Apocalipsis 2:1-29
2 »Tzʼiibʼa li ánjel re li chʼuut re Éfeso: Aʼin li naxye li wank saʼ xnim ruqʼ li wuqubʼ chi chahim ut nabʼeek saʼ xyanq li wuqubʼ xnaʼaj kandeel* re oor:
2 “Ninnaw laabʼaanuhom, li xkawil laakʼanjel ut laakuyum. Ninnaw ajwiʼ naq inkʼaʼ nakaakʼulubʼa ebʼ li winq li maaʼusebʼ xnaʼlebʼ ut naq xaayalebʼ rix li nekeʼxye naq wankebʼ choʼq apóstol abʼan moko yaal ta ut xaakʼe reetal naq ebʼ aj tikʼtiʼ.
3 Joʼkan ajwiʼ, xbʼaan linkʼabʼaʼ xaakuy naabʼal li chʼaʼajkilal ut toj maajiʼ nakatlubʼ.
4 Abʼan inkʼaʼ sa linchʼool aawikʼin xbʼaan li naʼlebʼ aʼin: inkʼaʼ chik nakatrahok joʼ saʼ xtiklajik.
5 »”Joʼkan bʼiʼ, jultikoʼq aawe li rahom li xwank chaq aawikʼin saʼ xtiklajik abʼan xaatzʼeq, yotʼ aachʼool ut jal laanaʼlebʼ ut bʼaanu wiʼ chik li nakaabʼaanu chaq saʼ xtiklajik. Wi inkʼaʼ nakaabʼaanu aʼin, tinkʼulunq ut tinmaqʼ chaawu li xnaʼaj laakandeel* abʼan inkʼaʼ tinbʼaanu wi nakaayotʼ aachʼool ut nakaajal laanaʼlebʼ.
6 Abʼan wank jun li chaabʼil naʼlebʼ li yookat xbʼaanunkil: xikʼ nakaawil li xbʼaanuhomebʼ li nekeʼtaqenk re laj Nicolás. Laaʼin xikʼ ajwiʼ nawil aʼin.
7 Li wank xxik chixkʼehaq xchʼool chi rabʼinkil li naxye li santil musiqʼej* rehebʼ li chʼuut: li tqʼaxoq u tinkʼe chixwaʼ li ru li cheʼ li nakʼehok yuʼam li wank saʼ li xchʼinaʼusil naʼajej li Yos”.
8 »Tzʼiibʼa li ánjel re li chʼuut re Esmirna: Aʼin li naxye li naxkʼabʼaʼi li Xtiklajik ut li Xraqik, li kikamk ut kiwank wiʼ chik xyuʼam:
9 “Ninnaw laarahilal ut laanebʼaʼil usta bʼihomat. Ninnaw ajwiʼ ruhebʼ li nekeʼxkʼe ribʼ choʼq aj judiiy abʼan nekeʼxye li inkʼaʼ us cheerix. Aʼanebʼ jun chʼuut chi qas qiitzʼin li maawaʼebʼ aj judiiy. Li chʼuut aʼin re laj Tza.
10 Matxuwak chirix li rahilal li taakʼul. Kʼe reetal laj Tza* inkʼaʼ tixkanabʼ xkʼebʼal saʼ tzʼalam wiibʼ oxibʼ eere re naq tyaleʼq eerix saʼ chixjunil ut texrahobʼtesiiq chiru lajeebʼ kutan. Kaw xaqxoqat toj reetal tatkamq ut laaʼin tinkʼe aawe li yuʼam joʼ maatan.
11 Li wank xxik rabʼihaq li naxye li santil musiqʼej rehebʼ li chʼuut: li tqʼaxoq u maajunwa trahobʼtesiiq xbʼaan li xkabʼ kamk”.
12 »Tzʼiibʼa li ánjel re li chʼuut re Pérgamo: Aʼin li naxye li wank rikʼin li jutzʼchʼiichʼ li kaʼpakʼal xqʼesnal, najt roq ut qʼes ru:
13 “Ninnaw naq nakatnaʼajink bʼarwiʼ wank li xkʼojaribʼaal laj Tza. Usta joʼkan, inkʼaʼ nakaakanabʼ xchapbʼal aawibʼ chi kaw rikʼin linkʼabʼaʼ. Ut ninnaw ajwiʼ naq inkʼaʼ xaakanabʼ laapaabʼal chiwix chi moko xaabʼaanu saʼ xkutankil laj Antipas li kixye li yaal chiwix ut kikamsiik saʼ leetenamit bʼarwiʼ nanaʼajink laj Tza.
14 »”Abʼan inkʼaʼ sa linchʼool aawikʼin xbʼaan li naʼlebʼ aʼin: wankebʼ aawikʼin li nekeʼxchap ribʼ chi kaw rikʼin li xkʼutum laj Balaam, li kixkʼut chiru laj Balac raaleenkilebʼ* li ralal xkʼajol laj Israel re naq teʼxwaʼ li tibʼ li mayejanbʼil chiruhebʼ li pechʼbʼil yos ut teʼtʼaneʼq saʼ li muxuk ibʼ.*
15 Joʼkan ajwiʼ, aawikʼin wankebʼ li nekeʼxchap ribʼ chi kaw rikʼin li xkʼutumebʼ li nekeʼtaqenk re laj Nicolás.
16 Joʼkan naq yotʼ aachʼool ut jal laanaʼlebʼ. Wi inkʼaʼ nakaabʼaanu, chi seebʼ tinchalq ut tinyaloq saʼ xbʼeenebʼ rikʼin li jutzʼchʼiichʼ li najt roq li naʼelk saʼ we.
