Apocalipsis 7:1-17
7 Chirix chik aʼan xwil kaahibʼ li ánjel xaqxokebʼ saʼ xkaaxukuutil li ruuchichʼochʼ. Yookebʼ xchapbʼal li kaahibʼ chi iqʼ re li ruuchichʼochʼ li kʼajoʼ xkawil re naq inkʼaʼ t-apunq chaq junaq li kawil iqʼ saʼ xbʼeen li ruuchichʼochʼ chi moko saʼ xbʼeen li palaw chi moko saʼ xbʼeen junaq li cheʼ.
2 Xwil ajwiʼ jun chik li ánjel li yook chaq chi taqeʼk saʼ li naʼaj bʼarwiʼ naʼelk li saqʼe, chapcho xbʼaan jun li kʼanjelobʼaal li kikʼeheʼk re xbʼaan li Yos re xkʼebʼal reetalil ebʼ li qas qiitzʼin. Ut chi kaw xyaabʼ xkux, kixbʼoq li kaahibʼ chi ánjel li xeʼkanabʼaak chi xrahobʼtesinkil li ruuchichʼochʼ ut li palaw.
3 Kixye rehebʼ: «Meerahobʼtesi li ruuchichʼochʼ chi moko li palaw chi moko ebʼ li cheʼ toj reetal tqakʼe li eetalil chi xpeekemebʼ li xmoos li Qayos!».
4 Ut xwabʼi naq li xkʼihalil li xeʼkʼeheʼk reetalil aʼan 144,000 chixjunilebʼ chalenaqebʼ saʼebʼ li xteep li ralal xkʼajol laj Israel.
5 Re li xteep laj Judá 12,000 kikʼemank reetalil chi xpeekemebʼ;
re li xteep laj Rubén 12,000;re li xteep laj Gad 12,000;
6 re li xteep laj Aser 12,000;re li xteep laj Neftalí 12,000;re li xteep laj Manasés 12,000;
7 re li xteep laj Simeón 12,000;re li xteep laj Leví 12,000;re li xteep laj Isacar 12,000;
8 re li xteep laj Zabulón 12,000;re li xteep laj José 12,000;re li xteep laj Benjamín 12,000 kikʼemank reetalil chi xpeekemebʼ.
9 Chirix chik aʼin xwil jun li kʼiila tenamit ut maaʼani junaq li winq kiruuk rajlankilebʼ. Ebʼ li qas qiitzʼin aʼin chalenaqebʼ saʼ chixjunilebʼ li tenamit, ebʼ li teep, ebʼ li kʼalebʼaal ut ebʼ li aatinobʼaal ut xaqxokebʼ chiru li kʼojaribʼaal ut chiru li Karneer. Tiqtokebʼ rikʼin saqi jut-aqʼ ut wank xxaq cheʼ* saʼ ruqʼebʼ.
10 Ut chi kaw xyaabʼebʼ xkux yookebʼ xyeebʼal: «Li kolbʼa ibʼ chalenaq rikʼin li Qayos li chunchu saʼ li kʼojaribʼaal ut chalenaq ajwiʼ rikʼin li Karneer!».
11 Chixjunilebʼ li ánjel xaqxokebʼ chi xsutam li kʼojaribʼaal, chi xsutamebʼ li cheekel winq ut chi xsutamebʼ li kaahibʼ chi ánjel ut xeʼxwiqʼibʼ ribʼ chiru li kʼojaribʼaal ut xeʼxloqʼoni li Yos.
12 Ut xeʼxye: «Joʼkan taxaq! Li Qayos li wank xnaʼlebʼ, xwankilal ut xmetzʼew tento tixkʼul li nimaak ut li loqʼal ut chixjunilebʼ tento teʼroxloqʼi ut teʼbʼanyoxinq chiru chi junelik. Joʼkan taxaq».
13 Tojaʼ naq jun rehebʼ li cheekel winq kixpatzʼ we: «Anihebʼ li tiqtokebʼ rikʼin saqi jut-aqʼ? Ut bʼar chalenaqebʼ?».
14 Joʼkan naq saʼ junpaat xinsume: «At Inqaawaʼ, laaʼat li nakatnawok re». Tojaʼ naq aʼan kixye we: «Ebʼ aʼan xeʼxnumsi li nimla rahilal, xeʼxpuchʼ li xjut-aqʼ ut xeʼxsaqobʼresi saʼ xkikʼel li Karneer.
15 Joʼkan naq wankebʼ chiru li xkʼojaribʼaal li Yos ut nekeʼkʼanjelak chiru chi qʼeq ut chi kutan saʼ li rochoch. Ut li chunchu saʼ li kʼojaribʼaal tkoloq rehebʼ.
16 Inkʼaʼ chik teʼtzʼokaaq chi moko tchaqiq rehebʼ, inkʼaʼ teʼrahobʼtesiiq xbʼaan li saqʼe chi moko teʼrekʼa xtiqwal li saqʼe.
17 Xbʼaan naq li Karneer, li wank saʼ xyi li kʼojaribʼaal, trilebʼ joʼ naxbʼaanu jun aj ilol karneer ut tixkʼamebʼ saʼebʼ li yuʼamhaʼ li nekeʼkʼehok yuʼam. Ut li Yos tixmes li xyaʼalebʼ ru».
Xtzʼaqobʼ ebʼ li naʼlebʼ
^ Ebʼ li xxaq cheʼ aʼin chanchan li xxaq kook.
