Apocalipsis 8:1-13
8 Naq li Karneer kixte li xwuq letzlebʼ maakʼaʼ kiʼekʼank saʼ choxa chiru mero hoor.
2 Ut xwil wuqubʼ li ánjel xaqxokebʼ chiru li Yos ut xeʼkʼeheʼk rehebʼ wuqubʼ li trompeet.
3 Kiwulak jun chik li ánjel rikʼin jun li sekʼ re oor li nakʼatmank wiʼ li insiʼeens ut kikanaak chi xaqxo chixkʼatq li xnaʼaj li mayej.* Ut kikʼemank re naabʼal li insiʼeens re naq tixkʼat saʼ xnaʼaj li mayej* re oor li wank chiru li kʼojaribʼaal naq yook chi abʼimank li xtij chixjunilebʼ li santil paabʼanel.
4 Ut li xsibʼel li insiʼeens li wank saʼ ruqʼ li ánjel joʼ ajwiʼ li xtij ebʼ li santil paabʼanel kitaqeʼk chiru li Yos.
5 Abʼan li ánjel saʼ junpaat kixchap li sekʼ, kixnujtesi rikʼin li ruxaml li wank saʼ xnaʼaj li mayej* ut kixkut saʼ ruuchichʼochʼ. Ut kiʼekʼank li kaaq, ebʼ li xyaabʼ kuxej, kiwank li xrepom kaaq ut jun li nimla hiik.
6 Ut li wuqubʼ chi ánjel xeʼxkawresi ribʼ re xchʼeʼbʼal li wuqubʼ chi trompeet.
7 Li xbʼeen ánjel kixchʼeʼ li xtrompeet. Tojaʼ naq kichalk li saqbʼach ut xaml yukʼinbʼil rikʼin kikʼ ut aʼin kikutmank saʼ ruuchichʼochʼ. Ut kikʼat li rox jachal li ruuchichʼochʼ, li rox jachal ebʼ li cheʼ ut kikʼat ajwiʼ chixjunil li rax pim.
8 Li xkabʼ ánjel kixchʼeʼ li xtrompeet. Tojaʼ naq jun li chanchan nimla tzuul li yook xxamlel kikuteʼk saʼ palaw. Ut li rox jachal li palaw kisutqʼiik choʼq kikʼ,
9 li rox jachal ebʼ li xul li wankebʼ saʼ palaw xeʼkamk ut li rox jachal ebʼ li nimla jukubʼ xeʼjukʼeʼk.
10 Li rox ánjel kixchʼeʼ li xtrompeet. Tojaʼ naq jun nimla chahim li naqʼichichnak xxamlel kiʼelk chaq saʼ choxa, kitʼaneʼk saʼ xbʼeen li rox jachal ebʼ li nimaʼ ut saʼ xbʼeenebʼ li yuʼamhaʼ.
11 Li xkʼabʼaʼ li chahim aʼan Kʼa. Ut li rox jachal li haʼ kikʼahoʼk joʼkan naq naabʼalebʼ li qas qiitzʼin xeʼkamk.
12 Li xka ánjel kixchʼeʼ li xtrompeet. Tojaʼ naq kirahobʼtesiik li rox jachal li saqʼe, li rox jachal li po ut li rox jachal ebʼ li chahim. Joʼkan naq li rox jachal rehebʼ aʼin tqʼoqyinoʼq raj ut li rox jachal re li kutan maakʼaʼaq raj xsaqenkil ut joʼkan raj ajwiʼ tkʼulmanq rikʼin li qʼoqyink.
13 Xinʼilok ut xwabʼi jun li tʼiw li yook chi rupupik saʼ xyi li choxa yook xyeebʼal chi kaw xyaabʼ xkux: «Li wankebʼ saʼ ruuchichʼochʼ teʼxkʼul jun li nimla rahilal xbʼaan naq li oxibʼ chik chi ánjel okebʼ re xchʼeʼbʼal li xtrompeet!».
Xtzʼaqobʼ ebʼ li naʼlebʼ
^ Malaj «li altar». Taawil xchʼolobʼankil li aatin, xnaʼaj li mayej.
^ Malaj «li altar». Taawil xchʼolobʼankil li aatin, xnaʼaj li mayej.
^ Malaj «li altar». Taawil xchʼolobʼankil li aatin, xnaʼaj li mayej.
