʼresi li ixq aʼin chi maakʼaʼ xxutaan».
4 Ut xwabʼi jun chik li xyaabʼ kuxej li kichalk saʼ choxa ut yook xyeebʼal: «Elenqex rikʼin aʼan ex intenamit, wi inkʼaʼ nekeeraj maakobʼk rochbʼeen aʼan ut wi inkʼaʼ nekeeraj xkʼulbʼal ajwiʼ li xrahilal.
5 Xbʼaan naq li xmaak li ixq xtubʼlaak saʼ choxa ut li Yos traqoq aatin saʼ xbʼeen li maaʼusilal li kixbʼaanu.
6 Kʼehomaq reqaj re li maaʼusilal li kixbʼaanu. Joʼkan, qʼaxtesihomaq re xkabʼ sutil li kixbʼaanu. Ut saʼ li sekʼ li kixkawresi wiʼ li ukʼaʼ, kawresimaq wiibʼ sut li rukʼaʼ.
7 Xbʼaan naq kixkʼe xloqʼal ut inkʼaʼ kixutaanak chi xtambʼresinkil li xbʼihomal, tento trahobʼtesiiq ut tkʼeheʼq chi yaabʼak. Xbʼaan naq li ixq aʼin inkʼaʼ naxkanabʼ xyeebʼal saʼ li xchʼool: “Chunchukin joʼ awabʼej; moko laaʼin ta malkaʼan ut maajunwa tinyaabʼaq”.
8 Joʼkan naq chiru jun kutan ajwiʼ tchalq rahilal saʼ xbʼeen, aʼin naraj xyeebʼal kamk, yaabʼak ut tzʼokaak, ut tkʼateʼq chi junajwa rikʼin xaml. Xbʼaan naq li Jehobʼa* Yos li kiraqok aatin saʼ xbʼeen qʼaxal nim xwankil.
9 »Ebʼ li awabʼej re li ruuchichʼochʼ li xeʼxmux ribʼ* rikʼin li ixq ut xeʼxyal xsahil li bʼihomal li kixtambʼresi chi maakʼaʼ xxutaan, teʼyaabʼaq xbʼaan xrahilebʼ xchʼool ut teʼxten chiruhebʼ li xmaqabʼ naq teʼril li xsibʼel li xkʼatik li ixq.
10 Najt teʼkanaaq chi xaqxo xbʼaan naq nekeʼxxuwa naq teʼrahobʼtesiiq joʼ li ixq. Teʼxye: “Toqʼobʼ aawu! Toqʼobʼ aawu at nimla tenamit Babilonia li kaw aawibʼ! Ut saʼ junpaat li Yos kiraqok aatin saʼ aabʼeen!”.
11 »Joʼkan ajwiʼ, ebʼ laj yakonel re li ruuchichʼochʼ teʼyaabʼaq ut teʼrahoʼq xchʼool xbʼaan li ixq xbʼaan naq maaʼani chik tloqʼoq re li xkʼayebʼ:
12 aʼ li oor, li plaat, li chʼinaʼusil pek, li lemtzʼunil pek, li chaabʼil tʼikr re liin, li kaqi tʼikr li terto xtzʼaq, li tʼikr re seed ut maaʼani ajwiʼ tloqʼoq re li kʼaʼaq re ru li yiibʼanbʼil rikʼin sununkil cheʼ ut chixjunil li yiibʼanbʼil rikʼin xbʼaqel elepaant ut li yiibʼanbʼil rikʼin chʼinaʼusil cheʼ joʼ ajwiʼ li qʼanchʼiichʼ,* li chʼiichʼ malaj li yiibʼanbʼil rikʼin li pek li jalan jalanq xbʼonol;
13 joʼkan ajwiʼ li kaneel, li sununkil cheʼ li chalenaq saʼ India, li insiʼeens, li sununkil aseeyt, li sununkil bʼan, li bʼiin, li aseeyt re oliibʼ, li chaabʼil ariin, li triiw, ebʼ li wakax, ebʼ li karneer, ebʼ li kawaay, ebʼ li bʼelebʼaal chʼiichʼ,* ebʼ li moos ut ebʼ li qas qiitzʼin.
14 Joʼkan, chixjunil li chaabʼil li xaawaj xatxtzʼeqtaana ut chixjunil li sahil tzekemq ut li qʼaxal loqʼ xʼosoʼk choʼq aawe. Maajunwa chik tsuqʼiiq.
