Apocalipsis 6:1-17
-
Li Karneer naxte waqibʼ rehebʼ li wuqubʼ chi letzlebʼ (1-17)
-
Li chunchu saʼ xbʼeen li saqi kawaay naxqʼax ruhebʼ li xikʼ nekeʼilok re (1, 2)
-
Li chunchu saʼ xbʼeen li kaqi kawaay narisi li tuqtuukilal saʼ li ruuchichʼochʼ (3, 4)
-
Li chunchu saʼ xbʼeen li qʼeqi kawaay naxkʼam chaq li weʼej (5, 6)
-
Li chunchu saʼ xbʼeen li kawaay li chaacha rix naxkʼabʼaʼi Kamk (7, 8)
-
«Xwil rubʼel li xnaʼaj li mayej li xkikʼelebʼ li xeʼkamsiik» (9-11)
-
Jun li nimla hiik (12-17)
-
6 Kiwil naq li Karneer kixte jun rehebʼ li wuqubʼ chi letzlebʼ ut xwabʼi jun rehebʼ li kaahibʼ chi ánjel li chanchan kaaq li xyaabʼ xkux ut kixye: «Ayu!».
2 Tojaʼ naq xwil jun li saqi kawaay. Ut li winq li chunchu saʼ xbʼeen li kawaay wank saʼ ruqʼ jun li kʼanjelobʼaal re yalok.* Kikʼeheʼk re jun li koroon ut xkoho chi xqʼaxbʼal ruhebʼ li xikʼ nekeʼilok re.
3 Naq li Karneer kixte li xkabʼ letzlebʼ, xwabʼi naq li xkabʼ ánjel kixye: «Ayu!».
4 Ut kiʼelk jun chik li kawaay li kaq xbʼonol joʼ li xaml. Ut li winq li chunchu saʼ xbʼeen kikʼemank xwankil re risinkil li tuqtuukilal saʼ xbʼeen li ruuchichʼochʼ re naq ebʼ li qas qiitzʼin teʼxkamsi ribʼ chiribʼilebʼ ribʼ ut kikʼemank re jun li nimla jutzʼchʼiichʼ.
5 Naq li Karneer kixte li rox letzlebʼ, kiwabʼi li rox ánjel chi xyeebʼal: «Ayu!». Ut kiwil jun qʼeqi kawaay ut li winq li chunchu saʼ xbʼeen wank saʼ ruqʼ jun li bʼislebʼ.
6 Saʼ xyi ebʼ li kaahibʼ chi ánjel xwabʼi jun li yaabʼ kuxej yook xyeebʼal: «Jun denario* xtzʼaq jun liibʼr* li triiw ut jun denario* xtzʼaq oxibʼ liibʼr* li sebʼaad; maabʼatzʼune li aseeyt re oliibʼ chi moko li bʼiin».
7 Naq li Karneer kixte li xka letzlebʼ, xwabʼi li xyaabʼ xkux li xka ánjel naq kixye: «Ayu!».
8 Tojaʼ naq xwil jun li kawaay chaacha rix. Ut Kamk nakʼabʼaʼiik li chunchu saʼ xbʼeen ut li Muqlebʼaal Kamenaq* li yook chi taqenk re nachʼ wank chixkʼatq. Ut xeʼkʼeheʼk xwankil saʼ xbʼeen li xka jachal li ruuchichʼochʼ re xkamsinkilebʼ li qas qiitzʼin rikʼin jun li jutzʼchʼiichʼ najt roq, rikʼin weʼej, rikʼin yajel li nakamsink ut rikʼinebʼ josqʼ aj xul li wankebʼ saʼ ruuchichʼochʼ.
9 Naq li Karneer kixte li roʼ letzlebʼ, xwil rubʼel li xnaʼaj li mayej* li xkikʼelebʼ li xeʼkamsiik xbʼaan naq xeʼxpaabʼ li raatin li Yos ut xbʼaan naq xeʼxkʼe chi naweʼk aʼin.
