Apocalipsis 9:1-21
9 Li roʼ ánjel kixchʼeʼ li xtrompeet. Tojaʼ naq xwil jun li chahim li kiʼelk chaq saʼ choxa ut kitʼaneʼk saʼ ruuchichʼochʼ ut kikʼemank re li xlaawil li chamal jul.*
2 Li chahim kixte li chamal jul* ut saʼ li jul kitaqeʼk chaq li sibʼ joʼ xsibʼel jun li nimla xaml. Kimoyk ru li saqʼe ut li iqʼ rikʼin li sibʼ li kiʼelk chaq saʼ li jul.
3 Saʼ sibʼ kiʼelk chaq li saakʼ* ut xeʼchalk saʼ ruuchichʼochʼ, kikʼemank xwankilal, li wankilal ajwiʼ li wank rehebʼ li xookʼ arin saʼ ruuchichʼochʼ.
4 Xeʼyeeheʼk rehebʼ naq inkʼaʼ teʼxrahobʼtesi li pim li wank saʼ ruuchichʼochʼ chi moko li rax pim chi moko junaq li cheʼ, kaʼajwiʼ ebʼ li qas qiitzʼin li maakʼaʼ reetalil li Yos chi xpeekemebʼ.
5 Kiyeemank rehebʼ li saakʼ* naq inkʼaʼ teʼxkamsi ebʼ li qas qiitzʼin, teʼxrahobʼtesi bʼan chiru oobʼ po. Li rahobʼtesiik li nekeʼxkʼe chanchan li rahobʼtesiik li naxkʼe li xookʼ naq naxtiqʼ junaq li qas qiitzʼin.
6 Saʼebʼ li kutan aʼan, ebʼ li qas qiitzʼin teʼxsikʼ li kamk abʼan maajoqʼe teʼxtaw; teʼxrahi ru li kamk abʼan li kamk t-eleliq chiruhebʼ.
7 Ebʼ li saakʼ* chanchanebʼ li kawaay li kawresinbʼilebʼ choʼq re li yalok, chanchan jun li koroon re oor wank saʼ xjolomebʼ ut ebʼ li xnaqʼ ru chanchan xnaqʼ ru winq.
8 Li rismalebʼ chanchan rismal ixq ut li ruch rehebʼ chanchan ruch re kaqkoj
9 ut wank rikʼinebʼ li ramlebʼ chʼiichʼ li naxkolebʼ li xmaqabʼ. Li xyaabʼ ebʼ li xxikʼ chanchan xyaabʼ ebʼ li bʼelebʼaal chʼiichʼ* li kelombʼilebʼ xbʼaanebʼ li kawaay li yookebʼ chi xik saʼ junpaat saʼ li yalok.
10 Joʼkan ajwiʼ, saʼebʼ li xye wank li xmay joʼebʼ li xookʼ ut aran ajwiʼ wankebʼ li xwankilal re xrahobʼtesinkilebʼ li qas qiitzʼin chiru oobʼ po.
11 Saʼ xbʼeenebʼ wank jun li awabʼej: li xʼánjel li chamal jul.* Li xkʼabʼaʼ saʼ hebreo aʼan Abadón* ut saʼ griego aʼan Apolión.*
12 Li xbʼeen rahilal ak xnumeʼk. Kʼehomaq reetal! Toj wiibʼ chik teʼchalq chirix aʼin.
13 Li xwaq ánjel kixchʼeʼ li xtrompeet. Tojaʼ naq xwabʼi jun xyaabʼ kuxej li yook chaq chi elk saʼebʼ li xxukubʼ saʼ xnaʼaj li mayej* re oor li wank chiru li Yos.
14 Kixye re li xwaq ánjel li wank rikʼin li trompeet: «Achʼabʼ li kaahibʼ chi ánjel li bʼakʼbʼokebʼ chixkʼatq li nimla nimaʼ Éufrates».
15 Ut li kaahibʼ chi ánjel (li xeʼkawresiik choʼq re li hoonal, choʼq re li kutan, choʼq re li po ut choʼq re li chihabʼ aʼan) xeʼachʼabʼaak re naq teʼxkamsi li rox jachal ebʼ li qas qiitzʼin.
16 Li xkʼihalil ebʼ laj puubʼ li wankebʼ chirix kawaay aʼan wiibʼ siʼeent miyon; laaʼin xwabʼi naq aʼin xkʼihalebʼ.
17 Saʼ li moy u xwil naq ebʼ li kawaay ut li chunchukebʼ saʼ xbʼeenebʼ, kaq li naramok re ebʼ li xmaqabʼ joʼ li xaml, asul joʼ li jasiint ut qʼan joʼ li asuupr; ebʼ li xjolom li kawaay chanchan xjolom ebʼ li kaqkoj ut saʼ rehebʼ naʼelk chaq xaml, sibʼ ut asuupr.
18 Li rox jachal ebʼ li qas qiitzʼin xeʼkamk xbʼaan li oxibʼ chi rahilal aʼin: li xaml, li sibʼ ut li asuupr li kiʼelk chaq saʼ rehebʼ li kawaay.
19 Li xwankilal ebʼ li kawaay natawmank saʼ rehebʼ ut saʼebʼ li xye xbʼaan naq ebʼ li xye chanchan kʼantiʼ ut wank xjolom ut rikʼinebʼ li xye nekeʼrahobʼtesink.
20 Abʼan ebʼ li junchʼol chi qas qiitzʼin li inkʼaʼ xeʼkamk xbʼaan li rahilal aʼin, inkʼaʼ xeʼxyotʼ xchʼool chi moko xeʼxjal xnaʼlebʼ chirix li xeʼxbʼaanu rikʼin ruqʼ. Inkʼaʼ xeʼxkanabʼ xloqʼoninkil ebʼ li maaʼus aj musiqʼej chi moko ebʼ li pechʼbʼil yos re oor, re plaat, re qʼanchʼiichʼ, re pek ut re cheʼ, li inkʼaʼ nekeʼruuk chi ilok, chi abʼink ut chi bʼeek.
21 Inkʼaʼ xeʼxyotʼ xchʼool chi moko xeʼxjal xnaʼlebʼ naq xeʼkamsink, naq xeʼaatinak rikʼin li maaʼus aj musiqʼej,* naq xeʼxmux ribʼ* chi moko naq xeʼelqʼak.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, chamal jul.
^ Taawil xchʼolobʼankil li aatin, chamal jul.
^ Malaj «li chiliʼ».
^ Malaj «li chiliʼ».
^ Malaj «li chiliʼ».
^ Ebʼ li bʼelebʼaal chʼiichʼ aʼin wiibʼ xyaantil ut kawaay nakelonk re.
^ Taawil xchʼolobʼankil li aatin, chamal jul.
^ Li naraj xyeebʼal “sachok”.
^ Li naraj xyeebʼal “aj sachonel”.
^ Malaj «li altar». Taawil xchʼolobʼankil li aatin, xnaʼaj li mayej.
^ Malaj «naq xeʼroksi li xnaʼlebʼebʼ li maaʼus aj musiqʼej», «naq xeʼtuulak», «naq xeʼroksi li bʼan li nakanobʼresink u». Taawil xchʼolobʼankil li aatin, aatinak rikʼinebʼ li maaʼus aj musiqʼej.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