15 »Ebʼ laj yakonel li nekeʼxkʼayi chaq chixjunil aʼin, li xeʼbʼihomoʼk saʼ xkʼabʼaʼ li ixq, najt teʼkanaaq chi xaqxo xbʼaan naq nekeʼxxuwa naq teʼrahobʼtesiiq joʼ li ixq. Teʼyaabʼaq ut teʼrahoʼq xchʼool
16 ut yooqebʼ xyeebʼal: “Toqʼobʼ ru! Toqʼobʼ ru li nimla tenamit tiqto rikʼin chaabʼil liin rikʼin kaqi tʼikr li terto xtzʼaq ut nujenaq chi oor, chi chʼinaʼusil pek ut lemtzʼunil pek!
17 Ut saʼ junpaat kisach li nimla bʼihomal!”.
»Ut najt xeʼkanaak chi xaqxo chixjunilebʼ li nekeʼtaqlank saʼebʼ li nimla jukubʼ,* chixjunilebʼ li nekeʼbʼihajik saʼ palaw ut chixjunilebʼ li nekeʼkʼanjelak saʼebʼ li nimla jukubʼ.
18 Ut naq xeʼril li xsibʼel li xkʼatik, japjokebʼ re chi xyeebʼal: “Ma wank junaq tenamit joʼ li nimla tenamit?!”.
19 Nekeʼxkʼe poqs saʼ xjolomebʼ, yookebʼ chi yaabʼak ut rahebʼ saʼ xchʼool, japjokebʼ re chi xyeebʼal: “Toqʼobʼ ru, toqʼobʼ ru li nimla tenamit! Saʼ xkʼabʼaʼ li xbʼihomal, xeʼbʼihomoʼk chixjunilebʼ li wankebʼ xnimla jukubʼ* saʼ palaw! Saʼ junpaat kisacheʼk ru!”.
20 »At choxa chisahoʼq aachʼool chirix li kixkʼul! Chisahoʼq ajwiʼ leechʼool laaʼex li santil paabʼanel, laaʼex li apóstol ut laaʼex li propeet! Xbʼaan naq li Yos ak xraqok aatin saʼ xbʼeen aʼan xbʼaan li maaʼusilal li kixbʼaanu eere».
21 Ut jun li ánjel kaw ribʼ kixwaklesi jun li pek chanchan jun nimla pek re keʼek ut kixkut saʼ palaw ut kixye: «Joʼ nakutmank saʼ junpaat li pek aʼin joʼkan tkutmanq taqʼa li nimla tenamit Babilonia ut maajunwa chik t-ilmanq ru.
22 At Babilonia, maajunwa chik t-abʼimanq aawikʼin junaq li qas qiitzʼin li yooq chi bʼichank ut xchʼeʼbʼal li aarp chi moko junaq laj bʼichanel chi moko li tixchʼeʼ li xolbʼ malaj li trompeet. Maajunwa chik t-ilmanq aawikʼin junaq laj pakʼonel malaj junaq chik laj kʼanjel. Maajunwa chik t-abʼimanq aawikʼin li xyaabʼ junaq li pek re keʼek.
23 Maajunwa chik tlemtzʼunq aawikʼin li xsaqenkil li kandil* chi moko t-abʼimanq aawikʼin li xyaabʼ xkux jun li winq li ok re chi sumlaak malaj jun li ixq li ok re chi sumlaak. Xbʼaan naq ebʼ li nekeʼyakok aawikʼin aʼanebʼ li xninqal ru winq saʼ ruuchichʼochʼ ut xbʼaan naq xaabʼalaqʼi chixjunilebʼ li tenamit naq xat-aatinak rikʼinebʼ li maaʼus aj musiqʼej.*
24 Joʼkan tzʼaqal, rikʼin li ixq kitawmank xkikʼel ebʼ li propeet, ebʼ li santil paabʼanel ut chixjunilebʼ li xeʼkamsiik saʼ ruuchichʼochʼ».
Xtzʼaqobʼ ebʼ li naʼlebʼ
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Taawil xchʼolobʼankil li aatin, Jehobʼa.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «li cobre».
^ Li bʼelebʼaal chʼiichʼ aʼin kaahibʼ xyaantil ut kawaay nakelonk re.
^ Malaj «li nimla kayuuk».
^ Malaj «xnimla kayuuk».
^ Malaj «li lámpara».
^ Malaj «naq xaawoksi li xnaʼlebʼebʼ li maaʼus aj musiqʼej», «naq xattuulak», «naq xaawoksi li bʼan li nakanobʼresink u». Taawil xchʼolobʼankil li aatin, aatinak rikʼinebʼ li maaʼus aj musiqʼej.