10 Ebʼ aʼin yookebʼ chaq xyeebʼal rikʼin kawil kuxej: «At Qaawaʼ li Nakaajolomi Chixjunil, li saant ut li yoʼyo, toj joqʼe tatraqoq aatin saʼ xbʼeenebʼ li wankebʼ saʼ ruuchichʼochʼ ut taakʼe reqaj li xeʼxbʼaanu qe naq xooʼeʼxkamsi?».
11 Kikʼemank re chixjunilebʼ jun li saqi jut-aqʼ. Kiyeemank ajwiʼ rehebʼ naq teʼhilanq bʼayaq chik toj reetal ttzʼaqloq li xkʼihalil ebʼ li rechmoosil ut ebʼ li rechpaabʼanelil li okebʼ re chi kamsiik joʼ xeʼkamsiik aʼan.
12 Ut xwil naq li Karneer kixte li xwaq letzlebʼ. Kiwank jun nimla hiik li kʼajoʼ xkawil ut li saqʼe kiqʼeqoʼk joʼ li qʼeqi tʼikr,* li po xkaqoʼk joʼ li kikʼ
13 ut ebʼ li chahim xeʼtʼaneʼk chaq chiru chʼochʼ joʼ nekeʼtʼaneʼk li iig li toj rax naq nekeʼchiqʼleek xbʼaan li kawil iqʼ.
14 Li choxa kixbʼot ribʼ joʼ jun bʼotbʼilhu ut kiʼelk saʼ xnaʼaj ut chixjunilebʼ li tzuul ut chixjunilebʼ li naʼaj li sutsu chi haʼ xeʼbʼoqʼeʼk saʼ xnaʼaj.
15 Tojaʼ naq ebʼ li awabʼej re li ruuchichʼochʼ, li ninqebʼ ru xkʼanjel, li nekeʼjolomink rehebʼ laj puubʼ, ebʼ li bʼihom, li wankebʼ xwankil, chixjunilebʼ li wankebʼ choʼq moos ut li moko wankebʼ ta choʼq moos xeʼxmuq ribʼ saʼebʼ li ochoch pek ut saʼ xyanq ebʼ li ninqi pek saʼebʼ li tzuul.
16 Ut inkʼaʼ nekeʼxkanabʼ xyeebʼal rehebʼ li tzuul ut ebʼ li ninqi pek: «Tʼanenqex saʼ qabʼeen ut muqumaqo chiru li chunchu saʼ li kʼojaribʼaal ut chiru li xjosqʼil li Karneer
17 xbʼaan naq xwulak xnimal xkutankil li xjosqʼilebʼ ut ani naru nakanaak chi xaqxo?».
Xtzʼaqobʼ ebʼ li naʼlebʼ
^ Li kʼanjelobʼaal aʼin naʼoksimank chaq re kutuk jutzʼcheʼ.
^ Jun li denario aʼan xtojbʼal jun li winq li nakʼanjelak chiru jun kutan. Li denario aʼan jun li tumin re plaat li nekeʼroksi ebʼ laj Roma.
^ Saʼ griego «jun rehebʼ li kaahibʼ chi bʼiis», aʼin naraj xyeebʼal, 1,08 liitr.
^ Jun li denario aʼan xtojbʼal jun li winq li nakʼanjelak chiru jun kutan. Li denario aʼan jun li tumin re plaat li nekeʼroksi ebʼ laj Roma.
^ Saʼ griego «jun rehebʼ li kaahibʼ chi bʼiis», aʼin naraj xyeebʼal, 1,08 liitr.
^ Malaj «li Hades». Taawil xchʼolobʼankil li aatin, Hades.
^ Malaj «li altar». Taawil xchʼolobʼankil li aatin, xnaʼaj li mayej.
^ Li qeqi tʼikr aʼin rajlal nayiibʼamank chaq rikʼin rismal chibʼaat.
