Apocalipsis 19:1-21
19 Chirix chik aʼin xwabʼi jun li kawil kuxej saʼ choxa chanchan xyaabʼ xkux li kʼiila tenamit. Yookebʼ xyeebʼal: «Teenima ru li Jehobʼa!* Li kolbʼa ibʼ, li loqʼal ut li wankilal re li Qayos
2 xbʼaan naq tiik ru li raqok aatin li naxbʼaanu ut paabʼajel. Aʼan ak xraqok aatin saʼ xbʼeen li xnimal ru aj yumbʼeet (li kixpoʼ li ruuchichʼochʼ naq kixmux ribʼ)* ut kixkʼe chi xtojbʼal xmaak xbʼaan naq kixkamsihebʼ li xmoos».
3 Ut saʼ junpaat xeʼxye xkabʼ sutil: «Teenima ru li Jehobʼa!* Li xsibʼel aʼan* yooq chi taqeʼq chi junelik».
4 Li 24 chi cheekel winq ut li kaahibʼ chi ánjel xeʼxwiqʼibʼ ribʼ ut xeʼxloqʼoni li Yos, li chunchu saʼ li kʼojaribʼaal, ut xeʼxye: «Joʼkan taxaq! Teenima ru li Jehobʼa!».*
5 Joʼkan ajwiʼ, saʼ li kʼojaribʼaal kiʼelk chaq jun li xyaabʼ kuxej li kixye: «Loqʼonimaq li Qayos, laaʼex li moos ut laaʼex li nekeeroxloqʼi, joʼ kokʼ joʼ ninq».
6 Ut xwabʼi chanchan xyaabʼ xkux jun li nimla tenamit, joʼ xyaabʼ li kʼiila haʼ ut joʼ xyaabʼ li kawil kaaq. Yookebʼ xyeebʼal: «Teenima ru li Jehobʼa!* Xbʼaan naq li Jehobʼa* li Qayos, li Nimajwal, ak xʼok chi awabʼejink!
7 Qʼaxal sahaq saʼ qachʼool ut qakʼehaq xloqʼal xbʼaan naq ak xwulak xkutankil li xsumlajik li Karneer ut kawresinbʼil chik li rixaqil.
8 Joʼkan tzʼaqal, li ixq li ok re chi sumlaak xkʼemank re li chaabʼil liin li nalemtzʼunk ru ut maakʼaʼ xtzʼajnil re naq tixtiqibʼ ribʼ. Li chaabʼil liin reetalil li xchaabʼil bʼaanuhom ebʼ li santil paabʼanel».
9 Ut li ánjel kixye we: «Tzʼiibʼa aʼin: “Sahebʼ saʼ xchʼool li bʼoqbʼilebʼ saʼ li nimla waʼak li twanq saʼ li xsumlajik li Karneer”». Ut kixye ajwiʼ: «Ebʼ li aatin aʼin yaal xbʼaan naq chalenaq rikʼin li Yos».
10 Chirix chik aʼin, xinkut wibʼ chi roq re xloqʼoninkil ru. Abʼan aʼan kixye we: «Kʼaru yookat? Maabʼaanu aʼin! Laaʼin yal moosin joʼ laaʼat ut ebʼ laawechpaabʼanel li xaqabʼanbʼilebʼ chi xkʼebʼal chi naweʼk chirix li Jesús. Li Yos taaloqʼoni ru! Xbʼaan naq ebʼ li propesiiy nekeʼkʼanjelak re xyeebʼal li yaal chirix li Jesús».
11 Xwil chi teeto li choxa, tojaʼ naq kutamil jun li saqi kawaay. Ut li chunchu saʼ xbʼeen li kawaay naxkʼabʼaʼi Inkʼaʼ Naxtzʼeqtaana li Yos ut Naxye li Yaal, naraqok aatin ut nayalok saʼ tiikilal.
12 Saʼ ru chanchan ruʼuj raqʼ xaml ut saʼ xjolom wank naabʼal li koroon. Ut rikʼin tzʼiibʼanbʼil jun li kʼabʼaʼej li maaʼani nanawok re, kaʼajwiʼ aʼan.
13 Li tʼikr li tiqto wiʼ rachrachinbʼil chi kikʼ ut joʼkaʼin nakʼabʼaʼiik: Li Raatin li Yos.
14 Joʼkan ajwiʼ, ebʼ li chʼuut chi soldaad li wankebʼ saʼ choxa yookebʼ xtaqenkil chirix saqi kawaay ut tiqtokebʼ rikʼin chaabʼil liin saq xbʼonol ut maakʼaʼ xtzʼajnil.
