Apocalipsis 22:1-21
22 Tojaʼ naq aʼan kixkʼut chiwu jun li nimaʼ li nakʼehok yuʼam, saq ru joʼ li lem li yook chaq chi elk saʼ li xkʼojaribʼaal li Yos ut li Karneer
2 ut li nimaʼ aʼin nanumeʼk saʼ xyi li nim bʼe li wank saʼ li tenamit. Saʼ xkaʼpakʼalil li nimaʼ wank ebʼ cheʼ li nekeʼkʼehok yuʼam li nekeʼuuchink rajlal po ut kabʼlaju sut nekeʼuuchink chiru li chihabʼ. Ebʼ li xxaq li cheʼ naʼoksimank re xbʼanbʼalebʼ li qas qiitzʼin.
3 Ut li tenamit inkʼaʼ chik tixkʼul junaq li maaʼusilal xbʼaan naq li xkʼojaribʼaal li Yos ut li Karneer wanq aran. Ut ebʼ li xmoos teʼxloqʼoni ru,
4 teʼril li xnaqʼru ut tzʼiibʼanbʼilaq li xkʼabʼaʼ aʼan chi xpeekemebʼ.
5 Inkʼaʼ chik twanq li qʼoqyink ut inkʼaʼ chik t-ajmanq xsaqenkil li kandil* chiruhebʼ chi moko xsaqenkil li saqʼe xbʼaan naq li Jehobʼa* tkutanobʼresinq rehebʼ ut ebʼ aʼan teʼawabʼejinq chi junelik.
6 Li ánjel kixye we: «Ebʼ li aatin aʼin tzʼaqal yaal ut paabʼajel. Joʼkan, li Jehobʼa* aʼ li Yos li kiroksi ebʼ li propeet re aatinak, kixtaqla chaq li xʼánjel re xkʼutbʼal chiruhebʼ li xmoos li tkʼulmanq chi seebʼ.
7 Kʼe reetal, chi seebʼ tinchalq. Sahaq saʼ xchʼool li naʼabʼink re li propesiiy li tzʼiibʼanbʼil saʼ li hu aʼin».
8 Laaʼin, laj Juan, xwabʼi ut xwil aʼin. Naq ak xwil ut xwabʼi aʼin xinkut wibʼ chi roq li ánjel li kixkʼut chiwu chixjunil aʼin re xloqʼoninkil ru.
9 Abʼan aʼan kixye we: «Kʼaru yookat? Maabʼaanu aʼin! Laaʼin yal moosin joʼ laaʼat ut ebʼ laawechpaabʼanel li wankebʼ choʼq propeet ut joʼ ebʼ li nekeʼabʼink re li tzʼiibʼanbʼil saʼ li hu aʼin. Loqʼoni ru li Yos».
10 Ut kixye ajwiʼ we: «Maamuq ebʼ li aatin re li propesiiy aʼin xbʼaan naq nachʼ wank li hoonal li xaqabʼanbʼil.
11 Li maaʼus xchʼool mixkanabʼ xbʼaanunkil li maaʼusilal ut li tzʼaj ru xnaʼlebʼ mixkanabʼ xbʼaanunkil li tzʼaj ru. Abʼan li tiik xchʼool mixkanabʼ wank saʼ tiikilal ut li saant mixkanabʼ wank saʼ santilal.
12 »“Abʼi aʼin! Chi seebʼ tinchalq ut tinqʼajkamu li junjunq aʼ yaal chanru li xbʼaanuhom.
13 Laaʼin li Alfa ut li Omega,* li xtiklajik ut li xraqik.
14 Sahebʼ saʼ xchʼool li nekeʼxpuchʼ li xjut-aqʼ re naq teʼruuq xwaʼbʼal li cheʼ li nakʼehok yuʼam ut re naq teʼruuq chi numeʼk saʼ rokebʼaal li tenamit.
15 Chirix kabʼl wankebʼ li tzʼiʼ,* li nekeʼaatinak rikʼinebʼ li maaʼus aj musiqʼej,* ebʼ li nekeʼxmux ribʼ,* ebʼ laj kamsinel, ebʼ li nekeʼxloqʼoni li pechʼbʼil yos* ut chixjunilebʼ li nekeʼwulak chiru li tikʼtiʼ ut kʼaynaqebʼ chi tikʼtiʼik”.
16 »“Laaʼin, li Jesús, xintaqla linʼánjel re xkʼebʼal cheenaw aʼin re naq us wanqebʼ li chʼuut. Laaʼin li xxeʼ ut ralal laj David ut li chahim li nalemtzʼunk eqʼla”».
17 Li santil musiqʼej* ut li ixq li ok re chi sumlaak inkʼaʼ nekeʼxkanabʼ xyeebʼal «Chalqat!». Ut li t-abʼinq re chi xyeehaq «Chalqat!». Ut li tchaqiq re, chalqaq. Li naraj haʼ rukʼaʼq chi maatan li haʼ li nakʼehok yuʼam.
18 «Chixjunilebʼ li nekeʼabʼink re li propesiiy li tzʼiibʼanbʼil saʼ li bʼotbʼilhu aʼin, laaʼin ninye rehebʼ: wi naxkʼe xtzʼaqobʼ li naʼlebʼ aʼin li Yos tixtaqla saʼ xbʼeen li rahilal li tzʼiibʼanbʼil saʼ li bʼotbʼilhu aʼin;
19 ut wi junaq li qas qiitzʼin narisi junaq li aatin li wank saʼ li propesiiy re li bʼotbʼilhu aʼin, li Yos inkʼaʼ tixkanabʼ naq tixwaʼ li cheʼ li nakʼehok yuʼam ut inkʼaʼ tixkanabʼ naq t-oq saʼ li santil tenamit, aʼin li wank chi tzʼiibʼanbʼil saʼ li bʼotbʼilhu aʼin.
20 »Li naxkʼe chi naweʼk chixjunil aʼin naxye: “Chʼolchʼo naq chi seebʼ tinchalq”».
«Joʼkan taxaq! Kim Qaawaʼ Jesús».
21 Aʼ taxaq li xnimal rusilal li Yos chi wanq rikʼinebʼ li santil paabʼanel.
Xtzʼaqobʼ ebʼ li naʼlebʼ
^ Malaj «li lámpara».
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Ebʼ li aatin Alfa ut omega aʼan li xbʼeen ut li xraqik li tzʼiibʼ saʼ griego.
^ Aʼin naraj xyeebʼal, ebʼ li kʼaynaqebʼ chi xbʼaanunkil li naʼlebʼ li qʼaxal tzʼaj ru chiru li Yos.
^ Malaj «nekeʼroksi li xnaʼlebʼebʼ li maaʼus aj musiqʼej», «nekeʼtuulak», «nekeʼroksi li bʼan li nakanobʼresink u». Taawil xchʼolobʼankil li aatin, aatinak rikʼinebʼ li maaʼus aj musiqʼej.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Malaj «yalaq kʼaru chik».
^ Li aatin saʼ griego, pnéuma. Taawil xchʼolobʼankil li aatin, musiqʼ.