17 »”Li wank xxik rabʼihaq li naxye li santil musiqʼej rehebʼ li chʼuut: li tqʼaxoq u tinkʼe re li muqmukil maná ut jun li chʼina saqi pek. Chiru li pek aʼin tzʼiibʼanbʼil jun li akʼil kʼabʼaʼej li maaʼani nanawok re, kaʼajwiʼ li nakʼuluk re”.
18 »Tzʼiibʼa li ánjel re li chʼuut re Tiatira: Aʼin li naxye li Ralal li Yos li chanchan ruʼuj raqʼ xaml saʼ ru ut li roq chanchan li tzʼaqal qʼanchʼiichʼ,* li nahaʼresiik saʼ xaml:
19 “Ninnaw laabʼaanuhom, laarahom, laapaabʼal, laakʼanjel chiru li Yos ut laakuyum. Ut ninnaw naq li nakaabʼaanu anaqwan, qʼaxal naabʼal chiru li xaabʼaanu chaq saʼ xtiklajik.
20 »”Abʼan inkʼaʼ sa linchʼool aawikʼin xbʼaan li naʼlebʼ aʼin: nakaakʼulubʼa li xJezabel, li ixq li naxkʼe ribʼ choʼq propeet ut naxbʼalaqʼihebʼ linmoos rikʼin li xkʼutum re naq teʼtʼaneʼq saʼ li muxuk ibʼ* ut teʼxwaʼ li tibʼ li mayejanbʼil chiruhebʼ li pechʼbʼil yos.
21 Xinkʼe xhoonal re naq tixyotʼ xchʼool ut tixjal xnaʼlebʼ, abʼan li ixq aʼin inkʼaʼ naraj xyotʼbʼal xchʼool ut xjalbʼal xnaʼlebʼ chirix li muxuk ibʼ* li naxyuʼami.
22 Kʼe reetal, tinbʼaanu naq tyajerq toj reetal inkʼaʼ chik twakliiq chiru chʼaat ut li nekeʼxmux li xsumlajik* rikʼin tinbʼaanu naq qʼaxal ra teʼxkʼul, abʼan inkʼaʼ teʼxkʼul aʼin wi nekeʼxyotʼ xchʼool ut nekeʼxjal xnaʼlebʼ chirix li maaʼusilal li xeʼqʼunbʼesiik wiʼ xbʼaan li ixq aʼin.
23 Tinkamsihebʼ li ralal xkʼajol li ixq rikʼin jun li yajel li nakamsink. Chi joʼkan chixjunilebʼ li chʼuut teʼxnaw naq laaʼin li nintzʼilok re li wank toj saʼ xchamal li kʼaʼuxej ut li chʼoolej. Ut cheejunqal texinqʼajkamu aʼ yaal chanru leebʼaanuhom.
24 »”Abʼan laaʼex li junchʼol li wankex Tiatira, li inkʼaʼ nekeekʼulubʼa li xkʼutum li xJezabel ut li maajunwa xeenaw chirix li bʼalaqʼil kʼutum li nachalk rikʼin laj Tza, ninye eere: «Inkʼaʼ nintenebʼ saʼ eebʼeen junaq chik li iiq.
25 Abʼanan, chapomaq eeribʼ chi kaw rikʼin li ak wank eerikʼin toj reetal tinchalq.
26 Li tqʼaxoq u ut inkʼaʼ tixkanabʼ linbʼe toj saʼ xraqik tinkʼe xwankil saʼ xbʼeenebʼ li tenamit
27 joʼ chanru xinkʼul li wankilal saʼ ruqʼ Linyuwaʼ. Ut aʼan joʼ aj ilol karneer tixbʼeresihebʼ li qas qiitzʼin rikʼin li xxuqʼ re chʼiichʼ chi joʼkan tixpukʼihebʼ joʼebʼ li sekʼ li yiibʼanbʼil rikʼin sebʼ.
28 Tinkʼe ajwiʼ re li xchahim li eqʼla.
29 Li wank xxik, chixkʼehaq xchʼool chi rabʼinkil li naxye li santil musiqʼej rehebʼ li chʼuut»”.
Xtzʼaqobʼ ebʼ li naʼlebʼ
^ Li xnaʼaj kandeel aʼin wank wuqubʼ xxamlel.
^ Li xnaʼaj kandeel aʼin wank wuqubʼ xxamlel.
^ Li aatin saʼ griego, pnéuma. Taawil xchʼolobʼankil li aatin, musiqʼ.
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
^ Malaj «xkʼebʼalebʼ chi tichkʼok».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «cobre».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «li nekeʼxmux xkaxaar».