15 Saʼ re naʼelk chaq jun li jutzʼchʼiichʼ najt roq ut qʼes ru re xkamsinkilebʼ li tenamit. Ut joʼ jun laj ilol karneer tixbʼeresihebʼ li qas qiitzʼin rikʼin jun li xuqʼ re chʼiichʼ. Naxyeqʼi ajwiʼ ebʼ li uubʼ saʼ li xyatzʼlebʼaal li xjosqʼil li Nimajwal Yos.
16 Ut chiru li xtʼikr saʼ xbʼeen li raʼ tzʼiibʼanbʼil jun li kʼabʼaʼej li naxye: Awabʼej saʼ xbʼeenebʼ li awabʼej ut Qaawaʼ saʼ xbʼeenebʼ li qaawaʼ.
17 Chirix chik aʼan, xwil ajwiʼ jun li ánjel xaqxo chiru li saqʼe. Chi kaw xyaabʼ xkux kixye re chixjunilebʼ li xul li nekeʼrupupik saʼ xyi li choxa:* «Chalqex arin! Chʼutubʼamaq eeribʼ choʼq re li nimla waʼak li kixkawresi li Yos.
18 Waʼomaq li xtibʼel ebʼ li awabʼej, xtibʼelebʼ li nekeʼjolomink rehebʼ laj puubʼ, xtibʼelebʼ li wankebʼ xwankil, xtibʼelebʼ li kawaay ut li wankebʼ saʼ xbʼeen, xtibʼelebʼ chixjunil li wankebʼ choʼq moos ut li moko wankebʼ ta choʼq moos, joʼ ninq joʼ kokʼ».
19 Ut xwil naq li nimla xul li kʼajoʼ xjosqʼil, ebʼ li awabʼej re li ruuchichʼochʼ ut ebʼ li chʼuut chi soldaad li nekeʼochbʼeenink re, chʼutchʼukebʼ re yalok saʼ xbʼeen li chunchu chirix kawaay ut saʼ xbʼeen li chʼuut chi soldaad li yook chirix.
20 Ut kichapeʼk li nimla xul li kʼajoʼ xjosqʼil ut rochbʼeen aʼan li bʼalaqʼil propeet li kixbʼaanu ebʼ li eetalil chiru li nimla xul li kʼajoʼ xjosqʼil re xbʼalaqʼinkilebʼ li xeʼkʼuluk re li reetalil li nimla xul li kʼajoʼ xjosqʼil ut li xeʼloqʼonink re xjalam u li nimla xul aʼin. Ut li chunchu saʼ xbʼeen li kawaay kixkut chi yoʼyo li nimla xul li kʼajoʼ xjosqʼil joʼ ajwiʼ li bʼalaqʼil propeet saʼ li palaw li naqʼichichnak xxamlel ut asuupr.
21 Abʼan li toj xeʼkanaak, xeʼkamsiik rikʼin li jutzʼchʼiichʼ najt roq li kiʼelk chaq saʼ re li chunchu chirix kawaay. Ut chixjunilebʼ li xul li nekeʼrupupik xeʼnujak rikʼin li xtibʼelebʼ li qas qiitzʼin aʼin.
Xtzʼaqobʼ ebʼ li naʼlebʼ
^ Malaj «Aleluya!». Li kʼabʼaʼej Jehobʼa nayeemank ajwiʼ rikʼin wiibʼ oxibʼ li tzʼiibʼ Jah. Taawil xchʼolobʼankil li aatin, Jehobʼa.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «Aleluya!». Li kʼabʼaʼej Jehobʼa nayeemank ajwiʼ rikʼin wiibʼ oxibʼ li tzʼiibʼ Jah. Taawil xchʼolobʼankil li aatin, Jehobʼa.
^ Aʼin naraj xyeebʼal, li tenamit Babilonia.
^ Malaj «Aleluya!». Li kʼabʼaʼej Jehobʼa nayeemank ajwiʼ rikʼin wiibʼ oxibʼ li tzʼiibʼ Jah. Taawil xchʼolobʼankil li aatin, Jehobʼa.
^ Malaj «Aleluya!». Li kʼabʼaʼej Jehobʼa nayeemank ajwiʼ rikʼin wiibʼ oxibʼ li tzʼiibʼ Jah. Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Malaj «saʼ iqʼ», «taqeʼq».
